Nasemekejilwe mu Baku ku Azerbaijan kabiji yami najinga mwanyike pa baana babiji. Batata bajinga ba Mozilemu, bamama ba Yudea. Bansemi betemenwe bingi nangwa kya kuba byo baitabijilemo byapusene. Bamama bakwashanga bingi Batata inge ñondo wa Ramadan ye baikalanga kwa kubula kuja wafika, kabiji Batata nabo batundaikanga Bamama inge baikala na Juba ja Lupitailo. Mu nzubo mwetu mwajinga Koran, Torah ne Baibolo.

Nebikanga pa ba Mozilemu. Nangwa kya kuba naketekejile kuba’mba Lesa koaji, bino kuji bintu bimo byo nabujile kumvwisha. Neshikishanga amba, ‘Mambo ka Lesa o alengejile bantu, kabiji mambo ka a kuyanjila bumi bonse ne kumanama mu mujilo wa helo kikupu?’ Bantu byo bamba’mba Lesa uswisha byonse bitumwekela, nalangulukanga’mba, ‘Nanchi Lesa ye ulengela makatazho apitamo bantu ne kumvwa bulongo inge ke bamaname?’

Byo najinga na myaka 12, nalombanga namaz, milombelo itanu ilomba ba Mozilemu pa kusekelela. Pa kikye kimye, Batata batumine bakolojami ne amiwa ku sukulu wa ki Yudea. Twafundanga bisho bya Torah ne mulaka wa Kihebelu. Saka tukyangye kutendeka kufunda, twalombanga monka mwayijile kisho kya Bayudea. Nalombanga lulombelo lwa namaz ku nzubo lukelokelo, kabiji ku sukulu nalombanga milombelo ya Kiyudea.

Nakebeshanga mikumbu ku mepuzho o najinga nao. Javula naipuzhanga ba Labi pa sukulu amba: “Mambo ka Lesa o alengejile bantu? Lesa umona byepi batata byo baji ba Mozilemu? Ke mwanamulume wawama bingi, pano mambo ka o ebamwena amba kechi bafwainwa ne? Mambo ka Lesa o ebalengejile?” Kechi natondelwe ne kushiinwa na mikumbu yabo ne.

Mu 2002, nalekele kuketekela mwi Lesa. Byo twavilukijile ku Germany, papicheletu mulungu umo batata bakolelwe kikola kya kinkanku kya kuba twatajilengapotu. Pa myaka yavula, nalombelangako kisemi kyetu pa kuba’mba twikale na bumi  bwawama. Moba onse, namusashijilanga Lesa wa bulume bonse pa kuba’mba akwashe batata mambo nayukile amba uji na bulume pa bumi ne lufu. Nalangulukanga amba, ‘Kechi kyakatazha Lesa kubila kamwale kyonse kyo a mulomba ne.’ Nashiinwe kuba’mba Lesa ukankumbula. Nangwa byonkabyo, batata bafwile.

Kino kyandengejile kulanguluka amba Lesa kechi wituta muchima ne, kabiji najinga na bulanda bingi. Natendekele kulanguluka amba, ‘Kampe kechi nalombanga bulongo ne,’ nangwa amba ‘Lesa ufwako.’ Kyankankamikile bingi kabiji nalekele ne kulomba milombelo ya namaz. Kechi naketekejile mu bupopweshi buji bonse ne. Onkao mambo, nashiinwe kuba’mba Lesa ufwako.

Panyuma ya bañondo 6, Bakamonyi ba kwa Yehoba betufwakashijile pa nzubo. Na mambo a kubula kwitabila mu bwina Kilishitu, amiwa ne nyenga yami twakebelenga kwibamwesha kuba’mba byo baitabijilemo byajinga bya bubela. Twibashikishe amba: “Bena Kilishitu bafwainwa kulomba byepi Yesu, musalabu, Maliya ne bankishi byo kiji kuba’mba Mikambizho Jikumi yakanya?” Bakamonyi baingijishe Binembelo ne kwitumwesha kuba’mba bena Kilishitu bakine kechi bafwainwa kupopwela bankishi ne, kabiji amba twafwainwa kulombatu kwi Lesa. Kino kyankumishe bingi.

Kabiji twibepwizhe amba: “Nga pa balesa basatu? Inge Yesu Lesa, wakonsha kwikala byepi pano pa ntanda ne kumwipaya ku bantu?” Bakumbwile kwingijisha Baibolo ne kulumbulula amba Yesu kechi Lesa ne, kabiji kechi waesakana na Lesa ne. Bakamonyi balumbulwile amba o ene mambo o babujila kwitabila mu Balesa Basatu. Nakuminye bingi ne kwamba’mba, ‘Bano bena Kilishitu bapusanako.’

Nakebelenga kuyuka kilengela bantu kufwa ne kyalengela Lesa kuswisha buyanji. Bakamonyi bammwesheshe buku wa Kuyuka Kutangijila ku Bumi Bwa Myaka, * mwajinga kitango kyakumbwile mepuzho onse. Natendekele kufunda Baibolo.

Byo twafunjilenga, nataine mikumbu yonse yo nakebelenga mu Baibolo. Nayukile kuba’mba jizhina ja Lesa Yehoba. (Salamo 83:18) Butemwe kyo kyubilo kyanji kikatampe. (1 Yoano 4:8) Walengele bantu mambo wakebelenga kwibapa bumi. Naumvwishishe kuba’mba nangwa kya kuba Lesa waswisha nshiji wiishikwa kabiji ukeifumyapo kikupu. Nafunjile kuba’mba bunsatuki bwa ba Adama ne Evwa bo bwalengela bantu kuyanda. (Loma 5:12) Batata ne batemwe bami bafwile na mambo a bundengamambo. Pano bino, mu ntanda ipya Lesa ukafumyapo byonse bya malwa kabiji bonse bafwa bakekala na bumi jibiji.—Byubilo 24:15.

Nataine mikumbu mu Baibolo. Naketekejile mwi Lesa jikwabo. Byo nayukile Bakamonyi ba kwa Yehoba bulongo, nashiinwe kuba’mba ke bulongo bwa ntanda yonse. Kukwatankana ne butemwa biji pakachi kabo byamfikile bingi pa muchima. (Yoano 13:34, 35) Kufunda pe Yehoba kwandengejile kukeba kumwingijila, kabiji nafuukwilepo kwikala Kamonyi wa kwa Yehoba. Nabatizhiwe pa 8 January,  2005.

Bukine bwa mu Baibolo bwalengejile bwikalo bwami kuwaminako. Bintu byo nafunjile mu Mambo a Lesa byandengejile kukasuluka mu milanguluko. Mambo a Lesa andetela lusekelo pa kuyuka kuba’mba batata nkebamona jibiji mu lusanguko lo alaya.—Yoano 5:28, 29.

Twaikala mu masongola na lusekelo na bamwatawami ba Jonathan batemwa Lesa pa myaka 6. Kabiji twafunda amba kechi kyakatazha kuyuka bukine bwaamba pe Lesa ne, kabiji bwanema bingi. O ene mambo o tubuujilako bakwetu bintu byawama byo twaitabilamo. Lelo jino, nashiinwa kuba’mba Bakamonyi ba kwa Yehoba ke bena Kilishitu ba kine kechi “bantu bangi” ne.