Byonka byaamba kibaaba kyafumako, Yesu watele muchima pa ‘kusapwila mambo awama a Bufumu bwa Lesa.’ (Luka 8:1) Waendanga misinso yalepa mu Isalela na kufunjisha bantu pa Bufumu bwa Lesa. Mwingilo wa kwa Yesu wanembwa mu mabuku ana a Mambo Awama muji byambo byaamba pa Bufumu kukila pa bimye 100. Bino byambo biji mu byaambile Yesu kabiji byanembwa byo bichechetu pa byo aambile pa Bufumu bwa Lesa!—Yoano 21:25.

Mambo ka Bufumu kyo bwanemejile kwi Yesu byo ajinga pano pa ntanda? Mambo wayukile amba Lesa wamusajile kwikala Kalama wa buno Bufumu. (Isaya 9:6; Luka 22:28-30) Bino Yesu kechi wakebelenga lukumo ne kwilengela jizhina ne. (Mateo 11:29; Mako 10:17, 18) Kechi watundaikilenga Bufumu pa kuba’mba akamwenemo aye mwine ne. Yesu watundaikilenga Bufumu bwa Lesa * na mambo a bintu byawama byo bukobila bantu bo atemwa Shanji wa mwiulu ne baana banji ba bwanga bakishinka.

Yesu watemwa bingi Shanji wa mwiulu. (Byambo bya Mana 8:30; Yoano 14:31) Watemwa byubilo byawama biji na Shanji nabiji butemwe, lusa ne bunchibamambo bwaoloka. (Mpitulukilo ya mu mizhilo 32:4; Isaya 49:15; 1 Yoano 4:8) Na mambo a bino, Yesu kimukola bingi ku muchima pa bubela bwamba bantu pe Shanji nabiji bwa kuba’mba Lesa kechi wata muchima ku buyanji bwa bantu ne, kabiji amba ukeba amba tuyandenga. Bino byo byalengejile Yesu ‘kusapwila mambo awama a Bufumu.’ Wayukile amba Bufumu bukafumyapo mwenga pe Shanji. (Mateo 4:23; 6:9, 10) Bukoba byepi kino?

Yehoba ukengijisha Bufumu kuleta bintu byawama ku bantu. “Ukebashimuna mipolo yonse” bantu bakishinka. Yehoba ukafumyapo byonse bilengela mipolo ne kumona kuba’mba “lufu, mabingo, kujila nangwa misongo kechi bikekalako jibiji ne.” (Lumwekesho 21:3, 4) Lesa ukengijisha Bufumu kufumyapo buyanji bonse. *

Kino kyo kyalengejile Yesu kusapwila ku bantu  pa Bufumu! Wayukile amba bukakwasha bantu kuyuka bulume ne lusa biji na Shanji. (Yakoba 5:11) Kabiji Yesu wayukile amba Bufumu bukobila bintu byawama bantu bakishinka boatemwa.

Yesu saka akyangye kwiya pano pa ntanda, waikalanga mwiulu na Shanji. Shanji waingijishe Mwananji kulenga bintu byonse nabiji jiulu, tubangabanga, myela yanshansha, ntanda ne banyama. (Kolose 1:15, 16) Pano bino, Yesu ‘wasekejile’ bingi mu bantu kukila byonse.—Byambo bya Mana 8:31.

Kutemwa bantu ko kwalengelanga Yesu kusapwila. Byo aishiletu pano pa ntanda, waambile’mba naiya amba “nsapwile mambo awama” ku bakajilwa. (Luka 4:18) Yesu kechi waambilengatu ne, bino wakwashishenga ne bantu. Waubijile bantu byavula byamwesheshenga amba wibatemwa. Kya kumwenako, jibumba jikatampe ja bantu byo jakonkene na kuteleka ku byoaambilenga, “wibobijile lusa, ne kubuka wabukile bakolwa babo bonse.” (Mateo 14:14) Mwanamulume umo wajinga na kikola kikatampe byo aketekejile amba Yesu wakonsha kumubuka, Yesu wamubijile lusa. Wamubukile ne kumwambila’mba: “Naswa. Bukwa.” (Luka 5:12, 13) Yesu byo amwene mulunda nanji Maliya saka ajila mulongo wanji aye Lazalasa, “waumvwine bingi bulanda,” “kabiji kyamukolele bingi ku muchima” ne ‘kujila mipolo.’ (Yoano 11:32-36) Panyuma ya bino, Yesu waubile kya kukumya. Wasangwile Lazalasa wafwile saka papita ne moba ana!—Yoano 11:38-44.

Yesu wayukile kuba’mba bintu byo aubile byajingatu bya pa kakimye kacheche. Wayukile amba bantu bonse bo abukile bakabeela jikwabo kabiji ne bo asangwile amba bakafwa. Pano bino, Yesu wayukile kuba’mba Bufumu bwa Lesa bukapwisha ano makatazho kikupu. O ene mambo Yesu o abujilangatu kuba bya kukumya, bino wasapwilanga na mukoyo “mambo awama a Bufumu.” (Mateo 9:35) Bya kukumya byo aubile byamwesheshekotu pacheche bintu bikoba Bufumu bwa Lesa pano pa ntanda katataka. Monai Baibolo byo aamba pa bintu bikoba Bufumu.

•  Kechi kukekala kukolwa jibiji ne.

  “Ponkapo meso a bampofu akalaba, ne matwi a bashinka matwi akashinkuka. Kabiji ne yewa walemana kulu ukakilauka nobe lupala, ne kamama ukembanga na lusekelo.” Kabiji “kafwako nangwa umo wikala mu yewa muzhi ukamba’mba: Nakolwa, ne.”—Isaya 33:24; 35:5,  6.

• Lufu kechi lukekalako jibiji ne.

  “Baoloka bakaswana ntanda, Ne kwikalamo myaka ne myaka.”—Salamo 37:29.

  “Yehoba ukamina lufu kya kuba’mba kechi lukekalapo jibiji ne, kabiji ukashimuna mipolo ku meso a bantu bonse.”—Isaya 25:8.

• Bafu bakasangulwa.

  ‘Aba bonse baji mu bilende bakomvwa jiwi janji ne kufumamo.’—Yoano 5:28, 29.

  “Kukekala lusanguko.”—Byubilo 24:15.

• Bonse bakekala na mazubo ne nkito.

  “Kabiji bakashimika mazubo abo ne kwikalamo; kabiji bakajimba majimi abo a miñanzañanza, ne kuja bipangwa byabyo, Kechi bakashimika mazubo mwaikala ungi ne; kabiji kechi bakajimba miñanzañanza, ne ungi waja bipangwa byayo ne. . . . Bantu bami basalululwa bakamwenamo lusekelo myaka ne myaka mu mingilo ya maboko abo.”—Isaya 65:21, 22.

•  Kechi kukekala nkondo jibiji ne.

  “Aye upwisha makondo ne kwapela ntanda.”—Salamo 46:9.

  “Mukoka umo kechi ukasumbwila mpoko mukoka mukwabo ne, kabiji kechi bakafundanga bya kulwa nkondo jibiji ne.”—Isaya 2:4.

• Kechi kukekala bipowe bya nzala jibiji ne.

  “Ntanda yapanga kala bipangwa byayo: Ne aye Lesa, yenkaye Lesa wetu, uketubila bibusa.”—Salamo 67:6.

  “Kukekalanga kuvula bingi kwa kajo panopantanda peulu ya mitumba.” —Salamo 72:16.

• Kechi kukekala buyanji jibiji ne.

  “Mambo wakajilwa kechi ukavulamwa moba onse ne.”—Salamo 9:18.

  “Mambo aye ukamupokolola wakajilwa pa kujila, Ne aye mulanda wabulwa ne wa kumukwasha. Ukebobila lusa bayanji ne bakajilwa, Ne myeo ya bakajilwa ukeipulusha.”—Salamo 72:12, 13.

Umvwe kya kuba mwalanguluka pa ino milaye yaamba pa Bufumu bwa Lesa, nanchi mwamona Bufumu kyo bwanemena kwi Yesu nyi? Byo ajinga pano pa ntanda, wakebeshanga bingi kwamba pa Bufumu bwa Lesa ku yense wakonsha kuteleka. Wayukile amba Bufumu bukapwisha makatazho onse abena kupitamo bantu lelo jino.

Nanchi mwatemwa milaye yaamba pa Bufumu iji mu Baibolo nyi? Inge mwiitemwa, mwakonsha kufunjilapo byepi bikwabo pa buno Bufumu? Kabiji mwakonsha kuba byepi pa kuba’mba mukamwenemo mu ano mapesho? Kibaaba kyapelako mu uno mutwe kisa kukumbula ano mepuzho.