Mepuzho a mu Baibolo a Kumbulwa
Nanchi ntanda yaikelako ka?
Ntanda beilengele kwikala mpunzha ya lusekelo ya kwikalapo bantu
Ntanda yalengelwe kuba’mba bilengwa byonse bipeema bikalengapo. Iji na mema avula akonsha kulengela bantu kwikala na bumi. Byaikala ntanda, byo izhokoloka ne mo ipita bebilenga bulongo pa kuba’mba bizhikijile mema a mu tulunga kubula kuchimba nangwa kubula kukabisha. Kabiji bulume buji mu lwelele ne bulume bukoka bintu buji pano pa ntanda bizhikijila ntanda ku kyuya. Bijimwa ne banyama bingijila pamo biji pano pa ntanda byalengwa mu jishinda ja kukumya. Kino kyalengela bantu bavula kushiinwa amba ntanda yajinga na nkebelo pa kwiilenga.—Tangai Isaya 45:18.
Nangwa byonkabyo, mwakonsha kwishikisha amba: ‘Nanchi buyanji ne nshiji byajinga mu ino nkebelo nyi?’—Tangai Mpitulukilo ya mu mizhilo 32:4, 5.
Nanchi nkebelo ya ntanda ikafika nyi?
Ntanda beilengele kwikala mpunzha ya lusekelo ya bantu benemeka kabiji batemwa Mulenga wabo. Na mambo a kino, bumi bwa bantu buji na nkebelo kukila bijimwa ne bumi bwa banyama. Kupusanako na banyama, twakonsha kuyuka biji Mulenga wetu ne kukeba kulondela byubilo byanji bya butemwe ne bololoke.—Tangai Musapwishi 12:13; Mika 6:8.
Mulenga wetu wakonsha kufikizha byonse byo akeba kuba. Onkao mambo, twakonsha kuketekela kuba’mba ukafumyapo buyanji ne nshiji ne kulengela ino ntanda kwikala mpunzha yawama ya lusekelo ya bantu.—Tangai Masalamo 37:11, 29; Isaya 55:11.