Nakomejile mu mpunzha ya bayanji mu muzhi wa Montreal. Batata bafwile saka njitu na bañondo batanu na umo, onkao mambo bamama bashajile na mutembo wa kulama kisemi. Yami najinga mwanyike pa baana 8.

Byo nakomenenga, bintu byo nayukiletu mu bwikalo ke kwingijisha bizhima, makayo a kuchikapo mali, bukapondo ne kupwanañana na bambanzhi. Byo nafikizhe myaka 10, natendekele kwingila tumingilo twantumanga bapite ne basulu bakongweshanga mali a kaloba. Natemenwe bingi kubepa ne kujimbaika bantu. Bubela ne bujimbijimbi byaalukiletu nobe kajo kwi amiwa.

Byo nafikizhe myaka 14, naikele sendwe mwine wayukile kubepa bantu. Kya kumwenako, napotanga makoloko, makosa ne tumbalaminwe byo bashingako ngolode. Nabikangapo tutetesho twa bubela twa kumwesha’mba bino bintu byalengelwe na ngolode wa mali avula bingi. Kabiji nayanga na kwibipotesha mu mikwakwa ne mu mapunzha mo bemikila myotoka pa mashitolo akatampe. Naikalanga na mali avula bingi mu kimye kichechetu. Kimye kimo naikele na mali afika ku $10,000 (K63, 000) mu juba jimotu.

Byo nafikizhe myaka 15, bampangile pa sukulu po balamina banyike balenga mambo po nafundanga, onkao mambo, kechi najinga na kwa kwikala ne. Nalaalanga mu mikwakwa ne mu mapunzha muya bantu na kukokoloka, nangwa mu mazubo a balunda inge bansenda.

Na mambo a byubilo byami bya bujimbijimbi, javula bakapokola bankwatanga. Pano bino, kechi bantayilepo pa kaleya ne, mambo kechi napoteshanga bipe bya kwiba ne. Nangwa byonkabyo, bandipilishanga mali avula bingi na mambo a kulenga mali mu jishinda ja bujimbijimbi ne kupotesha bintu kwa kubula bipepala. Na mambo a kuba kechi najinga na moyo ne, basulu bakongweshanga mali a kaloba bantumanga kuya na kwibakendelako mali abo. Kuba bino kwajinga kubika bumi bwami mu kizumba, onkao mambo naendanga na buta. Bimye bimo naendanga ne na bambanzhi.

Najinga na myaka 17 kimye kitanshi kyo namwenepo Baibolo. Mukambwe wami  ye naikalanga nanji watendekele kufunda Baibolo na Bakamonyi ba kwa Yehoba. Pano bino, nakaine kulondela mikambizho ya mu Baibolo ikanya byubilo byatama, onkao mambo, namushile uno mukambwe wami ne kuya na kwikala na mwanamukazhi mukwabo.

Kintu kyapimpwile bwikalo bwami kyaubiwe kimye mukambwe wami wa bubiji kyo atendekele kufunda na Bakamonyi. Wapimpwile byubilo byanji, kabiji naumvwine bingi bulongo pa kumona byo atendekele kukooka muchima ne kutekanya. Naswile kuya ku Nzubo ya Bufumu na kupwila na Bakamonyi ba kwa Yehoba. Byo nayile kokwa, nataine bantu ba mushingi ne lusa kabiji bantambwijile bingi bulongo. Bano bantu bapusene bingi na bantu ba mu ntanda bo nayukile. Kufumatu ku bwanyike namonanga kuba’mba balongo bami kechi bantemwa ne. Butemwe bwamwesheshe Bakamonyi ba kwa Yehoba kyo kintu kyo nakebelenga. Bakamonyi byo bangipwizhe kuba’mba batendeke kumfunjisha Baibolo, nafikenejiletu kuswa.

Byo nafunjilenga mu Baibolo byapulwishe bumi bwami. Mambo kimye kimo naumvwañene na bakwetu babiji bambanzhi kuba’mba tukaye na kwiba mali pa kuba’mba nkabwezhe nkongole yafikile ku $50,000 (K315, 000) yo najinga nayo na mambo a makayo a kuchikapo mali. Nsanta bingi luno mambo kechi naile na kulukukañana ne. Bakwetu abo bayile. Umo bamukwachile, kabiji mukwabo bamwipayile.

Byo natwajijile kufunda Baibolo, nataine kuba’mba nafwainwa kupimpula byubilo byami. Kya kumwenako, nafunjile byaamba Baibolo mu 1 Kolinda 6:10 kuba’mba: “Bangivi, ba lunkumbwa, bapendwapendwa, batukana, ne baja bya lunkanankana kechi bakaswana Bufumu bwa Lesa ne.” Byo natangile kino kyepelo ne kulanguluka pa byubilo byami byatama, najijile ne mipolo. Naishile kuyuka’mba nafwainwa kupimpula bwikalo bwami bonse. (Loma 12:2) Najinga kapondo kabiji najinga bingi na bukaji, mu bwikalo bwami bonse naendangatu na kubepa.

Pano bino, byo nafunjilenga Baibolo naishile kuyuka kuba’mba Yehoba uji bingi na lusa kabiji ulekelako bantu mambo. (Isaya 1:18) Nalombelepo bingi ne kumusashijila Yehoba kuba’mba ankwashe kuleka byubilo bincha. Lesa wankwashishe kupimpula byubilo byami byonse pachepache. Kintu kikatampe kyo twaubile na mukambwe wami ke kunembesha masongola etu.

Pa kyokya kimye, najinga na myaka 24 saka nasongola kabiji najinga ne na baana basatu. Natendekele kukeba nkito yafwainwa. Pano bino, kechi nafunjile kufika palepa ne, kabiji kechi nakitwelelepo nkito yalumbuluka ne. Onkao mambo, nalombele jikwabo kwi Yehoba ne kumusashijila. Kepo naimene ne kuya na kukeba nkito. Nabuulanga batwezha makito amba mbena kukeba kupimpula bwikalo bwami ne kwingila nkito yafwainwa. Bimye bimo nebabuulanga namba mbena kufunda Baibolo kabiji mbena kukeba kwikala ngikazhi wawama. Bantu batwezha makito bavula bakananga kuntwezha nkito. Kyapeleleko, nebabuujile bintu byatama byonse byo napichilemo. Byo nebabuujile bino, batwezhezhenga nkito baambile’mba: “Kechi nayuka kyalengela ne, bino muchima wambula’mba nafwainwa kukutwezha nkito.” Namwene kuba’mba milombelo yami yakumbulwa. Mu kuya kwa kimye, amiwa ne mwina kwami twabatizhiwe ne kwikala Bakamonyi ba kwa Yehoba.

Ne luno nkiji mumi na mambo a kulondela mafunde a mu Baibolo ne kwikala bwikalo bwa bwina Kilishitu. Nji na kisemi kyawama bingi. Kushiinwa kuba’mba Yehoba wandekelako mambo kundengela kwikala na jiwi ja mu muchima jatoka.

Naingila mwingilo wa kimye kyonse pa myaka 14, ne kukwasha bantu kufunda byaamba Baibolo kabiji luno ne mwina kwami naye watendeka mwingilo wa kimye kyonse. Kabiji pa myaka 30 yapitapo, nakwasha bakwetu 22 bo ñingila nabo kutendeka kupopwela Yehoba. Ne luno nkiya ku mashitolo, bino kechi ngya na kujimbaika bantu byonka byo naubanga kala ne. Luno inge naya kokwa, ngya na kwisamba nabo bintu byo naitabilamo. Ngya na kwibapa luketekelo lwa kukekala mu ntanda ipya iji kulutwe mukabula bujimbijimbi. —Salamo 37:10, 11.