U PESAPESA washikishe banyike kukila pa 800 mu bupopweshi bwapusanapusana umvwe baitabila amba Yesu ukumbula milombelo. Bavula baswile amba ukumbula. Pano bino, mwanyike umo wa mukazhi wakaine amba kechi Yesu ne, ke “Lesa.”

Nga anweba mwalangulukapo amba ka? Nanchi twafwainwa kulomba kwi Yesu nyi, inyi kwi Lesa? * Pa kuba’mba tutane mukumbu, twayai tumone Yesu byo afunjishe baana banji ba bwanga pa byo bafwainwa kulomba.

Yesu witufunjishe ne kwitumwesha ko twafwainwa kulomba.

BYO AFUNJISHENGA: Mwana wa bwanga umo byo ashikishe Yesu amba, “Nkambo, tufunjishai bya kulomba,” wakumbwile’mba: “Pa kulomba, saka mwamba’mba: ‘Tata.’” (Luka 11:1, 2) Kabiji mu lulombelo lwanji lwa pa mutumba, Yesu watundaikile banteleki banji kulomba. Waambile’mba: “Lombai kwi Shenu.” Kabiji wibatundaikile amba: “Shenu wayuka bintu byo mukeba saka mukyangye ne kumulomba.” (Mateo 6:6, 8) Pa juba japeleleko saka akyangye kufwa, Yesu waambijile baana banji ba bwanga amba: “Umvwe mukalombe kintu kwi Batata, abo bakemupakyo mu jizhina jami.” (Yoano 16:23) Onkao mambo, Yesu witufunjishe kulomba kwi Shanji kabiji Shetu, aye Yehoba Lesa.—Yoano 20:17.

BYO AUBANGA: Byonkatu byo afunjishe bakwabo kulomba, Yesu walombele amba: “Nemutota patoka anweba Tata, Nkambo wa mwiulu ne ntanda.” (Luka 10:21) Pa kimye kikwabo, ‘Yesu watajile mwiulu ne kwamba’mba: “Tata, nemusanchila bingi pa kuñumvwa.’” (Yoano 11:41) Kabiji byo afwilenga, walombele amba: “Tata, napana mupashi wami mu maboko enu.” (Luka 23:46) Byo alombele kwi Shanji ko kuba’mba “Nkambo wa mwiulu ne ntanda,” Yesu witumwesheshe byo twafwainwa kuba. (Mateo 11:25; 26:41, 42; 1 Yoano 2:6) Nanchi baana banji ba bwanga batanshi balondelanga byo ebafunjishe nyi?

Byo papichile milungu icheche kufuma pabwelejile Yesu mwiulu, baana banji ba bwanga bebobile mwenga ne kwibakanya ku balwanyi babo. (Byubilo 4:18) Balombele bukwasho. Pano balombele kwi ñanyi? “Balombejile pamo kwi Lesa,” kuba’mba atwajijile kwibakwasha ‘kupichila mu jizhina ja kalume wanji wazhila aye Yesu.’ (Byubilo 4:24, 30) Onkao mambo, baana ba bwanga ba kwa Yesu balondelanga byo afunjishe pa kulomba. Balombele kwi Lesa kechi kwi Yesu ne.

Panyuma ya kupitapo myaka, Paulo walumbulwile jishinda jo alombelangamo ne bakwabo. Byo anembejilenga bena Kilishitu bakwabo, waambile’mba: “Kimye kyonse tumusanchila Lesa, Shanji Nkambo yetu Yesu Kilishitu, pa kwimulombelako.” (Kolose 1:3) Kabiji wanembejile ne bakwabo ba mulwitabilo’mba “kimye kyonse saka mumusanchila Lesa wetu Tata pa bintu byonse kupichila mu jizhina ja Nkambo yetu Yesu Kilishitu.” (Efisesa 5:20)  Mu bino byambo, twamona kuba’mba Paulo watundaikile bakwabo kulomba kwi “Lesa wetu Tata pa bintu byonse”—pano bino, mu jizhina ja kwa Yesu.—Kolose 3:17.

Byonkatu byajinga bena Kilishitu batanshi, twakonsha kumwesha amba twatemwa Yesu inge twalondela byo afunjishe pa lulombelo. (Yoano 14:15) Umvwe ke tulombe kwi Shetu wa mwiulu kabiji kwi ayetu bunke, tukashiinwa na byambo biji mu Salamo 116:1, 2 bya kuba’mba: “Namutemwa Yehoba Mambo umvwa jiwi jami . . . Kabiji nkamwitanga kimye kyonse kyo nkekala na bumi.” *