Nanchi mulomba kimye kyonse nyi? Bantu bavula balomba, kubikapotu ne babula kwitabila mwi Lesa. Mambo ka o balombela? Kwesakana na kupesa pesa kwaubiwe mu kyalo kya France, kichika kya bangikazhi balombatu ne kulanguluka langulukapo pa kuba’mba “bomvwe bulongo.” Byonka byuba bena Europe bavula, bangikazhi mu kyalo kya France kechi balomba na mambo a kukeba kupopwela Lesa ne. Bino, balomba na mambotu a kuba’mba ‘lulombelo lwibatekenesha.’ Bino, bamo baitabila mwi Lesa balombatu umvwe baikala na makatazho ne kukeba’mba Lesa akumbule milombelo yabo ponkapotu.—Isaya 26:16.

Nga anweba mulangulukapo amba ka? Nanchi mulanguluka’mba lulombelo ke jishindatu ja kwimukwasha kulanguluka bulongo nyi? Inge mwaitabila mwi Lesa, nanchi mumona lulombelo byo lwimukwasha mu bwikalo bwenu nyi? Inyi mumona nobe milombelo yenu kechi ikumbulwa ne? Baibolo wakonsha kwimukwasha kuyuka kuba’mba lulombelo kechi jishindatu ja kwitekeneshamo ne, bino ke jishinda jitukwasha kufwenya kwipi ne Lesa.