Megani: Byepi ba Sheli. Naumvwine bingi bulongo pa kwimumona ku Kivuluko kya lufu lwa kwa Yesu Kilishitu mulungu wapwa. * Kupwila kwajinga byepi?

Sheli: Kwawamine bingi, bino kuji bimo byo nabujile kumvwisha. Naumvwapo kala bantu bavuluka kusemwa kwa kwa Yesu pa Kiminshiminshi ne lusanguko lwanji pa Ishita.

Megani: Ibyo kuba’mba bantu ntanda yonse basekela Kiminshiminshi ne Ishita. Bino Bakamonyi ba kwa Yehoba bayuka’mba kyanema ke kuvuluka lufu lwa kwa Yesu. Inge mujiko na kakimye kacheche, nakonsha kwimulumbulwila ene mambo o bobila bino.

Sheli: Kijitu bulongo, kimye nji nakyo.

Megani: Bakamonyi ba kwa Yehoba bavuluka lufu lwa kwa Yesu mambo wakambizhe baana banji ba bwanga kubanga bino. Akilangulukai pa kyamwekele bobwa bufuku Yesu saka akyangye kufwa. Nanchi mwakyumvwapo kala amba wajinga na Kijiilo na baana banji ba bwanga nyi?

Sheli: Mubena kwamba pa Kijiilo Kyapeleleko nyi?

Megani: Mwafikilapotu. Kabiji kitelwa ne kuba’mba Kijiilo kya Nkambo kya Mabanga. Pa kyokya kijiilo, Yesu popo apeele baana banji ba bwanga mikambizho. Nanchi mwakonsha kutemwa kutanga bino byambo byo aambile mu Luka 22:19 nyi?

Sheli: Kijitu bulongo mwane. “Kabiji washikwile shinkwa ne kulomba ne kumutebaula ne kwibapa, ne kwamba’mba: ‘Uno ubena kwimenako mubiji wami, ye nkapana na mambo a anweba. Saka muba kino mu kumvuluka.’”

Megani: Nasanta mwane. Monai byakambizhe Yesu mu mukuku wapelako mu kino kyepelo amba: “Saka muba kino mu kumvuluka.” Kabiji Yesu saka akyangye kukambizha baana banji ba bwanga kumuvuluka, wibabuujile kine kintu kyo bafwainwa kuvuluka pe aye. Waambile’mba ukapana bumi bwanji na mambo a baana banji ba bwanga. Yesu waambile byambo bikwabo bipasha na bino biji mu Mateo 20:28. Kino kyepelo kyaamba’mba: “Mwana muntu byo aishile, kechi waishile’mba bamwingijile ne, poso amba ebengijile ne kupana bumi bwanji kwikala bukuzhi bwa kukuula bavula.” Kino kyo kilengela Bakamonyi ba kwa Yehoba kukonkana pa mwaka pa mwaka na kuvuluka lufu lwa kwa Yesu, kuvuluka kitapisho kya bukuzhi kyo apaine. Lufu lwanji lwakonsha kulengela bantu ba lukokelo kwikala na bumi.

Sheli: Naumvwapo bantu saka bamba’mba Yesu wafwile pa kuba’mba tukekale na bumi. Bino kwambatu kine, kechi nayuka mwatala kino ne.

Megani: Kechi yenu bonka mwabula kuyuka kino ba Sheli ne. Jashi ja bukuzhi bwa kwa Yesu kechi japeela ne. Bino ke jashi jimo jisolola bukine bwawama buji mu Mambo a Lesa. Abya nemupwishisha kimye nyi?

 Sheli: Ine, nkiji na kimye.

Megani: Kyawama. Natangilengapo bimo pa bukuzhi, kabiji nsakwesekako kwimulumbulwila mu jishinda japeela.

Sheli: Kyawama.

Megani: Pa kuba’mba tuyuke bulongo biji bukuzhi, patanshi twafwainwa kuyuka byo kyajinga ba Adama ne Evwa byo balengele mambo mu bujimi bwa Edena. Pa kuba’mba tuyuke byavwangwamo, twayai tutange Loma 6:23. Nanchi mwakonsha kutangapo nyi?

Sheli: Ee mwane. Pabena kwamba’mba: “Mfweto ya bundengamambo lo lufu, pa kuba bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.”

Megani: Nasanta. Pano twayai twisambe pa bino byambo. Patanshi, monai kino kyepelo byo kyatendeka amba: “Mfweto ya bundengamambo lo lufu.” Uno ye mukambizho wapeela Lesa ye aambijile bantu pa kutendekatu, mfweto nangwa’mba kilambu kya bundengamambo ke lufu. Nangwa byonkabyo, mu ntendekelo kechi kwajingapo ndengamambo ne. Adama ne Evwa bebalengele balumbuluka, ne baana babo bonse inge bajinga balumbuluka. Onkao mambo, inge kechi kwajinga kufwa ne. Adama ne Evwa ne baana babo bonse bajinga na luketekelo lwa kwikala myaka ne myaka kabiji ba lusekelo. Bino kwesakana na byo twayuka, bintu byaalukile, nanchi bino byonse byamwekele nyi?

Sheli: Ine. Adama ne Evwa bajiile kipangwa kyo bebakainye.

Megani: Mwafikilapotu. Kabiji Adama ne Evwa byo bakaine kukookela Lesa balengele mambo. Onkao mambo, basajilepo kwikala bambulwa kulumbuluka nangwa’mba bandengamambo. Byo basajilepo kechi byafwainwe kuletelatu Adama ne Evwa makatazho ne, bino ne baana babo bonse.

Sheli: Mwatazha mwepi?

Megani: Kyawama, kampe ñingijishetu kya kumwenako. Abya mwatemwa kulenga shinkwa nyi?

Sheli: Ee mwane. Natemwa bingi kulenga shinkwa.

Megani: Twambe’mba mwapota kikombola kya katataka kya kulengelamo shinkwa. Saka mukyangye ne kwikingijishapo, kyaponena panshi ne kukonkomanako pamo. Pano shinkwa ye mukalengelanga mu kyokya kikombola ukekalanga byepi? Nanchi kechi ukakonkomananga nenyi?

Sheli: Ibyo, ukakonkomananga.

Megani: Po pamotu ne Adama ne Evwa, byo basajilepo kubula kukookela Lesa, bajinga nobe “bakonkomana” nangwa kwibatamisha ku bundengamambo ne bumbulwa kulumbuluka. Kabiji na mambo a kuba’mba baikele bandengamambo saka bakyangye kusemapo baana, baana babo bonse baishile kusemwa kulutwe basemekelwe nobe “bakonkomana.” Bonse basemekelwe na bundengamambo. Mu Baibolo kyambo kya kuba’mba “bundengamambo” kechi kilumbululatu kyubilo ne, bino ne biji bwikalo bo twaswana. Kyafuminemo ke kya kuba’mba nangwa kya kuba anweba ne amiwa kechi twalengelepo mambo ne, saka tukyangyetu ne kusemwa, Adama ne Evwa byo balengele mambo balengejile baana babo bakasemwa kulutwe kumvwangakotu ne atweba ne baana betu kuswana bumbulwa kulumbuluka ne bundengamambo buleta lufu. Byonkatu byo twakutanga mu Loma 6:23, mfweto ya bundengamambo lo lufu.

Sheli: Kino kechi kyayilamo ne. Mambo ka bantu bonse o bakonsha kuyanjila myaka ne myaka na mambotu a bundengamambo bwa kwa Adama ne Evwa?

Megani: Mwaambatu bulongo, kechi kyayilamo ne. Pano bino kuji ne bikwabo byavwangwamo. Mu bunchibamambo bwanji bwaoloka, Lesa wafuukwile amba Adama ne Evwa bafwe na mambo a bundengamambo bwabo, bino atweba baana babo witupeele luketekelo lwawama. Lesa wanengezhezhe jishinda ja kufuminamo mu luno luzhachisho. Kino kyo kyalengela kuba’mba kwikale bukuzhi bwa kitapisho kya kwa Yesu. Akitalaipo jikwabo pa Loma 6:23. Panyuma ya kwamba’mba “mfweto ya bundengamambo lo lufu,” kino kyepelo kyaamba’mba: “Pa kuba bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.”  Onkao mambo, lufu lwa kwa Yesu lo lwitushinkwila jishinda ja kufuminamo mu bundengamambo ne lufu. *

Megani: Kuji kishinka kikwabo mu kino kyepelo kyo nakonsha kutemwa kwimulumbulwila.

Sheli: Akyambai tumvwe.

Megani: Monai kino kyepelo kyaamba’mba: “Bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.” Pano umvwe kya kuba Yesu ye wayanjile ne kwitufwila, kupana bumi bwanji, mambo ka kino kyepelo o kyaambila pa bukuzhi amba “bupe bo apaana Lesa”? Mambo ka o kyabujila kwamba’mba, “bupe bo apaana Yesu”? *

Sheli: Kechi nayuka bulongo ne.

Megani: Kyawama, Lesa ye walengele Adama ne Evwa kabiji yeye balengele mambo byo babujile kumukookela mu bujimi bwa Edena. Kyafwainwa kyamukolele bingi baana banji babiji batanshi byo bamusatukijile. Bino Yehoba waambile jishinda jo akapwishishamo luno lukatazho. * Waambile’mba umo mu bilengwa byanji bya mupashi ukeya pano pa ntanda, kwikala nobe muntu ne kupana bumi bwanji kwikala bukuzhi bwa kitapisho. Onkao mambo, bukuzhi bwajinga bupe kufuma kwi Lesa. Kuji ne jishinda jikwabo bukuzhi mo bwaikela ke bupe bwafuma kwi Lesa. Nanchi mwakilangulukapo Lesa byo eumvwine Yesu byo bamwipayile nyi?

Sheli: Ine, kechi nakilangulukapo ne.

Megani: Namonapo tumo tukaisha baana pano pa nzubo. Nanchi muji na baana nyi?

Sheli: Ee mwane, nji na tubiji, ka kalume ne ka kakazhi.

Megani: Byo muji bansemi, akilangulukai pe Shanji Yesu wa mwiulu aye Yehoba Lesa, byo aumvwine juba jafwile Yesu. Natazha mu kuba’mba waumvwine byepi byo ajinga mwiulu saka atala Mwananji ye atemwa bamukwata, kumwendeleka ne kumwimba binkonyi? Kabiji Shanji waumvwine byepi Mwananji byo bamupopejile pa kichi ne kumuleka amba afwenga bicheche kabiji lufu lwatama?

Sheli: Kyafwainwa kyamukolele bingi. Kechi nakilangulukapo pa byo eumvwine ne!

Megani: Kyakatazha kuyuka Lesa byo aumvwine pa kyokya kimye. Bino twayuka kuba’mba naye umvwa byonka byo tumvwa, kabiji twayuka ene mambo o aswishishe bino kumweka. Byonse bino byalumbululwa bulongo mu kinembelo kyayukanyikwa bingi kya Yoano 3:16. Nanchi mwakonsha kutangapo nyi?

Sheli: Ee mwane. Paamba’mba: “Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”

Megani: Nasanta bingi. Akimonai kwatendekela kino kyepelo. Kyaamba’mba: “Lesa watemenwe bingi ba pano pa ntanda.” Kishinka kijipo ke butemwe. Butemwe bo bwalengejile Lesa kutuma Mwananji pano pa ntanda kuba’mba etufwile. O ene mambo pa mwaka pa mwaka Bakamonyi ba kwa Yehoba o basambakena na kuvuluka lufu lwa kwa Yesu. Nanchi mwaumvwa byonse byo twisambapo nyi?

Sheli: Ee mwane, natolamo bishinka. Nasanta bingi pa kunkwasha kumvwisha bino bishinka.