MUTWE WA PA NKUPIKO | MWAKONSHA KUFWENYA KWIPI NE LESA
Kufwenya Kwipi ne Lesa kyo Kintu Kyawama
Mwakonsha kuba byepi pa kuba’mba mufwenye kwipi ne Lesa? Twisamba pa bintu byavula bingi byo mwafwainwa kuba pa kuba’mba mwikale balunda na Lesa. Bintu byo twisambapo ke bino:
Yukai jizhina ja Lesa ja Yehoba ne kwijingijishanga.
Isambainga nanji kimye kyonse kupichila mu lulombelo ne kufunda Mambo anji, Baibolo.
Twajijilai kuba bitokesha Yehoba ku muchima.
Fwenyai kwipi ne Lesa kupichila mu kwingijisha jizhina janji, kulomba kwi aye, kufunda Mambo anji, ne kuba bimutokesha ku muchima
Kwesakana na bino bishinka bisatu, nanchi mwakonsha kwamba’mba mubena kuba bimukebela Lesa pa kuba’mba mufwenye kwipi ne aye nyi? Nanchi kujipo mumo mo mwafwainwa kupimpulako nyi? Ibyo kuba’mba mwafwainwa kwibikako pa kuba’mba mube bino, pano bino monai bikafumamo.
Ba Jennifer ba ku United States baambile’mba: “Inge twibikako pa kuba’mba twikale na bulunda bwawama na Lesa mufuma byawama. Mu buno bulunda mufuma bintu byawama bingi: kuketekela mwi Lesa, kumuyuka bulongo byo aji, ne kyakilapo ke kumutemwa. Kufwenya kwipi ne Lesa kyo kintu kyawama!”
Umvwe mukeba kwikala na bulunda bwawama na Lesa, Bakamonyi ba kwa Yehoba bakatemwa kwimukwasha. Bakonsha kwiyanga na kwimufunjisha Baibolo kyatutu. Kabiji mwaitwa kwiya na kupwila nabo pa Nzubo ya Bufumu, po mukapwanañana na bantu baji na bulunda bwawama na Lesa. * Inge ke mube bino, mukamba byonka byaambile nyimbi wa masalamo amba: “Pakuba amiwa, kyangwamina kufwenya kwipi ne Lesa.”—Salamo 73:28.
^ par. 9 Umvwe mubena kukeba muntu wa kwimufunjisha Baibolo nangwa kuyuka kwaikela Nzubo ya Bufumu, ipuzhai muntu wimuletejile uno magazini nangwa yai pa Keyala wetu wa www.pr418.com/kqn ne kuchinta panembwa’mba TUNEMBELAI panshi ya jipa.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
