YOSEFWA waumvwinenga bwema bwawama bwafuminenga ku bichi bya miiba ne bikwabo bya mu mema byalala buluba. Bamusendele ku jibumba ja basulu bakilañenyenga musanza wa Nile. Akifwanyikizhai munongo wa banabalume na bangamela babena kwendela kunsa ya mukola saka baya ku muzhi mukwabo wa mu Ijipita ne byo atambilenga pa kumona mukanga ne kakonge kakatampe na kutumbuka. Yosefwa wavulukilenga ku muzhi wa Hebulona kwalepele bingi na ko bajinga.

Fwanyikizhai bakolwe babena kusampauka ne kubwaluka kwiulu ya bichi bya mikuyu. Yosefwa kechi waumvwinenga mulaka waambilenga bantu bo basambakenenga mu jishinda ne. Kampe waumvwinengako byambo bimo. Mu kuya kwa kimye, kampe wakonsheshe kufunda uno mulaka. Yosefwa kechi walangulukilengapo amba ukabwela ku muzhi kwabo jibiji ne.

Yosefwa wajingatu nsongwalume na myaka 17 nangwa 18 byo apichilenga mu makatazho akonsha kukankamika bakulumpe. Bakolojanji bamubijile kichima ne kukeba kumwipaya mambo bashabo bamutemenwe bingi. Kino kyalengejile kumupotesha ku basulu. (Ntendekelo 37:2, 5, 18-28) Panyuma ya kwenda pa milungu, bano basulu batemenwe bingi byo banangijilenga kwipi na ku kisankanyi ko bakebelenga kupotesha Yosefwa ne bipe bya buneme byo basendele. Yosefwa waubile byepi pa kuba’mba abule kwikala na bijikila pa bintu byamumwekejilenga? Twakonsha kuba byepi ano moba pa kuba’mba tubule kulengela makatazho konauna lwitabilo lwetu? Twakonsha kufunjilako byavula ku byaubile Yosefwa.

“Kabiji Yosefwa bamuletele ku Ijipita, kabiji aye Potifwalo, kineme umo wa kwa Felo, mukulumpe wa bashilikale balaminenga mfumu, mwina Ijipita, amupotele ku bena Ishimela, bonkaba bamuletele konka.” (Ntendekelo 39:1) Jino jishimikila ja mu Baibolo jitumwesha Yosefwa byo eumvwinenga kimye kyo bamupoteshenga ja bubiji saka akijitu mwanyike. Twakonsha kufwanyikizha Yosefwa saka abena kulondela nkambo yanji wakatataka, kineme wa mu Ijipita, babena kupita mu mashitolo ne mu mikwakwa mwajinga bantu bavula, saka babena kuya ku nzubo ya kineme.

Nzubo yamwene Yosefwa kyo kyajinga kimye kitanshi kwiimonapo. Wakomejile mu bwikalo bwa mu matente ne kuvilauka vilauka kabiji balamanga ne matanga a mikooko. Bena Ijipita nabiji Potifwalo, baikalanga mu mazubo awama bulongo. Bamfunji ba bya kupoyapoya bamba kuba’mba bena Ijipita batemenwe bingi kwikala mu mapunzha awama bulongo o bajimbamo ne bichi biji na bimfutele ne mazhiba a mema mo bajimbanga mambanga, maluba aji na miba ne bichi bikwabo bya mu mema. Mazubo amo beashimikijile mu bichi, kabiji ajinga ne na mwakwikala mubena kupita mwela wawama, mawindo, bibamba byavula, kibamba kikatampe kya kujiilamo ne tumazubo mwaikalanga bamingilo.

Nanchi Yosefwa wasekejile na bino byonse nyi? Ine. Wiumvwinengatu nobe muntu waeleka. Kechi wayukile mulaka waambanga bena Ijipita, mvwajilo ne bupopweshi bwabo ne. Bapopwelanga balesa bapusanapusana, kabiji baubanga bya  buñanga ne bingelekezha kabiji baitabijile kuba’mba kwikala kubuukila mu kintu kikwabo panyuma ya kufwa. Kwajinga kyamulengejile kubula kwiumvwa amba uji bunke. Baibolo waamba kuba’mba: “Yehoba wajinga ne Yosefwa.” (Ntendekelo 39:2) Yosefwa waketekejile bingi mwi Lesa wanji. Baibolo waamba kuba’mba “Yehoba uji kwipi na bonse bamwita.” (Salamo 145:18) Yosefwa wafwenyenye byepi kwipi ne Lesa wanji?

Yosefwa kechi walefwilwe na bijikila na mambo a bintu byo apichilengamo ne, bino watwajijile kwingila mwingilo wanji. Waubile bintu byalengejile Yehoba kumupesha, kino kyalengejile nkambo yanji wakatataka kumutemwa. Potifwalo wayukile kuba’mba Yehoba wapesha uno nsongwalume, Lesa wa bantu ba kwa Yosefwa, kabiji ano mapesho alengejile uno mwina Ijipita kumwenamo. Nkambo yanji wamutemenwe bingi Yosefwa kabiji kino kyalengejile Potifwalo kumupa bukulumpe bwa pa nzubo yanji yonse.—Ntendekelo 39:3-6.

Banyike babena kwingijila Lesa lelo jino, bafwainwa kulondela kya kumwenako kya kwa Yosefwa. Kya kumwenako, inge baji ku sukulu, bafwainwa kumona baana ba sukulu na kuba bintu byatama nabiji bya buñanga ne bingelekezha ne kubula luketekelo. Inge mubena kupita mu bino bintu, yukai kuba’mba Yehoba kechi waaluka ne. (Yakoba 1:17) Ukwasha bonse batwajijila kwikala bakishinka kwi aye ne kwibikako kuba bintu bimutokesha kumuchima. Wibapesha bingi kabiji byobyo akoba ne kwi anweba.

Jino jishimikila jitubula kuba’mba Yosefwa watwajijile kukoma. Waikele ke mukulumpe kabiji “wajinga na mubiji walamba, wamwekatu bulongo.” Kuno kulamba kwamulengejile kwikala mu lukatazho.

Yosefwa wajinga wakishinka, bino muka Potifwalo kechi byo byo ajinga ne. Baibolo waamba’mba: “Muka nkambo yanji wamutajilenga Yosefwa na lwiso, ne kumwambila’mba: ‘Laala ne amiwa.’” (Ntendekelo 39:7) Nanchi Yosefwa waswile kwifwalama na uno mwanamukazhi wabujile kuyuka Lesa nyi? Baibolo kechi waambapo amba Yosefwa kechi waumvwanga kilaka kya kwilaala byonka byumvwa bansongwalume nangwa amba uno mwanamukazhi muka kineme kechi walambile ne. Nanchi Yosefwa walangulukilenga amba nkambo yanji kechi usa kuyuka ne nyi? Nanchi walangulukilenga pa bunonshi bo akekala nabo inge waswa kwilaala nanji nyi?

Kechi twayuka bintu byonse byalangulukilenga Yosefwa ne. Bino twakonsha kuyuka byo alangulukilengapo. Twakonsha kuyuka bino mu byo  akumbwile amba: “Nkambo yami kechi wayuka byo aji nabyo mu nzubo ne, kabiji wabika byonse byo aji nabyo mu maboko ami. Kafwako wankila muno mu nzubo ne, kabiji kafwako nangwa kimo kyo abula kufikizha kwi amiwa ne, kana anweba yenka, nakyo mambo a kuba’mba mwi bakazhi babo; nanchi buno bubi bukatampe nebube byepi, ne kumulenga mambo aye Lesa?” (Ntendekelo 39:8, 9) Fwanyikizhai uno nsongwalume ubena kwamba bino byambo saka achinchika. Kyamukolele bingi ku muchima pa kulanguluka pa bubi bwakebelenga kuba muka Potifwalo. Mambo ka?

Yosefwa waambile’mba nkambo yanji wamuketekejile bingi. Potifwalo wapeele Yosefwa bukulumpe bwa pa nzubo yanji yonse, kufumyakotu mukazhanji. Pano Yosefwa wafwainwe kuba byepi kino kintu kyafwainwe kulengela nkambo yanji kubula kumuketekela? Kechi wakebelenga kuba kintu kya uno mutundu ne. Bino kuji kikatampe kyamulengejile kubula kulenga mambo: kufichisha Yehoba Lesa wanji ku muchima. Yosefwa bamufunjishe ku bansemi yanji pe Lesa byo amona masongola ne bukishinka. Yehoba ye watendekeshe masongola atanshi kabiji waambile ne pa byo amona masongola. Mwanamulume ne mwanamukazhi bafwainwe kwikala ke “mubiji umo.” (Ntendekelo 2:24) Lesa wakambulanga boba babulanga kunemeka masongola. Kyakumwenako, wajimwineko banabalume bakebelenga kwilaala na muka Abalahama awo wajinga mushakulu wa kwa Yosefwa ne muka Izaka, nkambo yanji Yosefwa. (Ntendekelo 20:1-3; 26:7-11) Yosefwa wayukile uno mukambizho kabiji wamulondelanga.

Muka Potifwalo kechi waumvwine bulongo pa bintu byo aumvwine ne. Fwanyikizhai uno nsongwalume wakana kulaala na nkambo yanji ne kumwambila amba byo akebelenga kuba bwajinga “bubi bukatampe”! Nangwa byonkabyo, watwajijile na kumukanjikizha. Na mambo a kifulo kyo ajingapo, walangulukilenga amba Yosefwa usa kuswa kwilaala nanji. Wamwesheshe byubilo byonka bijipo na Satana kimye kyo aesekele Yesu. Satana wakankelwe kushinda Yesu kabiji kechi walekele ne, bino wapembelejile “kimye kikwabo kyafwainwa.” (Luka 4:13) Bantu bakishinka bafwainwa kutwajijila kukana kuba byatama ne kwikala bakosa. Yosefwa naye byobyo aubile. Nangwa kya kuba muka Potifwalo watwajijile na kumukanjikizha “pa juba pa juba,” kechi waswile ne. Baibolo waamba’mba: “Kechi waitabile jiwi janji ne.” (Ntendekelo 39:10) Bino muka Potifwalo kechi walekele ne.

Watwajijile na kumukanjikizha inge bamingilo bafumapo pa nzubo. Wayukile amba Yosefwa usakutwela mu nzubo na kwingila. Inge watwela, muka Potifwalo waesakanga kumukwata. Ne japeleleko, wamukwachile ku kivwalo kyanji saka abena kumukoka ne kumwambila amba: ‘Laala ne amiwa!’ Yosefwa wanyemene ne kusha kivwalo kyanji mu maboko.—Ntendekelo 39:11, 12.

Twakonsha kuvuluka byambo byanembele mutumwa Paulo na lutangijilo lwa mupashi amba: “Chinai bulalelale!” (1 Kolinda 6:18) Yosefwa ke wakumwenako bena Kilishitu bonse! Bantu bo twenda nabo kimye kyonse babula kulondela mizhilo ya Lesa bakonsha kwitukanjikizha kuba byo boba, bino kechi twafwainwa kulondela byubilo byabo byatama ne. Twafwainwa kukana byonse byo bafwainwa kwamba.

Lukatazho lwajinga ne Yosefwa lwabayile. Muka Potifwalo wakebelenga kushinkanya. Ponkapotu watendekele kutama muteto ne kwita bamwingilo bakwabo mu nzubo. Waambile amba Yosefwa waji kukebanga kulaala nanji kya kumukanjikizha kabiji wanyematu na mambo a kubijika. Walamine kivwalo kyanji ne kupembelela mwata wanji amba akibwele. Potifwalo byo afikile pa nzubo, wamubujile bonka buno bubela ne kupamo mambo mwatawanji amba ye waletele uno muntu mu nzubo yabo. Potifwalo waubile byepi? Baibolo waamba’mba: “Bukaji bwanji bwabukile”! Wamutwajile ne kumutaya mu kaleya.—Ntendekelo 39:13-20.

Kechi twayuka bulongo tuleya twa bena Ijipita byo twajinga pa kyokya kimye ne. Bamfunji ba bya kupoyapoya poya batana kuba’mba tuno tuleya twajinga na nsakwa ikatampe bingi kabiji twajinga ne na bimbo mo babikanga bakaili. Yosefwa walumbulwile ino mpunzha amba “kaleya ka panshi” ko kuba’mba mwabula kyeya. (Ntendekelo  40:15) Mu buku wa Masalamo, tufundamo bintu bikwabo byapichilemo Yosefwa amba: “Maulu anji beakozhezhe na manjongolo: Walajile mu nshimbi.” (Salamo 105:17, 18) Bena Ijipita kimo kimye bakashilanga manjongolo bakaili saka bafutwila maboko panyuma mu nkokola; bakwabo bebabikanga mashimbi mu nshingo. Yosefwa wafwainwa wayanjile bingi byo bamumanyikilenga kwa kubula ne mambo!

Bino byonse kechi byalengejile Yosefwa kulefulwa ne. Jishimikila jaamba’mba, “waikajile monka mu kaleya.” Waikajilemo myaka yavula bingi! * Yosefwa kechi wayukile inge ukafuma mu kaleya nangwa ne. Moba byo ayilenga na kuvujilakotu saka aji mu kaleya, ñanyi bintu bya mukwashishe kubula kulefulwa?

Jishimikila jaamba kuba’mba: “Yehoba wajinga ne Yosefwa kabiji wamubijile lusa.” (Ntendekelo 39:21) Yehoba wakonsha kubila muntu lusa nangwa kya kuba uji mu manjongolo, mu kaleya ka panshi mwabula ne kyeya. (Loma 8:38, 39) Kampe twakonsha kufwanyikizha Yosefwa ubena kubuula Shanji wa mwiulu makatazho o apichilengamo mu milombelo ne kutambwila mutende ufuma kwi “Lesa wa bukwasho bonse.” (2 Kolinda 1:3, 4; Filipai 4:6, 7) Ñanyi bintu bikwabo Yehoba byo aubijile Yosefwa? Tutanga kuba’mba Yehoba “wamubijile lusa, wamulumbulwile ku meso a kalama wa kaleya.”

Bakaili bebapanga mingilo, kabiji Yosefwa bamupesheshe jikwabo kwi Yehoba. Waingilanga bingi mingilo yonse yo bamupanga ne kushila byonse mu maboko a Yehoba. Na mambo a kuba Yehoba wamupesheshe, bamuketekejile ne kumunemeka byonka byo kyajinga mu nzubo ya kwa Potifwalo. Tutanga kuba’mba: “Kabiji aye kalama wa kaleya wamupele Yosefwa lusa lwa pa bakaili bonse bajinga mu kaleya, kabiji byonse byo baubilenga monka, aye yenka wibobishishengabyo. Kabiji aye kalama wa kaleya kechi watajilenga nangwa kintu kimo kyajinga mu maboko a Yosefwa ne, mambo aye Yehoba wajinga nanji; kabiji byonse byo aubilenga, aye Yehoba wibilumbulwilenga.” (Ntendekelo 39:22, 23) Yosefwa watundaikilwe bingi pa kuyuka amba Yehoba wa mutele bingi muchima.

Twafwainwa kupita mu makatazho avula mu bwikalo kampe ne kwitumanyika, bino twakonsha kufunjilako ku byaubile Yosefwa. Inge ke tulombe kwi Yehoba, kukokela mikambizho yanji ne kuba bintu bimutokesha ku muchima uketupesha. Yehoba wapesheshe bingi Yosefwa byonka bibaaba bikalondelapo byo bikamba.