Byo najinga mwanyike, kisemi kyetu kyaikalanga kwipi na Leipzig, East Germany, kechi kwalepeshetu na kyalo kya Czech ne ku ñinza na byalo biji kwipi na Poland ne. Byo najinga na myaka 6, kisemi kyetu kyavilukijile ku Brazil kabiji panyuma twavilukijile ku Ecuador kwataine batata nkito.

Byo najinga na myaka 14, batumine ku sukulu ku Germany. Na mambo a kuba bansemi bashajile ku South America, natendekele kwimwena. Kechi nayukile bantu byo bamonanga byubilo byami ne.

Byo nafikizhe myaka 17, bansemi babwelele ku Germany. Patanshi twaikalanga bonse. Na mambo a kukeba kwiikajila, nakankelwe kulondela byaambanga bansemi. Byo nafikizhe myaka 18, nafuminepo pa nzubo.

Kechi naikalanga panshi ne, na mambo a kukeba bya kuba mu bwikalo. Byo naikajile na bantu bapusana pusana, nalangulukile kuba’mba kintu kyawama kyo nafwainwa kubatu mu bwikalo bwami ke kupitañana mwaya ntanda bantu saka bakyangye kwiyonauna.

Byo napotele kapulututu, nafumine mu Germany ne kuya ku Africa. Kapulututu kami inge kafwa, nabwelanga ku Europe pa kuba’mba bakalungishe. Nayile ku kitulu kiji ku Portugal. Nafuukwilepo kusha kapulututu ne kutendeka kwingijisha bwato.

Nasambakene na banyike banengezhenga lwendo lwa kwabuka Kalunga ka Atlantic. Pa bano po namwene ne nsongwakazhi aye Laurie, ye nakebelenga kusongola. Patanshi, twayile ku jikuji ja Caribbean. Byo twaikajileko pacheche ku Puerto Rico, twabwelele ku Europe. Twalangulukilenga kuba’mba tukatanako bwato bo twakonsha kwalula ke mwa kwikala. Panyuma ya kukeba buno bwato pa bañondo basatu, kwaishile bikwabo byalengejile kwikileka kukeba. Bangichile kuya na kutwela nkito ku bashilikale ba ku Germany.

Naingijileko pa bañondo 15 mu bushilikale. Pa kyonkakya kimye, nasongwele Laurie ne kutwajijila bwikalo bwa kwendauka. Nsaka kyangye kutendeka nkito ya bushilikale, twapotele  bwato. Byo naingijilenga bushilikale, twawamishe buno bwato ne kwi bulenga ke nzubo mwa kwikala. Twalangulukilenga kwikalanga mu buno bwato pa kuba’mba tukapitañanenga mwaya ntanda. Byo nalekele bushilikale, bino saka tukyangye kupwisha kuwamisha bwato ne, twasambakene na Bakamonyi ba kwa Yehoba ne kutendeka kufunda nabo Baibolo.

Kimye kitanshitu, kechi nayukile kyo nafwainwa kupimpwila byubilo byami ne. Nasongwele mwanamukazhi ye naikalanga nanji, kabiji nalekele ne kupepa fwanka. (Efisesa 5:5) Nalangulukilenga namba kuya na kupitañana mwaya ntanda na kumona bilengwa na Lesa kyajinga kintu kyanema bingi kyo twafwainwe kuba.

Kwambatu kine, nakebelenga kupimpula byubilo byami. Na mambo a kwikala wa bwitote ne kwiketekela, nateletu muchima ku bintu byo naubilenga. Nakebangatu kwiubila bintu.

Juba jimo, natangile pa Jashi ja pa Mutumba ja kwa Yesu jaya nkuwa. (Mateo, bitango 5-7) Kimye kitanshitu, kechi naumvwishishe mwatazhizhe Yesu pa kwikala wa lusekelo ne. Nabiji byo aambile amba bantu baji na nzala ne kilaka bo bekala na lusekelo. (Mateo 5:6) Nalangulukilenga kuba’mba muntu uji na nzala wakonsha kwikala byepi na lusekelo? Pa kutwajijila kufunda, nayukile kuba’mba bonse tukeba kufunda pe Lesa kabiji twafwainwa kwitaba amba tukeba saka tukyangye ne kutendeka kufunda. Kijitu nobe Yesu waambilenga amba: “Bo bene balusekelo baji na muchima wa kukeba kuyuka Lesa.”—Mateo 5:3.

Byo twatendekele kufunda Baibolo mu Germany, Laurie ne amiwa twavilukijile ku France, kabiji pakupitapo kimye twavilukijile ku Italy. Konse ko twavilukijilenga, twatainengako Bakamonyi ba kwa Yehoba. Butemwe ne kukwatankana kwajinga pakachi kabo kwamfikile bingi pa muchima. Nayukile kuba’mba Bakamonyi kine bakwatankana ntanda yonse. (Yoano 13:34, 35) Pa kupitapo kimye, Laurie ne Amiwa twabatizhiwe ne kwikala ke Bakamonyi ba kwa Yehoba.

Byo nabatizhiwetu, natwajijile kupimpula byubilo byami. Laurie ne amiwa twafukwilepo kuya na bwato ku mukuzho wa Africa ne kukilañanya Kalunga ka Atlantic kukafika ku United States. Byo twajingatu bubiji bwetu pa Kalunga, popo nayukile kuba’mba kafwako byo nji pa kwiesakanya na Mulenga wetu ne. Na mambo a kuba’mba najinga na kimye kyabaya, natendekele kutanga Baibolo. Mashimikila a bwikalo bwa kwa Yesu byo ajinga pano pa ntanda afikile bingi pa muchima. Wajinga muntu walumbuluka kabiji kafwako wakonsha kuba bintu byo aubanga ne, bino kechi witumbijikanga mwine ne. Watumbijikangatu Shanji wa mwiulu.

Byo nalangulukilenga pa kya kumwenako kya kwa Yesu, namwene kuba’mba nafwainwa kutangizhako Bufumu bwa Lesa patanshi kukila bintu byo nakebelenga kuba mu bwikalo bwami. (Mateo 6:33) Laurie ne Amiwa byo twafikile ku United States, twafuukwilepo kuleka kwendauka ne kuta muchima pa kupopwela Lesa.

Byo neubilangatu bintu amiwa mwine kala, kechi nafukulanga bulongo ne. Luno, natana kufuma maana awama a kutangijila mu bwikalo bwami. (Isaya 48:17, 18) Kabiji nayuka ne byo nabujile kuyuka mu bwikalo bwami, ko kuba’mba kupopwela Lesa ne kukwasha bantu ku muyuka.

Laurie ne Amiwa twamwenamo bingi mu kulondela mafunde a mu Baibolo mambo masongola etu akoselako bingi. Twapeshiwa bingi pa kwikala na mwana wamukazhi kabiji naye watemwa Yehoba.

Bwikalo bwetu bwajinga bwa makatazho. Yehoba witukwasha kutwajijila kumuketekela.—Byambo bya Mana 3:5, 6.