Inge bansemi betemwa ne kwipa mushingi, baana babo bakoma bingi bulongo. (Kolose 3:14, 19) Bansemi bawama batemwa baana babo kabiji bebatakaika, byonkatu Yehoba Lesa byo atakaikile Mwananji.—Tangai Mateo 3:17.

Shetu wa mwiulu uteleka ku bakalume banji, kabiji uta bingi muchima ku byo babena kumvwa. Bansemi nabo bafwainwa kufunjila kwi aye ne kuteleka ku byamba baana babo. (Yakoba 1:19) Bafwainwa kuyuka bibena kulanguluka baana babo, nangwa inge kechi byayilamo ne.—Tangai Kubala 11:11, 15.

Byo muji bansemi, muji na luusa lwa kubikila baana benu mizhilo ya kulondela. (Efisesa 6:1) Funjilai kwi Lesa byo oba. Umwesha byo atemwa baana banji pa kwibabikila mizhilo ya kulondela ne kwibabuula bintu byatama byakonsha kufumamo inge babula kwiilondela. (Ntendekelo 3:3) Aye kechi ukanjikizha bantu kumukookela ne, bino wibafunjisha byo bakonsha kumwenamo mu kuba byawama.—Tangai Isaya 48:18, 19.

Ibikilai kikonkwanyi kya kukwasha baana benu kutemwa Lesa. Inge mwauba bino, baana benu bakobanga bintu byawama nangwatu inge baji kwa bunke. Byonkatu Lesa byo afunjisha bantu kupichila mu byawama byo oba, ne anweba funjishainga baana benu kutemwa Lesa kupichila mu kumona byubilo byenu byawama.—Tangai Mpitulukilo ya mu Mizhilo 6:5-7; Efisesa 4:32; 5:1.