Nasemekejilwe mu Székesfehérvár, ku Hungary muzhi mwaubiwa bintu bya mpito byavula papita myaka kukila pa 1,000. Kabiji nkivuluka bikulukulu bya nkondo ya bubiji ya ntanda yonse.

Kufumatu ku bwanyike, naikalanga ne bankambo. Ne bavuluka bingi kikatakata bankambo babakazhi ba Elisabeth. Bamfunjishe kutemwa Lesa. Byo najinga na myaka isatu, twalombanga kimye kya mabanga lulombelo lo batela amba Lulombelo lwa Nkambo. Bino byo nafikizhe myaka 20, popo nayukile mwatajile luno lulombelo.

Bankambo bo bandamanga byo najinga mwanyike mambo bansemi baingilanga mute ne bufuku pa kuba’mba batanepo mali avula a kupotamo nzubo. Nangwa byonkabyo, Kibelushi kya bubiji mu ñondo, kisemi kyonse twapwilanga pamo na kuja kajo. Naumvwa bingi bulongo kupwila pamo.

Mu 1958, bansemi bataine mali ne kupota nzubo yo twaikelengamo atweba bonse. Panyuma ya bino, natendekele kwikala na bansemi kabiji naumvwine bingi bulongo. Byo papichile bañondo 6, bintu byayile mu nsunya. Batata bafwile na kikola kya kansa.

Kyantamijile bingi. Nalombelenga amba: “Anweba Lesa, pulushai batata. Ne batemwa. Mambo ka o mwabujile kukumbula milombelo yami?” Nakebelenga kuyuka kwayile batata. Nalangulukilenga amba: ‘Nanchi baya mwiulu nyi, inyi bafwijijila?’ Nakumbwanga bakwetu bajinga na bashabo.

Pa myaka yavula, nayanga ku kilende. Nafukamanga pa kilende po bazhikile batata na kulomba’mba: “Anweba Lesa, mbulai kwaya batata?” Kabiji nalombanga bakunkwasha pa kuba’mba ngyuke nkebelo ya bumi.

Byo nafikizhe myaka 13, natendekele kufunda Kigerman. Nalangulukanga amba kutanga mabuku a Kigerman  akankwasha kutana mikumbu. Mu 1967, natendekele kufunda mu muzhi wa Jena, pa kyokya kimye wajinga ku Musela wa Germany. Natanganga mabuku a bashayuka ba mu Germany kikatakata aambilenga pa kwafumine bantu. Nangwa kya kuba mwajinga bimo byo baambilepo, bino kechi nataine mikumbu ne. Natwajijile na kukeba mikumbu.

Mu 1970, nabwelele ku Hungary ko nakataine Rose ye nasongwele. Pa kyokya kimye, kyalo kya Hungary kyalamwanga na bashilikale. Byo papichile kimye kicheche kufuma po twisongwejile, Rose ne amiwa twayile ku Austria. Kwine ko twakebelenga kuvilukila ke ku Sydney, mu Australia kwaikalanga bamwinsho.

Nataine nkito mu Austria. Juba jimo mukwetu mo twaingijilanga wambujile’mba nakonsha kutana mikumbu mu Baibolo. Wampele mabuku abiji aambilenga pa Baibolo. Natangile ano mabuku kabiji nakebelenga ne kuyukilapo byavula. Onkao mambo, nanembejile nkalata Bakamonyi ba kwa Yehoba banembi ba ano mabuku pa kuba’mba bantumineko akwabo.

Byo twavulukilenga juba ja masongola etu, Rose ne amiwa betwichile ku mwanyike umo Kamonyi wa ku Austria. Wituletejile mabuku o twalombele ne kungipuzha inge nakonsha kutemwa kufunda Baibolo kabiji naswile. Na mambo a kuba’mba nakebelenga bingi kufunda, twafundanga jibiji mu mulungu, kabiji twafundanga pa maola 4 inge twasambakana.

Natemenwe bingi bintu byo nafunjilenga na Bakamonyi mu Baibolo. Byo bammwesheshe jizhina ja Lesa ja Yehoba mu Baibolo wami wa Kihungaria, nakuminye bingi. Kechi naumvwinepo jizhina ja Lesa pa myaka 27 yo nayanga ku chechi ne. Nasangalele pa kutaana mikumbu mu Baibolo. Kya kumwenako, nafunjile kuba’mba bafwa kafwako nangwa kintu kimo kyo bayuka ne, kijitu nobe balala tulo. (Musapwishi 9:5, 10; Yoano 11:11-15) Kabiji nafunjile ne pa milaye ya mu Baibolo yaamba pa ntanda ipya ‘mukabula lufu.’ (Lumwekesho 21:3, 4) Ntengela kukamona batata jibiji mambo mu ntanda ipya “kukekala lusanguko.”—Byubilo 24:15.

Rose naye watendekele kufunda Baibolo. Twanungulukile bukiji ne kupwisha buku ye twafunjilengamo mu bañondotu babiji! Twayanga na kupwila na Bakamonyi pa Nzubo ya Bufumu kimye kyonse. Twatundaikilwe bingi pa kumona Bakamonyi ba kwa Yehoba byo betemwa, byo bekwasha ne kukwatankana.—Yoano 13:34, 35.

Mu 1976, Rose ne amiwa betuswishishe kutwela mu Australia. Twatulukile kwajinga Bakamonyi ba kwa Yehoba. Bakamonyi betutambwijile bingi na lusekelo. Mu 1978, twabatizhiwe.

Natana mikumbu ya mepuzho ankatezhe pa myaka yavula. Kufwenya kwipi ne Yehoba Lesa, kwankwasha kutana Tata wa kine. (Yakoba 4:8) Kabiji kuketekela kuba’mba nkamonañana na batata mu ntanda ipya, kunsangajika bingi.—Yoano 5:28, 29.

Mu 1989, Rose ne amiwa twafuukwilepo kubwela ku Hungary pa kuba’mba tukafunjisheko bakwetu, ba mu kisemi ne bantutu bakwabo bintu byo twafunda mu Baibolo. Twafunjisha Baibolo bantu bavula bingi. Pa bano, 70 bepana kwingijila Yehoba kubikapotu ne bamama.

Nalombele pa myaka 17 pa kuba’mba ntaane mikumbu ku mepuzho ami. Papita myaka 39 kabiji nkilomba ne kwamba’mba, “Nemusanchila Tata wa mwiulu pa kukumbula mepuzho ami ankatazhanga kufumatu ku bwanyike.”