Baibolo witubuula’mba kukekala lonaiko mu kimye kya mpelo. Waamba’mba: “Kukekala malwa akatampe, akyangye kumwekapo kala kufumatu ku ntendekelo ya pano pa ntanda kufika ne buji lelo . . . Kabiji aa moba umvwe bakabule kwiakepeshako, kafwako muntu ukapuluka ne.” (Mateo 24:21, 22) Bino Lesa witulaya kuba’mba bantu bavula bakapuluka: “Pano pa ntanda pabena kupita . . . , pakuba awa uba kyaswa muchima wa Lesa ukekala myaka ne myaka.”—1 Yoano 2:17.

Inge mukeba kupuluka kimye kikapita ino ntanda ne ‘kwikala myaka ne myaka,’ mwafwainwa kuba byepi? Nanchi mwafwainwa kutendeka kulumbika kajo mu matala nangwa kwinengezha na bintu bya ku mubiji nyi? Ine. Baibolo witukambizha kuta muchima ku bintu bikwabo. Baibolo waamba’mba: “Byo kiji kuba’mba abino bintu byonse bikasunguluka mu jino jishinda, mwafwainwa kwikala bantu baji na byubilo byazhila ne kwingila mingilo ya kunemeka Lesa byo mubena kutengela ne kukebesha kwiya kwa juba ja Yehoba.” (2 Petelo 3:10-12) Kino kinembelo kyamwesha’mba “abino bintu byonse” bikasunguluka byavwangamo bantangi ba ino ntanda yayula na mazhikakanwa ne bonse batundaika bano bantangi kukila Lesa. Kine, inge twilumbikila bintu bya ku mubiji, bino bintu kechi byakonsha kwitukwasha kupuluka ano malwa ne.

Kwa kubula nangwa kuzhinaukatu ne, kupuluka kwetu kwaimena pa kwipana kwi Yehoba Lesa ne kufunda byubilo bimutokesha ku muchima. (Zefwaniya 2:3) Mu kifulo kya kulondela milanguluko ya bantu bavula ne kulengulula biyukilo bibena kumwesha patoka kuba’mba tubena kwikala mu bimye byakatazha, twafwainwa “kukebesha kwiya kwa juba ja Yehoba.” Bakamonyi ba kwa Yehoba bakonsha kwimumwesha mu Baibolo byo mwakonsha kupuluka pa joja juba jibena kwiya.