Thomas Emlyn wajinga ñanyi, kabiji mambo ka o alwijilengako bukine? Twakonsha kufunjilako ka kwi aye lelo jino?

Patanshi, twafwainwa kuyuka byamwekele myaka ya mu ma 1600 ne ma 1700 mu England ne mu Ireland. Pa kyokya kimye, Chechi wa England ye wajinga na luusa lukatampe. Na mambo a kupusenamo mu mafunjisho, mabumba a ba Polotesitanti kechi aumvwañananga na uno chechi ne.

Thomas Emlyn wasemenwe pa 27 May, 1663, mu muzhi wa Stamford, mu Lincolnshire, mu kyalo kya England, kimye kyo kwajinga malwañano pakachi ka machechi. Watendekele kusapwila mu chechi kimye kyo afikizhe myaka 19. Mu kuya kwa kimye, waikele pashita waingijilanga mwanamukazhi wajinga na kifulo kikatampe mu muzhi wa London, kabiji panyuma ya bino, wavilukijile ku muzhi wa Belfast mu Ireland.

Mu kuya kwa moba, waikele ntangi wa chechi umo mu Belfast. Kabiji waingijile uno mwingilo wanji mu mapunzha avula bingi kubikapotu ne mu Dublin.

Mu kimye kyo aubilenga bino byonse, Emlyn watele muchima pa kufunda Baibolo. Kufunda Baibolo kwamulengejile kuzhinauka lufunjisho lwa Balesa basatu lo aitabijilemo patanshi. Byo apesele pesele mu mabuku a Mambo awama, washiinwe kuba’mba lufunjisho lwa Balesa basatu lwa bubela.

Emlyn kechi wafikenejiletu kubulañana bintu byo afunjile mu Baibolo ne. Nangwa byonkabyo, bamo mu chechi ye ajingamo wa mu Dublin bamwene’mba kechi wasapwilanga lufunjisho lwa Balesa basatu ne. Byo ayukile’mba bakwabo kechi basa kutemwa bintu byo afunjile ne, wanembele’mba: “Kechi nakonsha kutwajijila pa kino kifulo panyuma ya kusolola milanguluko yami patoka ne.” Mu June 1702, bakwabo babiji bayile na kumwipuzha ene mambo o abujilanga kusapwila lufunjisho lwa Balesa basatu. Emlyn waswile’mba kechi waitabijile mu luno lufunjisho ne, kabiji wipaine kufumamo mu chechi.

Byo papichile moba, Emlyn wafumine ku muzhi wa Dublin mu kyalo kya Ireland, ne kuya ku England. Bino, panyuma ya milungu jikumi, wabwelele ku Dublin na kupwisha mingilo imo yo ashile, pa kuba’mba avilukile ku London. Byo akijinga mu Dublin, wakebelenga kulumbulula bulongo bishinka byo ataine, onkao mambo, wanembele buku wa kuba’mba An Humble Inquiry Into the Scripture-Account of Jesus Christ. Mu uno buku, walumbulwile bishinka bya mu Binembelo bimwesha’mba Yesu kechi ye Lesa Wabulume bonse ne. Kino kyazhingijishe bingi bantu ba mu chechi wa mu Dublin. Onkao mambo, bamulobejile ku kije kya mambo.

Pa 14 June, 1703, bamukwachile ne kumutwala ku Kije kya Mfumu wamukazhi kya Queen’s Bench Court mu muzhi wa Dublin. Mu buku wanji wa kuba’mba True Narrative of the Proceedings, Emlyn  waambile’mba bamupelemo mambo a “kunemba buku ye baambile’mba mwajinga byambo bya kuba Lesa mwenga ne kuba’mba Yesu Kilishitu kechi waesakana pamo ne Lesa ne.” Ano mambo beachibijile jimo saka bakyangye ne kwiamba. Babishopu batanu na babiji ba mu chechi wa Ireland baikele kipona kimo na bamitonyi ba kino kije. Emlyn kechi bamuswishishe kwambapo byambo bya kwipokolola ne. Shabyambo wayile bingi nkuwa aye Richard Levins, waambijile Emlyn amba, “kechi basa kumuleka ne.” Pa kupwisha, Mukulumpe wa bamitonyi mu Ireland aye Richard Pyne, wabujile bamitonyi amba inge babula kuchiba ano mambo monka mo bafuukwijile, “babishopu po baji,” ko kuba’mba bamitonyi bakebakambula ku babishopu.

Emlyn byo bamuzhachishe na mambo, Shabyambo wamwambijile’mba asankilepo bishinka byo ataine mu Baibolo. Bino Emlyn wakaine. Onkao mambo, bamwambijile kupana mali ne kumukasa mwaka umo. Na mambo a kuba wakankelwe kupana ano mali, waikele mu kaleya myaka ibiji kufika kimye mulunda nanji kyo esambile na ba kije amba bakepesheko mali. Emlyn bamukasulwile pa 21 July, 1705. Lumanamo lo apichilemo lwamulengejile kwamba byambo byanembwa patendekela kino kibaba bya kuba’mba, “Nepana kumanama na mambo a byo naitabila amba bo bukine pe Lesa ne lukumo lwanji.”

Emlyn wayile ku London, ko akataine mukwabo aye William Whiston, shayuka wa Baibolo ye bamanyikilepo na mambo a kunemba bishinka byo amwene amba bo bukine bwa mu Baibolo. Whiston wamunemekele bingi Emlyn kabiji wamutelanga’mba “‘muntu mutanshi waitabila’ mu ‘bwina Kilishitu bwa kala.’”

Byonka byaubile William Whiston ne shayuka mukwabo wayukanyikwa bingi aye Isaac Newton, Emlyn wataine kuba’mba Baibolo kechi utundaika lufunjisho lwa Balesa basatu ne. Walumbulwile’mba: “Panyuma ya kulangulukishapo ne kufunda Binembelo byazhila. . . nataine bishinka . . . byandengejile kupimpula milanguluko yami pa lufunjisho lwa Balesa basatu.” Wapwishishe kuba’mba “Lesa Shanja Yesu Kilishitu ye yenkatu Lesa Wabulume bonse.”

Ñanyi bintu byalengejile Emlyn kwitabila bino? Wataine binembelo byavula bimwesha lupusano luji pe Yesu ne Shanji. Binembelo byalondelapo byo bimo byamukwashishe (byambo byasendalala byo byambo byaambile Emlyn):

•  Yoano 17:3: “Kilishitu kechi waambilepo amba ye Lesa nangwa’mba ye Lesa yenka wakine ne.” Shanjitu ye utelwa’mba “Lesa yenka wakine.”

•  Yoano 5:30: “Mwana kechi uba kyaswa muchima wanji ne, bino uba kyaswa muchima wa Shanji.”

•  Yoano 5:26: “Shanji ye wamupa bumi bo aji nabo.”

•  Efisesa 1:3: “Yesu Kilishitu utelwa’mba mwana Lesa, bino Lesa kechi utelwapo amba Shanja Lesa ne, nangwa kya kuba javula utelwa’mba Shanja Nkambo yetu Yesu.”

Panyuma ya kulangulukapo bulongo pa bino bishiino, Emlyn waambile na kizaku amba: “Kafwakotu nangwa pamo mu Binembelo paamba’mba Tata, Mwana ne Mupashi wazhila muntu umo ne.”

Bavula lelo jino bachina kulwilako bishinka bya mu Binembelo. Emlyn aye wipaine kulwilako bukine bwa mu Baibolo. Waipwizhe’mba: “Inge muntu wakankalwa kubulako bantu bukine bo atana mu Binembelo byazhila, nga mambo ka a kwibufunjila ne kwi bupesa pesa?” Emlyn kechi wachiine kulwilako bukine ne.

Byaubile Emlyn ne bakwabo byakonsha kwitukwasha kwipesa pesa ne kumona inge twipana kulwilako bukine inge bantu ke betwendeleke na mambo a bintu byo twaitabilamo. Twakonsha kwiipuzha’mba, ‘Ñanyi kintu kyo nanemeka? Munema ne kutakaikwa mu kimasamasa nyi, inyi kutumbijika bukine buji mu Mambo a Lesa?’