Yehoba Lesa walengele patanshi bamalaika bavula bingi saka akyangye kulenga bantu. (Yoba 38:4, 7) Bano bamalaika ke bilengwa bya mupashi biji bingi na bulume bingila mwingilo wa Lesa kabiji kimye kimo bebituma kutangijila ne kuzhikijila bakalume banji pano pa ntanda. (Salamo 91:10, 11) Luno bamalaika babena kukwasha bantu ba Lesa kufunda mambo awama abena kusapwila baana ba bwanga ba kwa Yesu.—Tangai Lumwekesho 14:6, 7.

Nanchi twafwainwa kulomba ku bamalaika kuba’mba betukwashe nyi? Ine. Lulombelo ke lubaji lwa mpopwelo, twafwainwa kulombatu kwi Lesa kwapwa. (Lumwekesho 19:10) Bamalaika byo baji ba mwingilo ba Lesa, balondela byo ebabuula kechi bibabuula bantu ne. Onkao mambo, twafwainwatu kulomba kwi Lesa kupichila mwi Yesu.—Tangai Salamo 103:20, 21; Mateo 26:53.

Byonkatu biji bantu, ne bamalaika nabo bebalengele na luusa lwa kwifuukwila kuba bintu, lwa kuba kyawama nangwa kyatama. Nangwa byonkabyo, bamalaika bavula basatukijile Lesa. (2 Petelo 2:4) Satana ye malaika mutanshi wasatukile; bakwabo nabo bamulondejile ne kwikala bandemona. Satana ne bandemona banji bebapangile mwiulu ne kwibataya pano pa ntanda.—Tangai Lumwekesho 12:7-9.

Kufumatu mu 1914, bubi ne bukapondo byavujilako, kumwesha kuba’mba katatakatu Lesa akafumyepo Satana ne bandemona banji. Lesa ukabwezha ntanda byonkatu byo yajinga kimye kyo eilengele.—Tangai Lumwekesho 12:12; 21:3, 4.