“LESA Mupashi,” kechi umweka ku bantu ne. (Yoano 4:24) Pano bino, Baibolo wamba’mba bantu bamo bakimonapo kala Lesa mu mashinda amo. (Bahebelu 11:27) Nanchi kino kyakonsheka nyi? Nanchi mwakonsha kumona “Lesa ubula kumweka” nyi?—Kolose 1:15.

Esakanyai kino ku muntu wasemwa mpofu. Nanchi kubula kumona kumulengela kubula kuyuka bintu biji mu ntanda nyi? Ine. Mpofu uyuka bintu mu mashinda apusana pusana bimukwasha kuyuka amba awe muntu ne bintu bibena kumweka. Mwanamulume umo mpofu waambile’mba: “Kumona kechi ko kulengela kuyuka bintu ne, bino milanguluko yo ikwasha kuyuka bintu.”

Mu jishinda jimotu, nangwa kya kuba kechi mwakonsha kumumona Lesa na meso ne, “michima yenu yashinkuka.” (Efisesa 1:18) Monai mashinda o mwafwainwa kubilamo bino.

Muntu ubula kumona, uji na bulume bwabaya bwa kukwata ne kumvwa bintu bumulengela kuyuka bintu byo abula kumona. Ne atweba twakonsha kwingijisha bulume bo tuji nabo pa kumona bintu biji mu ntanda ne kuyuka amba Lesa ko aji. “Byubilo byanji byamweka patoka kufumatu kimye kyo alengele ntanda, mambo bino byubilo byamwekela mu bintu byo alenga.”—Loma 1:20.

Akilangulukai pa ntanda yo twikalamo. Ntanda kechi beilengele amba ya kwikalamotu ne, bino ne kwiyowa bumi. Inge ke tumvwe ka mwela kawama kabena kupepemuka, kota mute, kuja kipangwa kyawama bulongo, nangwa kumvwa tuñonyi tubena kwimba, tumvwa bingi bulongo. Nanchi bino byonse kechi bimwesha maana, lusa ne bumpanyi buji na Mulenga wetu ne nyi?

Ñanyi bintu byo mwakonsha kufunjilako kwi Lesa pa bintu byo tumona mu ntanda? Bintu biji mwiulu bimwesha bulume buji ne Lesa. Bintu byatana basayansi bimwesha kuba’mba bintu biji mwiulu nabiji myala yanshansha ibena kuvujilakotu. Umvwe mwatala mwiulu bufuku, mwakonsha kwishikisha’mba: Nga bulume bulengela myala yanshansha kwenda lubilo ifuma kwepi? Baibolo witubula amba Mulenga uji na ‘bulume bukatampe.’ (Isaya 40:26) Bintu byalenga Lesa bimwesha amba “wa bulume bonse” ko kuba’mba Ye “mukatampe mu bulume.”—Yoba 37:23.

Nsemi wamukazhi uji na baana babiji bampofu waambile’mba: “Bayuka bintu kupichila mu kwibabula. Inge muji pangye, babulai bintu byonse byo mubena kumona. Yenu meso abo.” Kyo kimotu, nangwa kya kuba kafwako wakimonapo kala Lesa ne, Mwana wa Lesa aye Yesu “waikala kwipi na Shanji, ye wamulumbulula.” (Yoano 1:18) Byo ajinga kilengwa kitanshi kya Lesa kabiji Mwana Lesa yenkawa umo, ye wajinga “meso” etu a kumona biji mwiulu. Ye wayuka byonse byaamba pe Lesa ubula kumweka.

Akimonai bintu bimo byalumbulwile Yesu wajinga ne Shanji, aye Lesa pa myaka yavula:

• Lesa wingila bingi. “Batata ne luno bakingila.”—Yoano 5:17.

• Lesa wayuka bintu byo tukeba. “Shenu wayuka bintu byo mukeba saka mukyangye kumulomba.”—Mateo 6:8.

• Lesa witupa byo tukeba mambo uji na lusa. “Shenu  wa mwiulu . . . usamisha kyeya pa bantu babi ne bawama, kabiji unokesha mvula pa baoloka ne babula koloka.”—Mateo 5:45.

• Lesa witunemeka pa muntu pa muntu. “Nanchi tubwalula tubiji kechi tupotwa na kajali kamo nenyi? Pakuba kafwako nangwa kamo kaponena panshi kwa kubula Shenu kuyuka ne. Kabiji nsuki ya ku mutwe wenu yonse beibala. Onkao mambo, kwakamwa ne: mambo mwanema kukila bisamba bya bwalula.”—Mateo 10:29-31.

Bampofu bayuka bintu mu jishinda japusana na jiyukilamo bantu bamona. Mpofu wakonsha kuyuka kimfutele kuba’mba kechi mpunzha pabula kusamina mute ne, bino amba mpunzha pabena kubula kufika kyeselela kya mute. Byonkatu mpofu byo akonsha kubula kumona kimfutele nangwa kyeya, kechi twakonsha kuyuka byubilo bya Yehoba atweba bene ne. Onkao mambo, Yehoba watumine muntu wajinga na byubilo byanji byalumbuluka.

Uno muntu wajinga Yesu. (Filipai 2:7) Yesu waambile ne kwitumwesha biji Shanji, aye Lesa. Mutumwa wa kwa Yesu aye Filipa washikishe amba: “Nkambo, tumweshai Bashenu.” Yesu wakumbwile’mba: “Awa wammona, wamona ne Batata.” (Yoano 14:8, 9) Ñanyi bintu byo mwafwainwa “kumona” byaubanga Yesu byakonsha kwimulengela kumona Shanji?

Yesu watemenwe bantu, kwikepesha kabiji bantu kechi bamuchinanga kumusolomoka ne. (Mateo 11:28-30) Bino byalengejile bantu kwiya ko aji. Yesu waikalanga na lusekelo inge bantu basangalala kabiji waikalanga na bulanda inge bantu baji na bulanda. (Luka 10:17, 21; Yoano 11:32-35) Inge ke mutange nangwa kuteleka ku mashimikila a kwa Yesu aji mu Baibolo, taiko muchima ne kumonanga nobe ne anweba muji konka kubena kumweka bino bintu. Inge ke mulanguluke languluke pa byaubanga Yesu na bantu, mukayuka bulongo byubilo biji na Lesa kabiji mukafwenya kwipi ne Aye.

Pa kwamba pa bampofu byo bayuka bintu biji mu ntanda, nembi umo wanembele’mba: “Mpofu uyuka bintu kupichila mu bintu byapusana pusana nabiji, kukwata, kununsha, kumvwa ne bikwabotu ne kulabijila bino byonse pamo.” Ne anweba inge ke mumone bintu byalenga Lesa, kutanga byaambile Yesu pe Shanji, kulanguluka pe Yesu byo amwesheshe byubilo bya Lesa, mukayuka Yehoba byo aji kabiji mukamuketekela.

Yoba naye wapichilemo mu bintu bya uno mutundu. Patanshi waambile ‘bintu byo abujile kumvwisha.’ (Yoba 42:3) Bino panyuma ya kulanguluka pa bilengwa bya kukumya bya Lesa, Yoba waambile’mba: “Kala naumvwinetu nkuwa yenu, pakuba lelo meso ami emumona.”—Yoba 42:5.

Ne anweba byobyo mwafwainwa kuba. “Umvwe obewa wamukeba [Yehoba] ukamutana.” (1 Byambo bya Moba 28:9) Bakamonyi ba kwa Yehoba bakatemwa kwimukwasha kukeba ne kuyuka Lesa ubula kumweka.