Mepuzho a mu Baibolo a Kumbulwa
Ñanyi ubena kulama ino ntanda?
Umvwe Lesa ye ulama ino ntanda, nanchi inge kuji buyanji nyi?
Bantu bavula baitabila kuba’mba Lesa ye ulama ino ntanda. Umvwe byobyo kiji, nanchi mu ntanda inge muji buyanji nyi? (Mpitulukilo ya mu mizhilo 32:4, 5) Baibolo waamba kuba’mba ubena kulama ino ntanda ke mubi.—Tangai 1 Yoano 5:19.
Pano nga uno mubi waikele byepi na bulume bwa kulama bantu? Ku ntendekelo ya bwikalo bwa bantu, malaika wasatukijile Lesa ne kutundaika bantu batanshi nabo kumusatukila. (Ntendekelo 3:1-6) Bamulume ne mukazhi bafuukwilepo kukokela malaika wasatukile aye Satana kuba’mba ebalamenga. Lesa wa Bulume Bonse ye Kalama wafwainwa, bino ukeba bantu kwifuukwilapo kulondela bukalama bwanji inge bamutemwa. (Mpitulukilo ya mu mizhilo 6:6; 30:16, 19) Kyatamakotu ke kya kuba’mba bantu bavula basalapo kulondela byatama byonka byaubile bantu babiji batanshi.—Tangai Lumwekesho 12:9.
Ñanyi ukapwisha makatazho abena kupitamo bantu?
Nanchi Lesa ukaswisha Satana kutwajijila na bukalama bwanji bwatama nyi? Ine! Lesa ukengijisha Yesu kufumyapo bubi bonse bwaleta Satana.—Tangai 1 Yoano 3:8.
Lesa ukapa Yesu bulume ne konauna Satana. (Loma 16:20) Panyuma ya bino, Lesa ukalama bantu ne kubwezha bwikalo bwa lusekelo kabiji bwa mutende byonka byo akebelenga kuntendekelo.—Tangai Lumwekesho 21:3-5.
