Nakomejile mu Ancram, mu ka muzhi kacheche ka mu New York, U.S.A. Mu uno muzhi mwaikalanga bantu balelanga bañombe ba mukaka. Kabiji mwajinga bañombe bavula kukila bantu.

Mu uno muzhi mwajingatu chechi imotu mwayanga kisemi kyetu. Kimye kyonse pa Mulungu lukelo, Bankambo ba balume bangwamishishanga nsapato, kabiji nayanga ku Sande sukulu na ka Baibolo kacheche katoka kampele bankambo ba bakazhi. Amiwa ne bankasami babiji betufunjishe kwingila bingi na ngovu, kupa mushingi ne kukwasha bantu ba mu kimasamasa ne kusanta pa mapesho o twajinga nao.

Byo nakomene, nafumine pa nzubo ne kwikala mufunjishi. Najinga na mepuzho avula pe Lesa ne pa bumi. Baana ba sukulu bamo bajinga na maana. Bamo kechi bajinga na maana ne, bino bebikangako. Bamo balemene, bino bakwabo bajingatu bulongo. Nalangulukanga’mba bwikalo kechi bwaesakana ne. Bimye bimo, bansemi bajinga na baana balemana baambanga’mba, “Lesa byobyo akebelenga’mba mwanami akekale.” Nalangulukanga pe Lesa kyo aswishishe’mba baana bamo basemwe na bulema. Mambo mwana kafwako mambo o alengele ne.

Kabiji nalangulukanga’mba, ‘Ñanyi kintu kyawama kyo nafwainwa kuba mu bwikalo bwami?’ Namwene nobe nakomenenga bukiji. Nakomejile mu kisemi kyawama, nayile ku masukulu awama, kabiji luno mbena kwingila nkito yonka yo nakebanga. Bino mu myaka yalondejilepo namwenenga’mba bwikalo bwami kechi bukalumbuluka ne. Nalangulukilenga’mba nkasongolwa ne kusema baana, kutwela nkito ne kutambula penshonyi kufikatu ne byo nkaya na kwikala mo balamina bakote. Nalangulukanga’mba kana kwajinga bikwabo byo nakonsheshe kuba mu bwikalo.

Mu kimye kya kisalo, naile na kufwakasha na bafunjishi bakwetu ku Europe.Twayile ku Westminster Abbey, ku Notre-Dame de Paris, ne ku Vatican, ne ku machechi akwabo acheche. Konse ko nayanga nebepuzhanga mepuzho o najinga nao. Byo nabwelele ku nzubo ku Sloatsburg, mu New York, nayile ku machechi avula bingi. Bino kafwako muntu nangwa umo wakumbwile mepuzho ami ne.

 Juba jimo, mwana wa sukulu wa myaka 12 wansolomokele ne kungipuzha mepuzho asatu. Patanshi, wangipwizhe inge nayukile amba wajinga Kamonyi wa kwa Yehoba. Nakumbwile’mba ee. Kya bubiji, wangipwizhe inge nakonsha kutemwa kuyukilapo bikwabo pa Bakamonyi ba kwa Yehoba. Nakumbwile jikwabo amba ee. Kya busatu, wangipwizhe ko ngikala. Byo namubuujile ko ngikala, nayukile’mba twikalatu kipikipi na ko bekela. Kechi nayukile’mba ano mepuzho asatu angipwizhe uno kamwale akapimpula bwikalo bwami kikupu ne.

Palutwe kacheche, waishile na nkinga ku nzubo yami ne kutendeka kumfunjisha Baibolo. Namwipwizhe mepuzho o naipuzhanga bantangi ba bupopweshi. Kupusanako nabo, aye wammwesheshe mikumbu yawama yo nkyangye kumvwapo kwingijisha Baibolo wami!

Bintu byo nafunjile mu Baibolo byandetejile lusekelo kabiji natondelwe. Natemenwe bingi byo natangile 1 Yoano 5:19, waamba’mba: “Pano pa ntanda ponse paji mu bulume bwa kwa aye mubi.” Naumvwine bingi bulongo pa kuyuka’mba Satana ye ulengela makatazho onse o tupitamo, ne kuba’mba Lesa ye ukeapwisha. (Lumwekesho 21:3, 4) Kabiji nayukile’mba Baibolo walumbulula bingi bulongo kino. Nangwa kya kuba Kamonyi wamfunjishanga Baibolo wajinga na myaka 12, nayukile’mba bukine bwikalatu bukine, kechi na mambo a ubena kukufunjisha ne.

Nangwa byonkabyo, nakebeshenga kumona inge Bakamonyi boba byonka byo basapwila. Kya kumwenako, kamwale waambishetu kuba’mba bena Kilishitu ba kine bafwainwa kwikala na byubilo nabiji butekanye ne lusa. (Ngalatiya 5:22, 23) Nafuukwilepo kumweseka ne kumona inge uji na bino byubilo. Juba jimo, nakebeletu kuba’mba nkelwe kuya na kufunda. Nalangulukilenga’mba: ‘Nanchi usakumpembelela nyi? Inge ibyo, nanchi usakuzhingila byo nakelwa nyi?’ Byo nasendukilenga pa nzubo, namumwene saka aikala pa kibelo na kumpembelela. Wanyemejile ku motoka wami ne kuñambila’mba: “Nashi ngyenga ku nzubo na kubuula bamama amba batumine ku kipatela ne ku bakapokola kumona inge mujitu bulongo, mambo mukyangye kukelwapo kwiya na kufunda. Naji kwakamwa bingi!”

Kimye kikwabo, namwipwizhe bwipuzho bo nalangulukilenga’mba bwakonsha kukatazha mwanyike wa myaka 12 kukumbula. Nakebelenga kuyuka inge wakonsha kukumbula. Byo namwipwizhe, wantajile bingi ne kuñambila’mba: “Buno bwipuzho bwakosa. Nsakunemba nkepuzhe bansemi.” Byonka byo aambile, pa kwiya jikwabo na kumfunjisha waletele Kyamba kya Usopa kyakumbwile bwipuzho bwami. Kino kyo kyandengejile kutemwa Bakamonyi, mambo mabuku abo ajinga na mikumbu ya mu Baibolo yakumbwile mepuzho ami. Natwajijile kufunda na uno kamwale, kabiji byo papichile mwaka umo nabatizhiwe ne kwikala Kamonyi wa kwa Yehoba. *

Byo nataaine mikumbu yawama ku mepuzho o najinga nao, nakebeshenga bingi kubuulako ne bakwetu. (Mateo 12:35) Kimye kitanshi, ba mu kisemi kyami bakainenga byo naitabijilemo. Mu kuya kwa moba, balekele kukana. Bamama byo bajinga pepi kufwa, batendekele kufunda Baibolo. Nangwa kya kuba bafwile bukiji saka bakyangye kubatizhiwa ne, bino naketekela namba bafuukwilepo kwingijila Yehoba.

Mu 1978, nasongwelwe ku Kamonyi wa jizhina ja Elias Kazan. Mu 1981, amiwa ne ba Elias betwichile kwikala ke ba mu kisemi kya Betele mu United States. * Kyataminekotu, twaingijilepotu myaka ina ba Elias bafwa. Nangwa kya kuba nafwijilwe, natwajijile kwingijila pa Betele, kabiji kino kyandengejile kuta muchima pa mwingilo ne kuntekenesha.

Mu 2006, nasongwelwe ku ba Richard Eldred, nabo ba mu kisemi kya Betele. Amiwa ne ba Richard twatwajijila kwingila mwingilo wa pa Betele. Kuyuka bukine pe Lesa, kundengela kulanguluka’mba kechi nataanatu mikumbu yo nakebelenga ne, bino nataana ne nkebelo ya bwikalo, kabiji byonse bino byatendekejiletu pa mepuzho asatu angipwizhe kamwale. ▪