Nanchi mwakilangulukapo kala pa mepuzho nabiji ano nyi? Bantu bavula nabo byobyo balanguluka. Bantu bavula kuzhokoloka ntanda yonse balanguluka pa ano mepuzho anema mu bwikalo. Nanchi mwakonsha kutaana mikumbu nyi?

Bantu bavula bakonsha kukumbula’mba, “Ee!” Mambo ka? Mambo bataana mikumbu yawama mu Baibolo. Nanchi ne anweba mwakonsha kutemwa kuyuka byamba Baibolo nyi? Inge ibyo, mwakonsha kumwenamo bingi mu kufunda Baibolo kyatutu na Bakamonyi ba kwa Yehoba. *

Ibyo kuba’mba bantu bamo inge ke balanguluke pa kufunda Baibolo bamba’mba: “Napayankana bingi.” “Wakatazha kumumvwa.” “Kimye mfwakyo kya kufundanga jonse.” Bino bakwabo nabo balanguluka byapusanako. Bakeba kufunda byamba Baibolo. Langulukai pa byaambile bamo:

• “Nayanga ku Katolika ne ku machechi a ba Polotesitanti, ku chechi ya ba Sikh ne ku ya ba Buddha kabiji nafunjile bya bupopweshi pa univesiti. Pano bino, kafwako bankumbwile mepuzho aamba pe Lesa o najinga nao ne. Kepo Kamonyi wa kwa Yehoba amfwakashijile pa nzubo. Naumvwine bingi bulongo byo akumbwilenga kwingijisha Baibolo, kabiji natendekele kufunda Baibolo.”—Gill, England.

• “Najinga na mepuzho avula bingi aamba pa bumi, bino kechi natondelwe na byakumbwilenga pashita wa mu chechi yetu ne. Pano bino, Kamonyi wa kwa Yehoba umo wakumbwile mepuzho ami kwingisha Baibolo. Byo angipwizhe inge nakonsha kutemwa kuyukilapo byavula, naswile.”—Koffi, Benin.

• “Nakebeshenga kuyuka biji bafu. Nayukile’mba bafu bakonsha kukatazha bantu bomi, bino nakebelenga kuyuka bifunjisha Baibolo. Onkao mambo, natendekele kufunda Baibolo na mukwetu wajinga Kamonyi.”—José, Brazil.

• “Natanganga Baibolo, bino nakankalwanga kumvwisha mo byatajile. Kepo Kamonyi amfwakashijile kabiji walumbulwile bulongo bungauzhi bwa mu Baibolo. Nakebelenga kuyukilapo byavula.”—Dennize, Mexico.

• “Nazhinaukilenga inge kine Lesa wanta muchima. Onkao mambo, nafuukwilepo kulomba kwi Lesa ye batongola mu Baibolo. Juba jalondejilepo, Kamonyi waishile pa nzubo kabiji natendekele kufunda Baibolo.”—Anju, Nepal.

Bino byamwekele bibena kwituvululamo byaambile Yesu amba: “Bo ba lusekelo aba baji na muchima wa kukeba kuyuka Lesa.” (Mateo 5:3) Kine, bantu bonse bakeba kuyuka Lesa. Lesa ye wakonshatu kwibakwasha kumuyuka, kabiji uba kino kupichila mu Mambo anji, Baibolo.

Pano, bi ka byavwangwa mu kufunda Baibolo? Mwakonsha kumwenamo byepi? Ano mepuzho akumbulwa mu kibaaba kyalondelapo.