Byo mwatangilenga mitwe yafumako, mwamwene kuba’mba Bakamonyi ba kwa Yehoba banemeka bingi Bufumu bwa Lesa. Kampe mwaumvwine bingi bulongo pa kutanga pa mapesho a Bufumu bwa Lesa aji kulutwe. Pano bino, mwakonsha kuzhinauka inge ino milaye ya kine.

Kechi mwafwainwa kuketekela mu bintu byonse byo mumvwa ne. (Byambo bya Mana 14:15) Kubula kuketekela byonse byo mumvwa twakonsha kwikwesakanya na byaubile bena Beliya. * Byo baumvwinetu mambo awama a Bufumu, bena Beliya baitabijile, pano bino kechi bashiinwe kuba’mba byajinga bya kine ne. Bapesele pesele mu Binembelo amba bamone “kana bino bintu bya kine nangwa ne.” (Byubilo 17:11) Bena Beliya baesakenyenga mambo awama o baumvwine na byaambile Binembelo. Pa kupitapo kimye, bashiinwe kuba’mba mambo awama ajinga a kine kabiji afumine mu Mambo a Lesa.

Bakamonyi ba kwa Yehoba nabo bakeba amba mubenga byonka byaubile bena Beliya. Kupichila mu kufunda Baibolo kyatutu ne atweba, mukesakanya byaitabilamo Bakamonyi ba kwa Yehoba pa Bufumu bwa Lesa na bifunjisha Baibolo.

Kununga pa byo mukafunda pa Bufumu bwa Lesa, kufunda Baibolo kukemukwasha kutana mikumbu ku mepuzho anema mu bwikalo.

•   Twafumine pi?

• Nanchi nkebelo ya bumi yo yepi?

• Mambo ka Lesa o aswishisha buyanji?

• Ki ka kyubiwa inge muntu wafwa?

• Nanchi ntanda bakeyonauna nyi?

• Ñanyi kintu kilengela kisemi kwikala kya lusekelo?

Kyanema ke kya kuba’mba kufunda Baibolo kukemukwasha ‘kufwenya kwipi ne Lesa.’ (Yakoba 4:8) Inge mwafwenya kwipi ne Lesa, popo mukayuka bintu byawama bikemubila Bufumu bwa Lesa pa kino kimye ne kulutwe. Yesu byo alombelenga kwi Shanji waambile’mba: “Pa kuba amba bakekale na bumi bwa myaka, bafwainwa kwimuyuka anweba Lesa yenka wakine ne Yesu Kilishitu ye mwatumine.”—Yoano 17:3.