Mwakonsha kwiipuzha’mba, ‘Inge Lesa wayuka bintu byonse, kubikapotu ne milanguluko yami ne byo nkajilwa, mambo ka a kulombela?’ Buno ke bwipuzho bwanema bingi. Nanchi Yesu kechi waambile’mba Lesa “wayuka bintu byo mukeba saka mukyangye kumulomba” nenyi? (Mateo 6:8) Mfumu wa bena Isalela aye Davida wayukile kino kishinka, kabiji wanembele’mba: “Ka paji nangwa kyambo kimo pa lujimi wami kyo mwabula kuyukisha, anweba Yehoba, ne.” (Salamo 139:4) Pano mambo ka a kulombela kwi Lesa? Pa kuba’mba tukumbule buno bwipuzho, twayai tumone byaambapo Baibolo pa milombelo ya bapopweshi ba Lesa. *

Nangwa Baibolo waamba’mba Yehoba * Lesa wayuka bintu byonse, bino Baibolo umwesha ne kuba’mba Lesa kechi uta muchima pa kuyukatu mazhina a bapopweshi banji ne. (Salamo 139:6; Loma 11:33) Yehoba kechi uji nobe kompyuta ulamatu mazhina a bantu kwa kubula kuyuka bulongo biji bobo bantu ne. Lesa wata bingi muchima pa milanguluko ya mu mukachi ka michima yetu mambo ukeba’mba tufwenye kwipi ne aye. (Salamo 139:23, 24; Yakoba 4:8) O ene mambo Yesu o atundaikijile baana banji ba bwanga kulomba, nangwa kya kuba Shanji wayuka bintu byo tukeba. (Mateo 6:6-8) Umvwe ke twisambe na Mulenga wetu kimye kyonse, tukafwenya kwipi ne aye.

Bimye bimo kechi tuyuka kyo twafwainwa kulombapo ne. Pa bimye bya uno mutundu, Lesa ukebakeba mu michima yonse, uyuka bulongo bintu biji mu michima yetu ne makatazho etu kabiji ne kuyuka mwa kwitukwashisha. (Loma 8:26, 27; Efisesa 3:20) Inge twamona kuba’mba Lesa witukwasha mu bwikalo bwetu, nangwatu mu mashinda abula kumwekana patoka, tuyuka’mba uji kwipi ne atweba.

Baibolo witubuula’mba Lesa Wabulume bonse ukumbula milombelo ya bakalume banji bakishinka, bino witubuula ne ene mambo Lesa o abujila kuteleka ku milombelo imo. Kya kumwenako, kimye kyavujile bukapondo mu bena Isalela, Lesa watumine ngauzhi wanji Isaya kuya na kwibambila’mba: ‘Kine nangwa mukalomba milombelo yavula, kechi nkemumvwa ne maboko enu atapakana mashi.’ (Isaya 1:15) Kyamwekatu patoka’mba Lesa kechi ukumbula milombelo ya boba balengulula mizhilo yanji nangwa balomba bintu na milanguluko yabula kufwainwa ne.—Byambo bya Mana 28:9; Yakoba 4:3.

Pakuba Baibolo waamba’mba: “Kintu kyonse kyo twakonsha kumulomba mwayila kyaswa muchima wanji, aye witumvwa.” (1 Yoano 5:14) Nanchi kino kilumbulula’mba Lesa ufikenatu kupa bapopweshi banji bintu byonse byo balomba nyi? Ine. Akilangulukai pa kyamwekejile mutumwa Paulo. Kimye kimo, wasashijile Lesa pa bimye bisatu amba amufumye “mwiba mu mubiji” wanji. (2 Kolinda 12:7, 8) Kyamweka Paulo wajinga na kikola kya meso kyabulanga kupwa. Kino kikola kyamulefulanga bingi. Nangwa kya kuba’mba Paulo bamupele bupe bwa kubuka bikola kabiji wasangwilepo ne muntu wafwile, bino aye mwine watwajijile kuchinchika ku kikola kyanji kwa kubula kubukwa. (Byubilo 19:11, 12; 20:9, 10) Nangwa kya kuba milombelo yanji kechi yakumbwilwe monka mo akebejilenga ne, Paulo watambwijile mukumbu wa Lesa na muchima yense.—2 Kolinda 12:9, 10.

Ibyo, milombelo ya bantu bamo banembwa mu Baibolo yakumbwilwe mu mashinda a kukumya. (2 Bamfumu 20:1-7) Bino, nangwatu kimye kyanembejilwengamo Baibolo, kechi bonse batambwilanga mikumbu ya uno mutundu ne. Bapopweshi bamo balefwilwe byo bamwene nobe Lesa kechi wakumbwile milombelo yabo ne. Mfumu Davida waipwizhe’mba: “Anweba Yehoba, moba anga o mukamvulama? myaka yonsenyi?” (Salamo 13:1) Bino uno mwanamulume wa kishinka, aye Davida byo avulukile Yehoba byo amupokolwele pa bimye byavula, wabwelele waketekela mwi Lesa jikwabo. Mu lonka lulombelo lumo, Davida waambile’mba: “Pakuba amiwa naketekela mu lusa lwenu.” (Salamo 13:5) Byonka byaubile Davida, kimo kimye bapopweshi ba Lesa lelo jino bakonsha kukelwa mu lulombelo kufika ne kimye kyo bamona kuba’mba Lesa wakumbula milombelo yabo.—Loma 12:12.

Lesa witupa bintu byo twakajilwa.

Bansemi batemwa baana kechi kimye kyonse kyo bapa baana babo bintu byo balomba pa kyonka kimye kyo balombelapo ne. Mu jishinda jimo, kechi kimye kyonse Lesa kyo akumbula milombelo yetu kwesakana na mo tukebela nangwa pa kyonka kimye kyo tubena kukebelapo mikumbu ne. Bino twakonsha kuketekela kuba’mba Mulenga wetu uketupa bintu byo tukajilwa pa kimye kyafwainwa kabiji mu jishinda jawama, byonka byuba nsemi wamulume watemwa baana banji.—Luka 11:11-13.

Bimye bimo Lesa ukumbula milombelo mu mashinda abula kumweka patoka.

Twafwainwa kuba byepi inge tubena kulomba kwi Lesa amba etukwashe pa lukatazho lubena kubula kupwa? Inge milombelo yetu yabula kukumbulwa mu jishinda ja kukumya, nanchi twafwainwa kupwisha mu michima yetu amba Yehoba kechi wakumbula milombelo yetu nenyi? Ine, pakuba twafwainwa kulangulukapo ne kumona inge Lesa witukwasha mu mashinda abula kumweka. Kya kumwenako, kampe mulunda netu waesekele na ngovu yanji yonse pa kuba’mba etukwashe pa kyonka kimye kyo twakebelenga bukwasho. (Byambo bya Mana 17:17) Nanchi kechi twakonsha kwamba’mba Yehoba ye watundaikile uno mulunda netu witutemwa amba etukwashe nenyi? Kunungapo, Lesa wakonsha kukumbula milombelo yetu kupichila mu Baibolo. Mu Baibolo twakonsha kutanamo maana a kwitukwasha kuyuka bya kuba na lukatazho lo tubena kupitamo.—2 Timoti 3:16, 17.

Mu kifulo kya kufumyapo lukatazho, javula Lesa upa bantu banji bulume bwa kuchinchika lolo lukatazho. (2 Kolinda 4:7) Kya kumwenako, kimye kimo Yesu walombele kwi Shanji amba afumyepo lumanamo lukatampe lo apichilengamo, pa kuba’mba lubule kuleta myendeleko pa jizhina ja Lesa. Yehoba watumine malaika kwiya na kumukosesha. (Luka 22:42, 43) Kyo kimotu, Lesa wakonsha kwingijisha mulunda netu kwitukosesha na byambo byawama pa kimye kyafwainwa. (Byambo bya Mana 12:25) Na mambo a kuba mukumbu wa uno mutundu kechi umweka patoka ne, twafwainwa kutako muchima ku mashinda Lesa o akumbwilamo milombelo yetu.

Lesa ukumbula milombelo imo pa kimye kyanji kyafwainwa.

Baibolo waamba’mba Lesa Wabulume bonse ubila bibusa bantu bepelula “mu kimye kyafwainwa.” (1 Petelo 5:6) Inge ke tumone amba milombelo yetu yabanda kukumbulwa, kechi kilumbulula’mba Yehoba witulekelela ne. Bino, na mambo a kuba’mba ye wayuka bintu byonse, Mulenga wetu witutemwa ukumbula milombelo yetu kwesakana na byo ayuka kuba’mba byo bituwamina.

Kya kumwenako, langulukai kuba’mba muji na mwanenu wamulume wamucheche, kabiji uno mwanenu wimulomba amba mumupotele nkinga. Nanchi mukafikenatu kumupotela nyi? Inge mwamona’mba wakikepa kechi wakonsha kwingijisha nkinga ne, mwakonsha kufuukulapo kumupotela kulutwe. Bino mukuya kwa kimye, inge mwamona’mba nkinga yakonsha kumukwasha, popo mwakonsha kumupotela. Kyo kimotu, Lesa wakonsha kwitupa “bisaka muchima [wetu]” mu kimye kyafwainwa umvwe twatwajijila kulomba.—Salamo 37:4.

Baibolo watundaika bena Kilishitu bakine kubula kulengulula buneme bwa kulomba. Bamo bakonsha kwamba’mba, ‘kyapela kwamba kukila  kwibyuba.’ Kya kine, inge kya kuba twachinchika lukatazho nangwa nshiji pa kimye kyabaya, kyakonsha kukatazha kupembela mukumbu wa Lesa. Nangwa byonkabyo, twafwainwa kuvulukanga byafunjishe Yesu pa kulomba na mukoyo.

Yesu waambile kishimpi kya mwanamukazhi wafwilwa wayanga ku mutonyi wabulanga kunemeka bantu na kumwambila’mba amuchibile mambo.(Luka 18:1-3) Nangwa kya kuba patanshi uno mutonyi wakainenga, bino pa kupitapo moba waambile mu muchima’mba: “Nafwainwa kumuchibila mambo anji kuba amba ekileke kwiyanga na kunkatazha.” (Luka 18:4, 5) Kwesakana na mulaka mutanshi ye banembejilemo Baibolo, bino byambo bilumbulula’mba uno mutonyi wamuchibijile mambo uno mwanamukazhi kuchina’mba wakeya kumutamishisha jizhina. * Inge mutonyi wabujile koloka wakwashishe mwanamukazhi muyanji na mambo a kukeba kubula kutamisha jizhina janji, ko kuba’mba Lesa witutemwa aye ukakizhamo kuchibila mambo bantu “bamujijila mute ne bufuku.” Yesu waambile’mba Lesa “ukapelawizha kwibachibila mambo.”—Luka 18:6-8.

Nangwa kampe pakonsha kupita kimye pa kuba’mba Lesa akumbule lulombelo lwetu, bino kechi twafwainwa kuleka kulomba ne. Kupichila mu kulomba kwa kubula kuleka, tumwesha’mba tukebesha kumona Lesa byo akonsha kwitukwasha mu bwikalo bwetu. Kabiji tuyuka Lesa byo akumbula milombelo yetu, kino kitulengela kufwenya kwipi ne aye. Ee, twakonsha kuketekela’mba Yehoba ukakumbula milombelo yetu umvwe twatwajijila kulomba na luketekelo.—Luka 11:9.