MUTWE WA PA NKUPIKO | NANCHI SATANA KO AJI NYI?
Nanchi Twafwainwa Kuchiina Satana Nyi?
Byonkatu biji mwela wa Carbon monoxide ubula kumweka kabiji wa bulembe, ne Satana byobyo aji
Mwela watama wa (carbon monoxide) wakatazha bingi kumuyuka. Kechi uji na musombelo nangwa bwema ne, kabiji bantu bafwa kwa kubula kuyuka ne kyalenga ne. Kampe kukila pa kichika kya bantu bafwa ntanda yonse twakonsha kwamba’mba bafwa na mambo a uno mwela. Kechi twafwainwa kwakamwa ne, mambo kuji mashinda a kuyukilako uno mwela watama ne bya kwizhikijila. Bantu bavula babika maalamu a kwibakwasha kuyuka inge kuji mwela watama.
Byonkatu byo kyakatazha kumona mwela watama (carbon monoxide), ne Satana kechi umwekana ne, kabiji mbanzhi. Bino Lesa kechi witushatu bunke bwetu ne. Kuba bino byalondelapo bitubula Lesa biketukwasha kubula ku muchiina Satana.
Kwifuukwila bintu. Pa Yakoba 4:7 paamba’mba: ‘Pakuba Diabola mukanai ne aye ukemunyema.’ Nangwa kya kuba Satana uji na bulume, kechi wakonsha kwimukanjikizha kuba byo mubula kukeba ne. Mwakonsha kwifuukwila. 1 Petelo 5:9 waamba’mba: “Mwimenai [Diabola] saka mwakosa mu lwitabilo.” Yesu byo akaine meseko asatu akwa Satana, wamushile. (Mateo 4:11) Ne anweba mwakonsha kumukana Satana.
Bulunda na Lesa. Yakoba 4:8 witutundaika amba “fwenyai kwipi ne Lesa.” Yehoba ukeba’mba mwikale balunda nanji. Pano mwakonsha kwikala byepi balunda na Lesa? Jishinda jawama kubilamo bino ke kufunda pe aye kwingijisha Baibolo. (Yoano 17:3) Byo mukafunda pe Yehoba bikemulengela kumutemwa kabiji buno butemwe bukemulengela kuba kyaswa muchima wanji. (1 Yoano 5:3) Shenu wa mwiulu ukoba byepi inge mwafwenya kwipi ne aye? Yakoba waamba jibiji amba, “naye ukafwenya kwipi ne anweba.”
Yehoba witupa bintu bikosesha bulunda ne aye pa kuba’mba bituzhikijilenga
Witulaya kwituzhikijila. Pa Byambo bya Mana 18:10 paji byambo bya kuba’mba: “Jizhina ja Yehoba kyo kyamba kyakosa; waoloka unyemena monka ne kupuluka upuluka.” Kino kechi kilumbulula kuba’mba jizhina ja Lesa jakonsha kwimuzhikijila mu jishinda ja kukumya ne. Kilumbulula kuba’mba aba banemeka jizhina ja Lesa bakonsha kwita pa jizhina janji pa kimye kiji kyonse ne kwibazhikijila.
Kyakumwenako kyafwainwa kwitukwasha. Byubilo 19:19 itubula bintu bimo byawama byaubile bantu baalukile ne kwikala bena Kilishitu mu Efisesa amba: “Kabiji bakwabo nabo bavula baubilenga bya buñanga, baletelenga mabuku abo, beapwizha pamo ne kwiasoka mu mujilo ku meso a bonse. Byo babajile mali mo afwila, mali afikile ke biumbi makumi atanu.” * Bano bena Kilishitu basokele byonse byo baingijishanga na buñanga, nangwa kya kuba byafwanga mali avula bingi. Kino kyakumwenako kyakonsha kwitukwasha bingi mu ano moba a lelo. Muno mu ntanda mwayula bya buñanga ne kupopwela mipashi. Nangwa bintu bimo bimweka nobe kechi byanema ne, byakonsha kulengela bandemona kwimongola. Kechi mwafwainwa kubanga bino bintu mu bwikalo bwenu ne.—Mpitulukilo ya mu mizhilo 18:10-12.
Rogelio, watongolwa ku ntendekelo ya bino bibaaba, kechi waitabijile mwi Diabola pa myaka 50 ne. Watendekele kulanguluka jibiji pa ene mambo o a bujile kwitabila mwi Satana. Ki ka kyalengejile bino? Rogelio waamba’mba “Byo najingatu mwanyike, najinga na Baibolo. Byo natanganga mu Binembelo byandengejile kushiinwa kuba’mba Diabola kya kine koaji. Ne lunotu, Binembelo bindengela kubula kongolwa kwi Diabola.”
“Binembelo byandengejile kushiinwa kuba’mba kya kine Diabola koaji. Ne lunotu, Binembelo bindengela kubula kongolwa kwi Diabola”
Nanchi mwakonsha kutemwa inge Satana bamufumyapo nyi? Ee. Binembelo byaambijile jimo pa kimye kya kulutwe kyo bakamufumyapo Diabola, ubena kongola bantu bavula, ne kumutaya mu “kizhiba kya mujilo wakatazha bingi.” (Lumwekesho 20:10) Bino mujilotu yenkawe kechi wakonsha kusoka kilengwa kya mupashi kibula kumweka ne. Ko kuba’mba kizhiba kya mujilo kimenako lufu lwa myaka ne myaka. Satana bakamufyapo kikupu. Kino kimye kikawama bingi ku bantu batemwa Lesa!
Pa kino kimye, twajijilai na kufunda pe Yehoba ne mashinda anji. * Fwanyikizhai kimye kyo mukamba’mba kya kine “Satana ufwako ne!”
^ par. 8 Umvwe ano mali a siliva anembwa pano ajinga mandenali a kina Loma, ko kuba’mba mali onse afwainwe kufika ku mali afwainwe kufola bantu 50,000 pa juba pa juba, kabiji ano ajinga mali avula bingi!
^ par. 11 Umvwe mukeba kuyukilapo byavula pe Satana ne pa kupopwela bankishi, monai kitango 10 kya buku wa kuba’mba Nanchi Baibolo Kine Ufunjisha’mba Ka? Ipuzhai Kamonyi wa kwa Yehoba uji yense inge mukeba uno buku nangwa tangai uno buku pa keyala wa www.pr418.com.
