MUTWE WA PA NKUPIKO | NANCHI MPELO YAFWENYA PEPI NYI?
Nanchi “Mpelo” Ilumbulula Ka?
Inge mwaumvwa byambo bya kuba’mba, “Mpelo yafwenya pepi,” ñanyi bintu biiya mu milanguluko yenu? Ñanchi mulanguluka pa pashita ubena kubijika na jiwi jikatampe ne Baibolo ku maboko nyi? Inyi mulanguluka pa mwanamulume wakikulumpe uji na bwevu bwalepa wavwala munkukumba wakasa ne mushipi mu lubunda, saka aimana pachimpukila mukwakwa wakwata ne kakipabi paji byambo bibena kwamba pa mpelo? Ino milanguluko ilengela bantu bamo kwakamwa, kabiji bakwabo nabo bazhinauka nangwa kulengulula bino byambo amba biselatu.
Baibolo waamba’mba: ‘Mpelo ikafika.’ (Mateo 24:14) Kabiji ino mpelo itelwa amba, “juba jikatampe ja Lesa” ne kuba’mba, “Amagedonyi.” (Lumwekesho 16:14, 16) Ibyo kuba’mba bupopweshi bwamba byapusana pusana pa mpelo kabiji bavula balanguluka pa bintu bilengela moyo. Pano bino, Baibolo walumbulula patoka mpelo byo iji. Kabiji Mambo a Lesa etubuula inge mpelo iji pepi nangwa ne. Kyakilamo kunema, Baibolo witufunjisha byo twakonsha kupuluka. Bino, patanshi twayai tutokeshepo pa mafunjisho amo a bubela ne kulumbulula mpelo byo iji. Kwesakana na byaamba Baibolo, nanchi “mpelo” ilumbulula ka?
MPELO KECHI ILUMBULULA BINO NE
-
MPELO KECHI ILUMBULULA KUPYA KWA NTANDA NA MUJILO NE.
Baibolo waamba’mba: “[Lesa] waikajika ntanda pa bitendekesho byayo; kabiji ikekalanga pa mpunzha yayo myaka ne myaka.” (Salamo 104:5) Kino kinembelo ne binembelo bikwabo bitubuula amba Lesa kechi ukonauna ino ntanda nangwa kuswisha bantu kwiyonauna ne.—Musapwishi 1:4; Isaya 45:18.
-
MPELO KECHI IKEYATU KYA KUBAZHIMUNA NE.
Baibolo witubuula’mba mpelo ikeya pa kimye kyatongolwa, ko kuba’mba Lesa wiitongwela kimye kyayo. Baibolo waamba’mba: “Pa mambo a joja juba nangwa kimye kafwako wayuka ne, nangwatu bamalaika ba mwiulu nangwatu Mwana, kanatu Batata. Jimukai, mukenkentenga, mambo kechi mwayuka kimye kyatongolwa ne.” (Mako 13:32, 33) Twamonatu patoka’mba Lesa (“Batata”) wanengezha “kimye kyatongolwa” kyo akaletelapo mpelo.
-
MPELO KECHI IKEYA NA MAMBO A BANTU NANGWA MABWE AKATAMPE ATEBAUKA MU LWELELE NE.
Ñanyi bintu bikaleta mpelo? Kinembelo kya Lumwekesho 19:11 kyaamba’mba: “Namwene mwiulu saka mwashinkuka, kabiji namwene mbili utoka. Ne yewa waikelepo utelwa’mba, wa Kishinka kabiji wa Kine.” Kyepelo 19 kyanungapo’mba: “Kabiji namwene awa lukinyama ne bamfumu ba pa ntanda ne mazhita abo saka bakonkana pamo kuba’mba baye na kulwa na yewa waikele pa mbili ne nzhita yanji.” (Lumwekesho 19:11-21) Nangwa kya kuba byambo biji mu bino byepelo ke bya bungauzhi, bino kishinka kyo twamonapo ke kino: Lesa ukatuma nzhita ya bamalaika kwiya na konauna balwanyi banji.
Byambo bya mu Baibolo byaamba pa mpelo ke mambo awama, kechi atama ne
MPELO BYO ILUMBULULA
-
MPELO KE KIMYE KIKAPWA MAKAFULUMENDE A BANTU AKANKALWA KULAMA.
Baibolo walumbulula’mba: “Lesa wa mwiulu ukaleta bufumu [kafulumende] bo bakabula konauna. Kabiji Danyela 2:44) Byonka byo twaji kutanga mu kishinka kya busatu, “bamfumu ba pa ntanda ne mazhita abo” byo bakakonkana pamo “kuba’mba baye na kulwa na yewa [waikala] pa mbili ne nzhita yanji,” bakebonaunatu bonse.—Lumwekesho 19:19.
buno bufumu kechi bakebupana ku bantu bangi ne. Bukavingakanya ne kupwisha buno bufumu bonse kabiji abo bukekala myaka ne myaka.” ( -
MPELO KE KIMYE KIKAPWA MAKONDO, BUKAPONDO NE NSHIJI.
“[Lesa ukapwisha] nkondo pa ntanda ponse.” (Salamo 46:9) “Baoloka bo bonkatu bakekala mu ntanda, ne babula kaneneno bo bakashalamo. Pakuba bantu babi bakebonauna ne kwibafumyapo pano pa ntanda, ne ba bongozhi bakebafumyapo.” (Byambo bya Maana 2:21, 22) “Tala! Mbena kulenga bintu byonse kwikala ke bipya.”—Lumwekesho 21:4, 5.
-
MPELO KE KIMYE KIKAPWA BUPOPWESHI BONSE BUBULA KUKOOKELA LESA NE KUKWASHA BANTU.
“Bangauzhi babo baula bintu bya bubela, ne bañanga balama bantu monka mo bakebela. . . . Pano mukoba byepi umvwe mpelo ya bino bintu yafika?” (Yelemiya 5:31) “Pa joja juba, bavula bakañambila’mba: ‘Nkambo, Nkambo, nanchi kechi twaawilenga mu jizhina jenu ne kupanga bandemona kwingijisha jizhina jenu nenyi? Kabiji nanchi kechi twaubilenga mingilo ya kukumya mu jizhina jenu nenyi?’ Ponkapo nkebambila namba: ‘Kechi nemuyuka ne! Fumai papo, anweba muba byatama!’”—Mateo 7:21-23.
-
MPELO YA BANTU BABENA KUTAMISHA NTANDA NE KUTUNDAIKA BYUBILO BYATAMA.
Yesu Kilishitu waambile’mba: “Pa kyo kino po paimena luzhachisho: kuba’mba kyeya kyaiya pano pa ntanda, bino bantu batemwako mfishi kukila kyeya, mambo mingilo yabo yatama.” (Yoano 3:19) Baibolo waambapo kimye kimo ntanda yonse kyo yaonawinwe mu moba ajingako muntu wa kishinka aye Nowa. “Aya ntanda yaonaikile kimye kyo yalobele mu mema. Kabiji na jiwi jintutu jimo, meulu ne ntanda bijipo luno byalaminwa mujilo kabiji bibena kulamwa kukafikatu ne ku juba ja kije ne ja lonaiko lwa bantu babula kwakamwa Lesa.”—2 Petelo 3:5-7.
Twamona kuba’mba Baibolo waesakanya “juba ja kije ne ja lonaiko” ku kimye kyaonawinwe “ntanda” yajingako mu moba a kwa Nowa. Ñanyi ntanda yaonawinwe? Ntanda mo twikala kechi yo yaonawinwe ne, bino baonawinwe ke “bantu babula kwakamwa Lesa,” nangwa’mba balwanyi banji. Mu “juba ja kije” ja kwa Lesa, aba bonse bakafuukulapo kwikala balwanyi ba Lesa bakebonauna. Pakuba balunda na Lesa bakapuluka, byonka byapulukile Nowa ne kisemi kyanji.—Mateo 24:37-42.
Akifwanyikizhai pano pa ntanda byo pakawama kimye Lesa kyo akafumyapo banguba bubi bonse! Kine, byambo bya mu Baibolo byaamba pa mpelo ke mambo awama, kechi atama ne. Bino, mwakonsha kushikisha’mba: ‘Nanchi Baibolo witubuula kimye kikeya mpelo nyi? Yafwenya pepi nyi? Nakonsha kupuluka byepi?’