Kyapela bingi kulanguluka kuba’mba Satana ye tutanga mu Baibolo ye wa kuyukilako kuba’mba kuji bubi. Nanchi bino byo bifunjisha Baibolo nyi? Inge byobyo ifunjisha, mambo ka o yaambila amba Satana waambilenga ne Yesu Kilishitu pamo na Lesa wa Bulume Bonse? Akimonai byajinga ino misambo pa bimye bibiji.

Yesu byo atendekele mwingilo wa kusapwila, Diabola wamwesekele pa bimye bisatu. Patanshi, Satana wamwambijile Yesu kwingijisha bulume bwamupele Lesa kuba’mba alenge kajo mu jishinda jabula kufwainwa ne. Kabiji Diabola waambijile Yesu kubika bumi bwanji mu kizumba. Kyapeleleko, Satana waambijile Yesu amba ukamupa bufumu bwa pano pa ntanda ponse inge wamufukaminakotu pacheche. Yesu wakaine meseko onse asatu kabiji waingijishe byanembwa bya mu Binembelo pa kukumbula.—Mateo 4:1-11; Luka 4:1-13.

Nanchi Yesu wisambilenga ne ñanyi? Nanchi wisambilenga na bubi bwajinga mwi aye nyi? Binembelo byaamba pe Yesu kuba’mba “mambo meseko onse o tupitamo naye wapichilemo, bino aye kechi walengelepo mambo ne.” (Bahebelu 4:15) Baibolo waamba’mba: “Aye kechi walengelepo mambo ne, kabiji mu kanwa kanji kechi mwalupukilepo byambo bya bujimbijimbi ne.” (1 Petelo 2:22) Yesu watwajijile kwikala wa kishinka kabiji walumbuluka. Kechi waswishishe bubi buji bonse kwikala mwi aye ne. Kya kine Yesu kechi waambilenga na bubi bwajinga mukachi kanji ne, bino waambilenga ku muntu wakine.

Mwisambo umotu umwesha kuba’mba kya kine Satana koaji.

• Vulukai kuba’mba Diabola byo akebele kumupopwelako pacheche kwi Yesu, wamupelenga bufumu bwa pano pa ntanda ponse. (Mateo 4:8, 9) Umvwe Satana kechi wajingako ne, ko kuba’mba buno bufumu inge bwajinga bwatu. Kabiji Yesu kechi wazhinaukile Satana byo aambile amba uji na bulume pa bufumu bonse ne.

• Yesu byo akaine ano meseko, Diabola “wamushile poso kimye kikwabo kyafwainwa.” (Luka 4:13) Nanchi Satana pa kikye kimye wamwekele nobe bubi nyi, nangwa mulwanyi nyi?

• Monai kuba’mba “bamalaika baishile na kumukwasha” aye Yesu. (Mateo 4:11) Nanchi bano bamalaika bajinga bilengwa bya mupashi byaishile na kutundaika ne kukwasha Yesu nyi? Kwakubula nangwa kuzhinaukatu ne. Pano, mambo ka o twafwainwa kuzhinaukila kuba’mba Satana kechi kilengwa kya mupashi ne?

Mwisambo wa bubiji ke jishimikila ja mwanamulume waakamwanga Lesa, aye Yoba. Jino jishimikila jaamba  pa misambo ibiji yo besambilenga Diabola ne Lesa. Mu ino misambo yonse ibiji, Lesa watundaikile Yoba pa kwikala wa kishinka. Satana walangulukanga kuba’mba Yoba wapopwelanga Lesa na mambo a kuba’mba wamupesheshe. Bino nangwa byonkabyo, Diabola wayukile bulongo Yoba kukila Lesa byo amuyukile. Yehoba waswishishe Satana kwangata Yoba bunonshi bo ajinga nabo, baana banji, ne bumi bwanji kumo. * Pa kupitapo kimye, kyamwekeshetu patoka kuba’mba byaambilenga Yehoba pe Yoba byajinga bya kine kabiji Satana waambilenga bya bubela. Lesa wapesheshe Yoba pa kwikala wa kishinka.—Yoba 1:6-12; 2:1-7.

Pa ino misambo isambilenga Satana ne Lesa, nanchi Yehoba wisambilenga na bubi bwajinga mukachi kanji nyi? Baibolo waamba kuba’mba: “Byambo bya Yehoba byalumbulukatu.” (2 Samwela 22:31) Kabiji Mambo a Lesa amba kuba’mba: “Wazhila, wazhila, wazhila Yehoba Lesa, Wabulume Bonse.” (Lumwekesho 4:8) Kuzhila kilumbulula’mba aye watokatu too kabiji mwi aye kechi mujipotu nangwa ka bubi kacheche ne. Yehoba waoloka, mwi aye kechi mujipo byubilo bya bubi ne.

Bamo nabo bakonsha kukana amba Yoba kechi wajinga muntu wa kine ne, kabiji amba mwisambo wanji ke jishimikilatu. Nanchi bino byamba bantu bya kine nyi? Binembelo bikwabo bya mu Baibolo byamba’mba Yoba wajinga muntu wa kine. Kya kumwenako, mu Yakoba 5:7-11, baamba pe Yoba kwikala wa kulondela ku bena Kilishitu pa kuchinchika mu bimye byakatazha ne kwibatekenesha amba Yehoba ufweta boba bachinchika. Inge kya kuba Yoba kechi wajinga muntu wakine ne kabiji kechi bamumanyikile kwi Satana ne, nanchi twakonsha kufunjilako ku byo aubile nyi? Kunungapo mu Ezikyo 14:14, 20, Yoba wa bajilwa pa banabalume basatu ba Nowa ne Danyela ba bololoke. Byonkatu byajinga Nowa ne Danyela, Yoba wajinga muntu wa kine, mwanamulume wa lwitabilo. Inge kya kuba Yoba wajinga muntu wakine, ko kuba’mba ne wa mumanyikilenga wajinga wa kine.

Baibolo waamba kuba’mba Satana ke kilengwa kya mupashi kya kine. Pano mwakonsha kwishikisha kuba’mba, ‘Nanchi wakonsha kunjimbaika pamo na kisemi kyami mu ano moba nyi?’

Fwanyikizhai kuba’mba jibumba ja tupondo jalukuka muzhi ye mwikalamo kyakubazhimukilatu. Kwa kubula nangwa kuzhinaukatu ne, bantu bonse ba mu nyaunda kyakonsha kwibakatazha kwizhikijila. Monai kino kyakumwenako kipashako: Satana ne bandemona banji, bilengwa bya mupashi bya kine, basatukila Lesa kabiji bebapangila ne pa ntanda. Ñanyi bintu byakonsha kufumamo? Akilangulukai pa bintu byo mumona ne kumvwa pa mwela mu mpunzha yenu ne ku mapunzhatu akwabo.

• Nanchi bumbanzhi kechi bubena kuvujilakotu mwaya ntanda nangwa kya kuba babena kweseka kwibukanya nyi?

• Nangwa kya kuba bansemi bavula bakanya kutamba bimwesha kupopwela mipashi, nanchi kechi bibena kuvujilakotu ne nyi?

• Nanchi kechi mubena kumona ntanda byo babena kwiyonauna, nangwa kya kuba babena kwibikako kwiizhikijila ne nyi?

• Nanchi bintu bibena kumweka mu nyaunda yetu kechi bibena kumwesha kuba’mba lonaiko katatakatu lufike ne nyi?

Baibolo waamba pa ubena kuleta makatazho pano pa ntanda amba: “Onkao mambo, nsuñunyi mukatampe bamwelele yenkaye muloolo wa kala utelwa amba Diabola kabiji Satana yenka ubena kujimbaika bantu ba pano pa ntanda ponse; bamwelele pano pa ntanda ne bamalaika banji pamo. . . . Malwa enu anweba ntanda ne kalunga ka mema, mambo Diabola waikila ko muji kabiji wazhingila bingi, mambo wayuka amba ujitu na kakimye kacheche.” (Lumwekesho 12:9, 12) Bantu bavula bayuka kishinka kya kuba’mba Satana ke kilengwa kya mupashi kabiji mulwanyi, ye ubena kulengela bintu byonse byatama biji mu ntanda.

Kampe mubena kulanguluka pa byo mwakonsha kwizhikijila. Kijitu bulongo kulanguluka bino. Kibaaba kyalondelapo kisa kwimukwasha kuyuka byo mwafwainwa kwizhikijila.