Bantu bavula mwaya ntanda basekela Kiminshiminshi na mambo a bintu byapusana pusana byo bayuka. Bamo bomvwa bulongo kwikala na tubimye twa kusekela pamo na bisemi ne balunda. Bakwabo balanguluka pe Lesa nangwa amba ke kimye kya kukwashishamo bayanji. Balanguluka amba bino byonse bijitu bulongo. Nangwa byonkabyo, kechi bayuka byavwangwamo mu kusekela jino juba ne.

Kitanshi, bantu bavula basekela Kiminshiminshi basekela mambo bayuka amba jo juba jasemenwe Yesu. Nangwa byonkabyo, banemba pa bya mpito bamba’mba juba jasemenwe Yesu kechi jayukanyikwa ne. Buku wa The Christian Book of Why waamba’mba “bena Kilishitu batanshi bakaine kubika juba amba jo jasemenwe Yesu’ mambo kechi bakebelenga “kulondela byubilo bya bantu babulanga kupopwela Lesa ne.” Kyawamakotu, Baibolo kechi waambapo amba Yesu wasekelanga juba ja kusemwa kwanji nangwa kwa muntu mukwabo ne. Bino wakambizhetu baana banji ba bwanga kuvuluka lufu lwanji.—Luka 22:19.

Kya bubiji, banembi bavula baswa kuba’mba bisho byavula bya Kiminshiminshi byafumine ku bupopweshi bwabula bwa bena Kilishitu ne ku bantu babulanga kupopwela Lesa. Bino byavwangamo Santa Claus, kwingijisha kichi kya mistletoe, kichi kya Kiminshiminshi, kwipa bya bupe, kwambula tundulu, kusoka myandalo, kukobaika maluba ne kwimba nyimbo ya Kiminshiminshi. Buku wa The Externals of the Catholic Church waambile pa bino bisho amba: “Inge twapana nangwa kwitupa bya bupe bya pa Kiminshiminshi, kukobeka maluba a manzhamatamba mu mazubo ne mu machechi, nanchi tuyuka kuba’mba tubena kusekela bisho byafumine ku bantu babulanga kupopwela Lesa nyi?”

Kampe ne anweba mwakonsha kulanguluka pa kyatamina kulondela bino bisho bimweka nobe bijitu bulongo. Pa kukumbula bino, akilangulukai pa kino kishinka kya busatu. Lesa kechi uswisha kumvwanga bisho byabula bya bwina Kilishitu na bupopweshi bwa kine ne. Yehoba waambile kupichila mu ngauzhi wanji Amosi ku bantu balekele kumupopwela mu Isalela wa ku kala amba: “Nashikwa ne kulengulula bijiilo byenu . . . Lekai kunguba kyungwe na nyimbo yenu.”—Amosi 5:21, 23.

Mambo ka o aambijile bino byambo bya lujimuno? Vulukai bintu byaubanga bantu ba ku kabeta ka ku buyeke ka bufumu bwa Isalela bwa kala. Mfumu mutanshi aye Yeloboma wabikile mwana ñombe mu mizhi ya mu Danyi ne Betele kabiji waongwele bantu kutendeka kupopwela bino mu kifulo kya kupopwela Yehoba pa nzubo ya Lesa yajinga mu Yelusalema. Kabiji uno mfumu watendekeshe bijiilo ne kusala bañanga pa kuba’mba bakwashe bantu pa kusekelela bijiilo.—1 Bamfumu 12:26-33.

Bintu byaubilenga bena Isalela bebimwinenga amba byajingatu bulongo. Byonse byo baubilenga bamwenenga amba bibena kutokesha Lesa ku muchima. Byambo bya lujimuno byaambile Lesa kupichila mwi Amosi ne bangauzhi bakwabo bimwesha Lesa byo eumvwinenga pa bino byubilo. Lesa waambile kupichila mu ngauzhi Malakai amba: “Mambo amiwa yami Yehoba; kechi ngaluka ne.” (Malakai 3:6) Nanchi bino kechi bitubuula biumvwa Lesa pa kusekelela Kiminshiminshi lelo jino ne nyi?

Na mambo a bishinka byo twisambapo, bantu bavula baleka kusekelela Kiminshiminshi. Bekala na lusekelo lwa kine pa kusekela pamo na balunda nabo, ne ba mu kisemi ne pa kukwasha bayanji kwibapa bya bupe pa kimye kijitu kyonse mu mwaka.