MUTWE WA PA NKUPIKO | MWAKONSHA KUFWENYA KWIPI NE LESA
Nanchi Mwiumvwa Kufwenya Kwipi ne Lesa Nyi?
“Kwikala balunda na Lesa kwimulengela kwikala bazhikijilwa. Kijitu nobe Lesa ukeba byawama mwi anweba.”—CHRISTOPHER, NSONGWALUME WA KU GHANA.
“Lesa wimuta muchima inge mwaponena mu bya malwa kabiji wimukwasha.”—HANNAH WA MYAKA 13, ALASKA, U.S.A.
“Kuyuka kuba’mba uji na bulunda bwawama ne Lesa ke kintu kilengela kwikala na lusekelo!”—GINA, MWANAMUKAZHI MWINA JAMAICA UJI NA MYAKA YA MU MA 40.
Bantu bavula balangulukatu byonka bilanguluka ba Christopher, ba Hannah ne ba Gina. Bavula mwaya ntanda bashiinwa kuba’mba Lesa mulunda nabo. Nga anweba kiji byepi? Nanchi mulanguluka amba mwafwenya kwipi ne Lesa nyi? Nanchi mwakonsha kutemwa kufwenya kwipi ne Lesa nyi? Kampe mulanguluka kuba’mba: ‘Nanchi kyakonsheka muntu kwikala na bulunda bwawama na Lesa wa Bulume Bonse nyi? Kabiji mu ñanyi jishinda?’
MWAKONSHA KUFWENYA KWIPI NE LESA
Baibolo waamba’mba twakonsha kwikala na bulunda bwawama na Lesa. Waamba’mba Lesa watelele mushakulu Muhebelu aye Abalahama amba “mulunda nami.” (Isaya 41:8) Kabiji monai ne byambo biji pa Yakoba 4:8: “Fwenyai kwipi ne Lesa, ne aye ukafwenya kwipi ne anweba.” Kino kimwesha kuba’mba Lesa wakonsha kwikala mulunda nenu. Pano byo kiji kuba’mba Lesa kechi umweka ne, mwakonsha ‘kufwenya kwipi’ byepi kwi aye ne kwikala na bulunda bwawama nanji?
Pa kuba’mba tukumbule buno bwipuzho, twayai tulanguluke pa bitendeka bulunda bwa bantu. Patanshi, bantu babiji bafwainwa kwiyuka mazhina. Inge batwajijila kwisamba kimye kyonse bulunda bwabo bukoselako. Kabiji inge kebekwashe mu bintu, bulunda bwabo bukoselako. Byobyo kyafwainwa ne kwikala pa kwikala na bulunda bwawama ne Lesa. Twayai twisambe byo kyafwainwa kubiwa kino.
Mwakonsha Kutemwa
KYAMBA KYA USOPA
Nanchi Mwayuka Jizhina ja Lesa Kabiji Mwijingijisha Nyi
Kupichila mu Baibolo, Lesa wiyukisha kwi anweba amba: “Amiwa yami Yehoba. Jino jo jizhina jami.”
