Natendekele kukaya makayo a kufutuzhuka ne makayo a kukosesha mubiji. Mu kuya kwa moba, nashinkwile kishimikwa mwa kufunjishisha bantu bya kukaya makayo mu muzhi wa San Leandro, California mu U.S.A, kabiji naingijilenga pamo na bantu bakaya makayo a kukosesha mubiji ne na muntu watambwile kilambu kikatampe ye batelanga’mba Mr. America. Nangwa byonkabyo, kukaya ano makayo a kukosesha mubiji kechi kwankwashishe nangwa pachechetu mu bintu byo nakebelenga ne.

Mulunda nami mo twaingijilanga byo ayukile’mba mbena kukebesha kufunda Baibolo, wanengezhe kuba’mba antwale ku muntu ye ayukile. Byo bwakile lukelo, Kamonyi wa kwa Yehoba waishile pa nzubo. Twisambile pa maola ana saka akumbula mepuzho ami onse o najinga nao kwingijisha Baibolo. Namwambijile kuba’mba abwele mabanga jonkaja juba kabiji twisambile pa bintu bya mu Baibolo kufikatu ne pakachi ka bufuku. Natemenwe bingi bintu byo nafunjile kabiji namwipwizhe umvwe kyakonsheka kuya nanji mu mwingilo juba jikwabo amba nkamone byo asapwila. Naumvwine bingi bulongo byo aingijishenga Baibolo ne byo akumbwilenga bantu mepuzho abo. Akino kyo kintu kyo nakebelenga kuba!

Ponkapo nalekele busulu bwami ne kwingijisha moba ami kwingijila pamo na uno painiya, jizhina jo batela Bakamonyi ba kwa Yehoba bengila mwingilo wa kimye kyonse. Mu May 1948, nabatizhiwe pa kushonkena kwa nkambi mu Cow Palace Arena mu muzhi wa San Francisco, California. Mu yenkawa mwaka naikele painiya.

Kabiji byo papichile moba, naambijile Bakamonyi kuya na kufwakesha bamama. Bamama baswile kufunda kabiji kechi papichile ne kimye kyabaya ne, baikele Bakamonyi ba kwa Yehoba. Nangwa kya kuba, bebakatezhenga ku kisemi kyabo, abo batwajijile kwikala ba kishinka kwi Lesa pa myaka yavula kufikatu ne byo bafwile. Kafwako mukwabo waikele Kamonyi mu kisemi kyetu ne, kanatu atweba babiji.

Mu 1950 navilukijile ku muzhi wa Grand Junction mu kyalo kya Colorado, ko nataaine Billie. Billie wasemekelwe mu 1928 kabiji wakomejile mu kimye kyakatezhe bintu ntanda yonse. Bainanji ba Minnie bamutangilanga Baibolo kimye kyonse bufuku kwingijisha lampi. Billie byo afikizhe myaka ina, wayukile kutanga ne kulabijila mashimikila avula a mu Baibolo. Ku mpelo ya 1940, bainanji byo bafunjilenga Baibolo na Bakamonyi bayukile’mba helo kechi mpunzha ya kukabishishamo bantu ne, bino ke kilende kya bantu bonse. (Musapwishi 9:5, 10) Ba Minnie ne bamwatawabo baikele Bakamonyi.

Mu 1949, Billie wafumine ku sukulu mu Boston ne kutendeka kufunda Baibolo. Aye kechi waikele mufunjishi ne, wafuukwilepo kwipana kwingijila Lesa. Wabatizhiwe  mu 1950 pa Kukonkana kwa byalo kwa Bakamonyi ba kwa Yehoba kwaikejile mu Kibanza kya Yankee mu New York. Kechi papichile kimye kyabaya kufuma po twitaaine ne, twisongwele ne kutendeka mwingilo wa kimye kyonse.

Twatendekele kwikala mu Eugene, Oregon kabiji twaikele na balunda bavula bingi. Mu 1953 twavilukijile mu muzhi wa Grants Pass, mu kyalo kya Oregon kuba’mba tukwashe kipwilo kicheche kyajingamo. Mu yenkawa mwaka, betwichile kutanwa ku sukulu wa Gileada wa nambala 23 wa Bakamonyi ufunjisha bamishonale, waikejile kwipi na muzhi wa South Lansing mu New York, pajinga makilomita 400 ku muzhika buyeke bwa muzhi wa New York.

Mu December 1954, saka papita bañondo batanu kufuma po twafumijile ku sukulu wa Gileada, amiwa ne Billie twatumbukile na kabotolo kuya ku Brazil. Byo twaendeleko jiola jimo mwiulu, injini imo ya ndeke yazhimine, bino twaikijile mu muzhi wa Bermuda kwa kubula kwikozha. Kabiji twaikijile jikwabo mu Cuba na mambo a lukatazho lwa ndeke, kabiji byo twaendele lwendo lwalepa maola 36 saka twakooka, twafikile ku ofweshi wa musampi wa Bakamonyi ba kwa Yehoba mu muzhi wa Rio de Janeiro, Brazil.

Byo twakookolokeleko pacheche, amiwa ne Billie ne bamishonale bakwabo babiji twayile ku muzhi wa Bauru, mu São Paulo na kushinkula nzubo ya bamishonale ya katataka. Uno muzhi mwajinga bantu kukila pa 50,000, kabiji yetu twajinga Bakamonyi batanshi mu uno muzhi.

Twatendekele kusapwila bantu ku mazubo abo, pano bino pulishiti wa ba Katolika wa ku ino mpunzha watendekele kukanya mwingilo wetu. Witulondejilenga ne kukanya bantu kuteleka. Nangwa byonkabyo, mu milungutu icheche, kisemi kikatampe kyo twafunjishanga kyafunjile bukine bwa mu Baibolo, kabiji kechi papichile kimye kyabaya ne, babatizhiwe. Mu kimyetu kicheche, bakwabo nabo batendekele kufunda.

Ba mu kino kisemi kya batizhiwe, bajinga ne na mulongo wabo wajinga mukulumpe wa pa mpunzha yayile nkuwa po baubilanga makayo. Nanengezhe kuba’mba bengijishepo kishimikwa kimo pa ino mpunzha kubuñenapo. Pulishiti byo akainye kuba’mba babule kwingijisha kishimikwa, mukulumpe wa kino kishimikwa wasambakene na bantu banji ba mwingilo ne kwibabuula’mba: “Inge mukanye, nsakuleka nkito!” Betuswishishe kuba’mba tubuñenepo.

Mu mwaka walondejilepo mu 1956, betwichile kutanwa ku kushonkena kwa nkambi mu muzhi wa Santos, mu São Paulo. Bakamonyi kukila pa 40 kufuma mu kipwilo kyetu bayile na shitima. Byo twabwelele ku Bauru, nataaine nkalata mu nzubo ya kuntongola kwikala kalama wenda wa kufwakesha bipwilo bya Bakamonyi ba kwa Yehoba. Byonkabyo, twatendekele uno mwingilo ye twaingijile pa myaka 25 mu Brazil saka twenda mu mapunzha avula a mu kino kyalo kyabaya.

Mu oa moba kyakatezhe bingi kwenda. Twaendelenga kyalo kyonse kwingijisha, masakya, mashitima, bikochikala, makinga kuvwangakotu ne kwenda panshi. Muzhi mutanshi ye twafwakashijile wajinga Jaú, mu São Paulo. Mu uno muzhi pulishiti witukatezhe bingi.

Witwambijile’mba, “Kange musapwilenga ‘mikooko yami’ ne!”

Twamukumbwile’mba, “Kechi yobe ne, ya kwa Lesa.”

Twanengezhe kutambisha bantu filimu waambilenga pa mwingilo wetu wa kusapwila ntanda yonse, wajinga na mutwe wa kuba’mba The New World Society in Action, nangwa byonkabyo, uno pulishiti wanengezhe jibumba kuba’mba jitulukuke. Twabuujile bakapokola. Uno pulishiti ne jibumba janji byo baishile, bataaine jibumba ja bakapokola saka bebatazha mata. Bantu bavula baumvwine bingi bulongo kutamba uno filimu.

 Betushikwanga ne kwitwimena kuntundwa ku bupopweshi mu mapunzha onse mo twayanga. Mu muzhi wa Brusque wajinga kwipi na Blumenau mu Santa Catarina, twataainemo bapainiya babiji bo bamanyikilenga bingi na mambo a mwingilo wabo. Bino na mambo a kuchinchika kwabo ne kukosa mwafumine bintu byawama bingi. Byo papita myaka 50, mu ino mpunzha muji bipwilo kukila pa 60 ne Nzubo ya Kubuñenamo yawama iji kwipi na muzhi wa Itajaí!

Bintu byawama byo tuvuluka mu mwingilo wetu wa kwenda ke kimye kyabaya kyo twaingijilanga pamo na bakwetu Bakamonyi kunengezha kushonkena kukatampe. Mu ma 1970, bantongwele kwikala kalama wa kushonkena kwa nkambi mu Kibanza kikatampe kya Morumbi. Banembejile bipwilo byavula byajinga pepi kuba’mba kipwilo kimo kimo kitume bantu jikumi ba kuwamisha kibanza bufuku juba ja kushonkena saka jikyangye kufika.

Bapama mpila byo bafumine mu kibanza bufuku, bamo batendekele kwamba mukeyu amba, “Akimonai tuno twana tukazhi tonse na bipyango ne bya kukolopelako byato.” Bonkabwa bufuku bapwishishe kuwamisha kibanza kyonse. Watalanga pa kino kibanza waambile’mba, “Uno mwingilo ye mwaingila anweba Bakamonyi mu maola achechetu, bantu bami inge bamwingijile mulungu umo!”

Batata bafwile mu 1980, kabiji byo papichile kimye kicheche twabwelele ku United States na kulama bamama mu muzhi wa Fremont, mu California. Twatwelele mwingilo wa kuwamisha bishimikwa bufuku kabiji twatwajijile na bupainiya bwetu ne kukwasha bantu bamba mulaka wa Kipotogizi mu ino mpunzha. Pa kupitapo myaka, twavilukijile kwipi na mpunzha ya San Joaquin Valley, ko twakebelenga bantu bamba mulaka wa Kipotogizi kufuma ku Sacramento kukafika ku Bakersfield. Luno mu California muji bipwilo jikumi byamba mulaka wa Kipotogizi.

Bamama byo bafwile mu 1995, twayile ku kyalo kya Florida na kulama bashanji Billie kufikatu ne kimye kyo bafwile. Bainanji bo bajinga batanshi kufwa mu 1975. Mu 2000 twayile ku kyalo kuji biselebwa ku kabeta ka ku bulenge muzhika ku Colorado kabiji twaingijile mu ino mpunzha mwingilo wa kimye kyonse wa kusapwila ku bena America bamba mulaka wa Navajo ne Ute bekala mu yoya mpunzha. Kyatamakotu, Billie wafwile mu February 2014.

Nji bingi na lusekelo kuba’mba myaka 65 yapitapo, nasambakene Kamonyi wa kwa Yehoba wakumbwile mepuzho ami onse kwingijisha Baibolo! Natemwa bingi kuba’mba nakebele kebele ne kushiinwa’mba bintu byonse byo aambilenga byafuminenga mu Baibolo. Kino kyandengela kwingila mwingilo wawama wa kwingijila Lesa.