Nasemekejilwe ne kukomena mu ka muzhi kaji mu Loma mwaikalanga bantu bayanji. Bwikalo bwakatezhe bingi. Kechi nayukile bamaama bansema ne, kabiji kechi twaumvwañananga na batata ne. Nakomejiletu mu mikwakwa ne kwimwena mwakujila.

Byo nafikizhe myaka 10, natendekele kwiba. Byo nafikizhe myaka 12, nafumine pa nzubo. Pa bimye byavula, batata baiyanga na kusenda ku ofweshi mukatampe wa bakapokola kumbwezha ku nzubo. Natobokanga bingi na bantu kabiji najinga mbanzhi kabiji wa bukaji. Byo nafikizhe myaka 14, nalekele kwikala na bansemi pa nzubo. Natendekele kwingijisha bizhima ne kululumbatu mu mikwakwa. Na mambo a kubula pa kulaala, nalaalangatu mu myotoka. Umvwe bwakya, nayanga na kukeba kuji mema akowa.

Naikele pompwe mwine kya kuba navutulanga bantu byola ne kwiba bijimo kabiji nayanga ne na kwiba mu mazubo a bantu kimye kya bufuku. Natendekele kuya nkuwa na mambo a bwivi kabiji natwelele mu jibumba ja tupondo kyandengejile kutendeka kwiba mu ma banki. Na mambo a kwikala pompwe mwine, banketekejile bingi mu jibumba ja tupondo. Kechi nashanga buta ne, kabiji nalalangatu nabo ku mitwe. Bukapondo, kwingijisha bizhima, kwiba ne kutukana byo bintu byo naubanga. Bakapokola baendangatu na kumfumpila. Bankashile mu kaleya pa bimye byavula kabiji baubangatu bankasa nafuma kabiji papitangatu kimye kicheche na bwelamo.

Juba jimo byo bankasulwile mu kaleya, nayile nakumona ba maama ba banyike. Kechi nayukile amba bano bamaama ne bankasami baikele Bakamonyi ba kwa Yehoba ne. Bañambijile  kuya na kupwila nabo kabiji naswile kuya nabo. Byo twafikile pa Nzubo ya Bufumu, ne bambijile amba nsakwikela ku kibelo pa kuba’mba mmonenga basa kutwelanga ne kulupuka. Pano bino nasendele ne buta.

Kuno kupwila kwandengejile kupimpula bwikalo bwami. Navulukile kuba’mba nafwainwa kupimpula bwikalo bwami. Bantambwijile bingi bulongo ne kungimuna na lusekelo. Ne lunotu nkivuluka Bakamonyi byo bantambwijile na lusekelo. Bano bapusene bingi na bantu bo napwanañananga nabo!

Natendekele kufunda Baibolo na Bakamonyi. Kutwajijila na kufunda kwandengejile kupimpula bwikalo bwami. Byambo biji mu Byambo bya Mana 13:20 bya kuba’mba: “Awa wenda na ba mana ukekala ke wa mana; pakuba awa wenda ne bakosama ukamona byakatazha,” byamfikile bingi pa muchima. Nayukile kuba’mba nafwainwe kuleka kupwanañana na jibumba ja tupondo. Kuba bino kechi kwapelele ne, bino Yehoba wankwashishe.

Nalekele byubilo byonse byatama. Nalekele kupepa fwanka ne kwingijisha bizhima. Natendele nsuki, kuleka kuvwala mashikiyo ne kutukana. Kyo kyajinga kimye kitanshi kutendeka kuleka kuba bino bintu mu bwikalo bwami.

Kechi natemenwe kutanga ne kufunda ne. Onkao mambo, kyankatezhe bingi kufunda Baibolo. Pano bino, kwibikako kwandengejile kutemwa Yehoba kabiji jiwi jami ja mu muchima jatendekele kunzhachisha. Javula nazhinaukanga umvwe kya kuba Yehoba wakonsha kundekelako mambo pa bubi bo naubile. Pano bino, kutanga pe Yehoba byo alekejileko mambo Mfumu Davida kwantekeneshe bingi.—2 Samwela 11:1–12:13.

Lukatazho lukwabo lo najinga nalo ke lwa kusapwila ku nzubo ku nzubo. (Mateo 28:19, 20) Nachiinanga kuba’mba kampepo nakonsha kutana muntu ye naubile byatama kala. Bino pa kupitapo kimye, nalekele kuchiina. Najinga bingi na lusekelo pa kukwasha bantu kufunda pe Shetu wa mwiulu awo witulekelako mambo.

Kufunda pe Yehoba kwapulwishe bumi bwami. Bakwetu bavula bafwa kabiji bakwabo baji mu kaleya. Pano bino amiwa nji bingi na lusekelo mu bwikalo ne kwikala na luketekelo lwa bintu byawama biji kulutwe. Nafunda kwikepesha, kukokela ne kuyuka bya kuba umvwe nazhingila. Ne kyafumamo, twikala mutende na bantu. Kabiji nasongola ne wa mukazhi wawama aye Carmen. Tukwasha bantu kufunda biji mu Baibolo kabiji kino kituletela bingi lusekelo.

Kimye kimo, Oa ne amiwa twingijila mu ma banki mwingilo wa kuwamisha kwakubula kwiba.