Kufumatu ne kala, bantu bakebesha bingi kubwela ku bwanyike ne kwikala bwikalo bwawama bwa myaka ne myaka. Kyatamakotu ke kino: Tufwa. Byambo byanembele Yoba kukila pa myaka 3,000 yapitapo, bikingila ne lelo jino.

Bantu bonse pano pa ntanda bakeba bingi kwikala myaka ne myaka. Baibolo witubuula’mba Lesa wabika mulanguluko wa kwikala myaka ne myaka mu michima yetu ne wa kukeba kuyuka byo kikekala. (Musapwishi 3:11) Inge mwalangulukishapotu bulongo, nanchi kine Lesa wa butemwe wakonsha kubika bintu byo tukeba mu michima yetu ne kubula kwibifikizha nyi? Inge mwakumbula’mba ine, mwaamba kine. Mambo a Lesa atongola lufu amba mulwanyi kabiji etubuula’mba lufu “bakeluzhiya.”—1 Kolinda 15:26.

Kwambatu kine, lufu mulwanyi wetu. Kafwako muntu nangwa umo wakonsha kukeba’mba afwe ne. Umvwe bya malwa twibimona na kwiya, twibichinuzhuka, tufyama nangwatu kwibinyema. Inge twakolwa, tukeba mashinda a kubukilwamo. Kabiji twizhikijila ku bintu byonse byakonsha kwitulengela’mba tufwe.

Nanchi kuji kintu kine kyakonsha kwitulengela kushiinwa’mba uno mulwanyi wa kala kene bakamufumyapo nyi? Ee, ko kiji. Yehoba Lesa, Mulenga kechi walengele bantu kuba’mba bakekalengatu myaka icheche ne kufwa ne. Lesa kechi wakebelenga’mba bantu bafwenga ne. Aye walengele bantu amba bekalenga myaka ne myaka pano pa ntanda, kabiji kyo alaya ukekifikizha.—Isaya 55:11.

Nanchi lufu bakelufumyapo byepi? Kufumatu kala kene, bantu bebikako bingi kuba’mba bafumyepo bintu bileta lufu, pano bino bapulwilamotu mabuula. Ne lunotu bantu batwajijila na kuba byonka bino. Bashayuka ba bya sayansi balenga michi yapusana pusana ibena kuzhikijila ne kubuka bantu ku bikola bimo. Baesekesha kukeba kuyuka byalengwa mibiji ya bilengwa byumi. Mu mapunzha avula, bantu bavula babena kwikala moba avula kukila myaka kitota yapitapo. Nangwa byonkabyo, lufu kechi lwapwa ne. O ene mambo Baibolo o aambila’mba, “bonse babwela ku maloba.”—Musapwishi 3:20.

Atweba kechi twafwainwa kuketekela mu maana a bantu kupwisha luno lukatazho lwa kala ne. Yehoba Lesa witunengezhezha jishinda ja kwitupulwishamo nangwa kwitupokolwelamo ku lufu, ne jino jishinda ke Yesu Kilishitu.