Yehoba Lesa ukeba amba tulombenga kwi aye kimye kyonse ne kumubula bibena kwitukatazha. (Luka 18:1-7) Uteleka ku byo tumulomba mambo witutemwa. Twafwainwa kulombanga kimye kyonse kwi Shetu wa mwiulu mambo byobyo etukambizha.—Tangai Filipai 4:6.

Kechi twafwainwa kulombangatu inge tubena kukeba bukwasho ne. Lulombelo lwitukwasha kufwenya kwipi ne Lesa. (Salamo 8:3, 4) Umvwe ke tubuule Lesa biji ku muchima kimye kyonse, bulunda bwetu ne aye bukakosa.—Tangai Yakoba 4:8.

Lesa kechi ukeba kubwezhabwezhapo byambo nangwa kwingijisha byambo bya kwimwesha pa kulomba ne. Kabiji kechi twafwainwa kulondela byuba bamo amba bafwainwa kwikala nangwa kufukama pa kulomba ne. Yehoba witukambizha kumulomba kufuma panshi ya muchima. (Mateo 6:7 ) Kyakumwenako, Hana wajingako kala mu kimye kya bena Isalela walombele kwi Lesa pa lukatazho lo ajinga nalo mu kisemi. Lukatazho byo lwapwile, wasanchijile Lesa kupichila mu lulombelo lwa kufuma panshi ya muchima.—Tangai 1 Samwela 1:10, 12, 13, 26, 27; 2:1.

Ke kintu kyawama bingi kwisamba ne Lesa. Twakonsha kubuula Mulenga wetu byonse bitukatazha. Twakonsha ne kumutakaika ne kumusanchila pa bintu byo etubila. Kechi twafwainwa kulengulula jino jishuko jo tuji najo ja kulomba kwi Lesa ne.—Tangai Salamo 145:14-16.