MYAKA yapitapo, bije byatalanga pa bambanzhi mu kyalo kya bazungu byaswile kuba’mba balubankenye pa kuzhachisha banabalume babiji bo baambile’mba baipayañene ne kwibachibila mambo amba bafwainwa kufwa. Bishinka byo byayukanyikilwe, bashabyambo baingijile papelela bulume bwabo ne kukasululapo umo ye bakashile. Bino bashabyambo bayukisha kuchiba mambo kafwako kyo bafwainwe kuba pa yewa mukwabo, mambo pa kyokya kimye wajinga saka bamwipaya kala.

Byo kiji kuba’mba makochi akonsha kuchibila mambo mungi, Baibolo waamba’mba: “Bololoke bo bonka bo mwafwainwa kulonda.” (Mpitulukilo ya mu mizhilo 16:20) Umvwe banchibamambo balondela uno muzhilo, bangikazhi bamwenamo bingi. Mizhilo ya Lesa yalengejile bena Isalela kuchiba mambo monka mo aolokela kwa kubula misalululo. Twayai twisambe pa uno Muzhilo tuyuke umvwe “mashinda a [Lesa] onse o aoloka.”—Mpitulukilo ya mu mizhilo 32:4.

Bintu byakonsha kuwaminatu bantu umvwe banchibamambo saka bachiba mambo monka mo aolokela kwa kubula misalululo ne kubula kutambula mazhikakanwa. Mizhilo Lesa yo apele bena Isalela yalengejile banchibamambo kuchiba mambo monka mo kyayila. Byo bajinga mu kiselebwa, Mosesa bamwambijile kusala ‘banabalume ba munkonsha, bonka bakamwa Lesa, bantu ba kishinka bashikwa mazhikakanwa’ kwikala banchibamambo. (Kulupuka 18:21, 22) Byo papichile myaka 40, waambile jibiji kuba’mba bafwainwa kusala ‘bantu baji na maana ne milangwe kabiji bayukanyikwa’ ba kuchibila bantu mambo.—Mpitulukilo ya mu mizhilo 1:13-17.

Byo papichile myaka yavula, Yehoshafwata * Mfumu wa Yuda wakambizhe banchibamambo amba: “Kasa mulanguluka byo muba; mambo kije kyo muchiba kechi kyo kya muntu ne, kyo kya Yehoba; aye muji nanji pa kuchiba mambo. Pano nanchi mwikalenga na moyo wa kumwakamwa Yehoba; jimukai byo muba, mambo Yehoba Lesa wetu kechi uvulañanya mambo ne, nangwa kutala ku bilungi bya bantu ne, nangwa kutambula mazhikakanwa ne.” (2 Byambo bya Moba 19:6, 7) Onkao mambo, mfumu wavulwilemo banchibamambo kuba’mba umvwe kebachibile bantu mambo na misalululo ne na mazhikakanwa, Lesa ukebazhachisha pa bintu byonse byatama bikafumamo.

Banchibamambo ba bena Isalela byo balondelanga uno muzhilo, bisaka bya bantu byazhikijilwanga ne kwikala bulongo. Bino mu Mizhilo ya Lesa mwajinga ne mafunde akwashanga bamitonyi kufuukula bintu bulongo nangwatu mu bintu byakatazha. Ano mafunde amo o epi?

Nangwa kya kuba banchibamambo bo basalanga bajinga na maana kabiji bafikijilemo bulongo, kechi bebakambizhe kuchibila bantu mambo kwingijisha bulume bwabo nangwa maana abo ne. Yehoba Lesa wibapele mafunde nangwa mizhilo ya kulondela pa kuchiba mambo bulongo. Banchibamambo ba bena Isalela bebapele ino mizhilo.

Pesapesaipo Bulongo. Lesa waambijile Mosesa kubuula bamitonyi ba bena Isalela amba: “Mwibomvwe bakwenu mambo abo, mwiachibile monka mo aolokela.” (Mpitulukilo ya mu mizhilo 1:16) Bamitonyi  bakonshatu kuchiba mambo bulongo umvwe baji na bishinka byonse pa oo mambo. Onkao mambo, Lesa wakambizhe boba bachibila bantu mambo amba: “Mukepuzhe ne kukebesha ne kupalanguzha bulongo.” Banchibamambo ba mu kochi bebakambizhe’mba pa kuchibila mbanzhi mambo, bafwainwe kumona’mba bintu byo bachiba ‘bya kine.’—Mpitulukilo ya mu mizhilo 13:14; 17:4.

Umvwai bishinka byaamba bakamonyi. Pa kukebakeba bishinka, kyakebewanga bingi kumvwa ku bakamonyi. Mizhilo ya Lesa yakambizhe’mba: “Kechi mukamufwishe nao muntu na jiwi ja kamonyi umotu ne, nangwa na mambo a byepi o alenga, nangwa na kintu kyatama kya byepi kyo auba, kana na mawi a bakamonyi babiji nangwa basatu.” (Mpitulukilo ya mu mizhilo 19:15) Kabiji Mizhilo ya Lesa yakambizhe bakamonyi amba: “Kukumbanya bya bubela ne. Kukwatankana pamo na muntu mubi mu kwikala ke kamonyi wa nshiji ne.”—Kulupuka 23:1.

Mu kochi mukebewa kwamba kishinka. Muntu inge waamba bubela mu kochi bamukambulanga, kabiji kino kyavululangamo bonse byambo bya kuba’mba: “Bachibamambo bakashikishe na mukoyo, kabiji umvwe awa waleta ano mambo ye wa bubela, wamubepelatu mukwabo, ponkapo mukamube byonka byo asakile kumuba mukwabo. Pa kuba byobyo mukebufumya abwa bubi mukachi kenu.” (Mpitulukilo ya mu mizhilo 19:18, 19) Onkao mambo, umvwe muntu wabepa mu kochi kuba’mba asende bintu bya mukwabo, bamuzhachishanga ne kumwambila kupana bintu byonka byo akebanga’mba mukwabo amupe. Umvwe wabepela mukwabo amba bamwipaye ye ayukile’mba mambo ufwao, naye bafwainwe kumwipaya. Uno muzhilo wibalengelanga kwamba kine.

Chibainga mambo kwa kubula misalululo. Bamitonyi bachibanga mambo umvwe bayuka bishinka byonse bya oo mambo. Pa kikye kimye, Mizhilo ya Lesa yanemene bingi ya kuba’mba: ‘Kange mukatale ku buyanji  bwa muntu ne, nangwa ku buneme bwa muntu ne; pakuba monka mu bololoke mo mo mukamuchibila mambo mukwenu.’ (Bena Levi 19:15) Onkao mambo, bamitonyi pa kuchiba mambo, beachibanga kwesakana na bishinka, kechi batalanga ku byamwekanga muntu nangwa kifulo kyo ajinga nakyo ne.

Ano mafunde o balumbulwile bulongo myaka ya kala mu Mizhilo ya Lesa yo apele bena Isalela, akonsha kwingila mu makochi ne lelo jino. Umvwe banchibamambo bealondela, kechi bakonsha kuchibila mambo mungi ne.

Mosesa waipwizhe bena Isalela amba: “Uji pi mukoka mukwabo wa bantu baji na malamuna ne byatongolwa byaoloka biji ino mizhilo yonse yo nemwambila anweba lelo jino?” (Mpitulukilo ya mu mizhilo 4:8) Kwambatu kine, kafwako mukoka mukwabo wamwenejilemo ne. Mu bukalama bwa Mfumu Solomone wakebanga kulondela mizhilo ya Yehoba kufumatu ku bwanyike bwanji, bantu “baikajiletu bulongo mu mutende” kabiji “bajilenga ne kutoma, ne kusangalala basangalelenga.”—1 Bamfumu 4:20, 25.

Nangwa byonkabyo, bena Isalela balengulwile Mizhilo ya Lesa wabo. Lesa waambijile mwi ngauzhi Yelemiya amba: ‘Talai byo bakana byambo bya Yehoba nanchi ñanyi maana o baji nao?’ (Yelemiya 8:9) Kyafuminemo ke kya kuba’mba Yelusalema waikele ke “muzhi wa mashi” wayujile “byubilo bya bunya.” Kyapeleleko uno muzhi bamonawine ne kumushatu masala myaka 70.—Ezikyo 22:2; Yelemiya 25:11.

Ngauzhi Isaya waikele mu bimye bya makatazho kimye kya bena Isalela. Bintu byo apichilemo byamulengejile kwamba bukine pe Yehoba Lesa ne Mizhilo yanji amba: “Buchibamambo bwenu byo bumweka pano panshi aba bekala pano pa ntanda bafunda bya bololoke.”—Isaya 26:9.

Na lusekelo, Isaya bamutangijile ku mupashi wazhila kwaula pa bukalama bwa Mfumu wa Bumesiasa, Yesu Kilishitu amba: “Kechi ukapwishisha mambo monka mwayila kumona kwa meso anji ne, nangwa kwiachibila monka mwayila kumvwa kwa matwi anji ne; pakuba ukebachibila bayanji mambo abo monka mo aolokela, ne bakajilwa ba pano pa ntanda.” (Isaya 11:3, 4) Bino byo bintu byawama bibena kupembelela bangikazhi ba Mfumu wa Bumesiasa mu Bufumu bwa Lesa!—Mateo 6:10.