BYO kiji kuba’mba byambo bya kuba’mba “ulengulula Kilishitu” bebingijisha pa kimye kyabaya pa kulumbulula bintu byapusana pusana kutatwila ku bamfumu kufika ne ku mafilimu, kyayilamo bingi kwipuzha’mba: Nanchi ulengulula Kilishitu ye ñanyi? Nanchi bino byambo bikingila ne luno nyi? Pa kuba’mba tuyuke ulengulula Kilishitu, twafwainwa kupesa pesa mu Baibolo, mambo bino byambo bitanwamo bimye bitanu.

Mutumwa Yoano ye yenkatu pa banembi ba Baibolo waingijishe byambo bya kuba’mba “ulengulula Kilishitu.” Yoano walumbulwile byepi uno ulengulula Kilishitu? Akimonai byambo byo anembele mu nkalata yanji itanshi. Wanembele’mba: “Anweba baana ba bacheche, kino kyo kimye kyapelako kabiji byonkatu byo mwaumvwine’mba ulengulula Kilishitu ubena kwiya, ne luno balengulula Kilishitu bavula bamweka kala, kino kitulengela kuyuka’mba kino kyo kimye kyapelako. Bano bantu bafumine mwi atweba, bino kechi bajinga betu ne . . . Nanchi muntu wa bubela kechi yewa ukana’mba Yesu kechi ye Kilishitu nenyi? Uno ye ulengulula Kilishitu, yenka ukana Tata ne Mwana pamo.”—1 Yoano 2:18, 19, 22.

Tufunjilako ka ku bino byambo? Yoano waambile’mba “balengulula Kilishitu bavula,” kumwesha’mba ulengulula Kilishitu kechi muntu umo ne, bino ke jibumba ja bantu. Bantu nangwa bipamo bimenako ulengulula Kilishitu basampanya byambo bya bubela, bamba’mba Yesu kechi ye Kilishitu nangwa Mesiasa ne, kabiji bavulañanya bantu ne kwibalengela kubula kuyuka bishinka pe Lesa ne Mwananji, aye Yesu Kilishitu. Bano balengulula Kilishitu bebepekezha’mba abo bene ye Kilishitu nangwa’mba bo bamwimenako. Pano bino, byo kiji kuba’mba bano bantu “bafumine mwi atweba,” ko kuba’mba bakaine mafunjisho a kine a mu Baibolo. Kabiji bano bantu bajingako ne kimye Yoano kyo anembelenga nkalata yanji, mu “kimye kyapelako,” kampe kulumbulula kimye batumwa bashajilepo kyo bafwile.

Ñanyi bintu bikwabo Yoano byo anembele pa ulengulula Kilishitu? Wapaine lujimuno pa mambo a bangauzhi ba bubela amba: “Byambo byonse byamba pe Yesu Kilishitu amba waishile kwikala muntu, byo byafuma kwi Lesa. Bino byambo byonse bibula kwamba pe Yesu, kechi byafuma kwi Lesa ne. Kabiji bino byo byambo bya kwa yewa ulengulula Kilishitu ye twaumvwine’mba ubena kwiya, kabiji wafika kala pano pa ntanda.” (1 Yoano 4:2, 3) Kabiji mu nkalata yanji ya bubiji Yoano waambilepo bingi pa kino. Waambile’mba: “Bajimbijimbi bavula bapalañena pano pa ntanda, bo bantu bakana’mba Yesu Kilishitu kechi waishile kwikala muntu ne. Muntu uba bino ye mujimbijimbi kabiji ye ulengulula Kilishitu.” (2 Yoano 7) Kyamwekeshatu patoka kuba’mba Yoano wayukile kuba’mba ulengulula Kilishitu ke bupopweshi bonse busampanya byambo bya bubela pe Yesu Kilishitu ne mafunjisho a kwa Yesu.

Kala Yoano saka akyangye kunemba pa bapopweshi ba bujimbijimbi, Yesu Kilishitu wajimwineko baana banji ba bwanga amba: “Jimukai na bangauzhi ba bubela beya kwi anweba mu biseba bya mikooko, bino mu michima yabo yo misuka ikaji.” (Mateo 7:15) Mutumwa Paulo naye wajimwineko bena Kilishitu ba mu Tesalonika amba: “Kange muleke muntu nangwa umo emujimbaike nangwa pachechetu ne, mambo aja juba [ja Yehoba] kechi jikafika ne, poso kusenduka mu lwitabilo kukeye patanshi ne muntu wa bumpupabizhila akamweke, mwana wa lonaiko.”—2 Tesalonika 2:3.

Onkao mambo, mu myaka kitota kitanshi bangauzhi ba bubela ne bantu basenduka mu lwitabilo bajinga konka, saka bebikako kuba’mba bakokeshe kipwilo kya bena Kilishitu. Bajimbijimbi ba bupopweshi bonse ne boba basampanya bubela pe Yesu Kilishitu ne byo afunjishe bo bo atelele Yoano amba, “balengulula Kilishitu.” Kwesakana na byalumbulwile Paulo, Yehoba umona bano bantu bonse amba ke “mwana wa lonaiko.”

Pano nga lelo kiji byepi? Ne lelo jino, bantu ne bipamo batwajijila kulengulula Kilishitu ne mafunjisho anji. Basampanya bubela ne bujimbijimbi na mulanguluko wa kukeba kuvulañanya bantu kuba’mba babule kuyuka Shetu aye Yehoba Lesa ne Mwananji, Yesu Kilishitu. Onkao mambo, twafwainwa kujimuka na ano mafunjisho a bujimbijimbi. Twayai twisambe pa mafunjisho abiji.

Pa myaka yavula yapitapo, machechi aletele lufunjisho lwa bubela lwa Balesa Basatu, ne kwamba’mba Tata ne Mwana ke muntutu umo. Kupichila mu kuba bino, balengulula Kilishitu bavulañanya bantu ne kwibalengela kukankalwa kuyuka Yehoba Lesa ne Yesu Kilishitu. Luno lufunjisho lwakatazha lulengela bantu bakishinka kukankalwa kulondela byaubanga Yesu Kilishitu ne kufwenya kwipi ne Lesa, byonka Baibolo byo atundaika kuba.—1 Kolinda 11:1; Yakoba 4:8.

Machechi alengela bantu kukilamo kuvulañana na mambo a kuba batuntulula ma Baibolo mo bafumya jizhina ja Lesa, ja kuba’mba Yehoba. Nangwa kya kuba jizhina ja Yehoba jitanwamo bimye nobe 7,000 mu binembelo bine bitanshi, abo bejifumyamo mu Baibolo. Ki ka kyafumamo? Bantu bakankalwa kuyuka Lesa.

Pano bino, kuyuka jizhina ja Lesa ja kuba’mba Yehoba, kwakwasha bapopweshi bakishinka bavula kufwenya kwipi ne Lesa. Kino kyo kyamwekejile ba Richard. Bavuluka kimye kyo besambilenga na Bakamonyi ba kwa Yehoba babiji. Ba Richard baambile’mba: “Bantangijile jizhina ja Lesa wa kine Yehoba mu Baibolo. Naumvwine bingi bulongo pa kuyuka kuba’mba Lesa uji na jizhina. Kino kyo kyajinga kimye kitanshi kuyuka kino kishinka.” Kufumatu kyo kya kimye, ba Richard bapimpwile byubilo byabo pa kuba’mba balondelenga mizhilo ya mu Baibolo ne kutokesha Yehoba ku muchima. Baambile’mba: “Kuyuka jizhina ja Lesa kwandengejile kulenga bulunda bwawama ne aye.”

Pa myaka yavula yapitapo, ulengulula Kilishitu walengela bantu kwikala mu mfishi ya ku mupashi. Pano bino, kufunda Mambo a Lesa Baibolo, kwitulengela kuyuka bulongo ulengulula Kilishitu ne kwitwamunako ku mafunjisho a bubela ne bujimbijimbi bwa balengulula Kilishitu.—Yoano 17:17.