MUTWE WA PA NKUPIKO | BYA KUBA NA BIJIKILA
Bijikila Bijitu Konse!
“Nayile namba mpote kajo mu shitolo, pano bino nataainemotu mashikono kabiji mutengo wabayile bingi! Juba jalondejilepo, nataaine’mba kajo konse kapwa mu mashitolo.”—Paul, Zimbabwe.
“Bamwatawami bambuujile’mba babena kwitunyema. Nkooba byepi umvwe bannyema? Nkalama byepi baana bami?”—Janet, United States.
“Inge alamu yajila, nanyemanga kuya na kufyama ne kulaala panshi byapichilenga mpolopolo. Byo papichile kimye, nashajiletu saka nzakama.”—Alona, Israel.
Tubena kwikala mu kimye kya bijikila ko kuba’mba, “bimye byakatazha.” (2 Timoti 3:1) Bantu bavula mali bafwao, bisemi byaabenamo, nkondo, bikola bipayañana, bya malwa biyakotu bine nangwa bya malwa bileta bantu. Kabiji bantu baji na bijikila byavula, nabiji bya kuba’mba: ‘Nanchi kintu kyatumba pa mubiji wami kisakwaluka ke kansa nyi?’ ‘Bankana bami bakekala bwikalo bwa mutundu ka?’
Kechi bijikila byonse byatama ne. Javula twikala na bijikila inge tubena kunemba mpeso, kubapo bimo nangwa kukeba nkito. Kuchina bizumba kwitukwasha kubula kwitwezha mu makatazho. Pano bino, kukizhamo kwikala na bijikila kwipayañana. Bya kukebakeba bya katataka byataana kuba’mba nangwatu kubula kukizhamo kwikala na bijikila kubena kulengela bantu bakoma kukila pa 68,000 kufwa bukiji. O ene mambo Yesu o aipwizhizhe’mba: “Ñanyi mwi anweba pa kubambisha muchima wakonsha kunungako kyubichi umo ku bumi bwanji?” Bijikila bilengelatu muntu kufwa bukiji. Yesu waambile’mba: “Kilekai kubambisha michima.” (Mateo 6:25, 27) Nanchi kyakonsheka muntu kwikala kwa kubula bijikila nyi?
Mukumbu ke wa kuba’mba twafwainwa kwingijishanga maana alumbuluka, kukosesha lwitabilo lwetu mwi Lesa ne kwikala na luketekelo lwakosa mu bintu bya kulutwe. Nangwa kya kuba luno kechi tubena kupita mu makatazho ne, kampe twakonsha kupitamo mu kimye kya kulutwe. Onkao mambo, twayai tumone ano mashinda byo akwashishe Paul, Janet ne Alona kuyuka mwa kubila na bijikila.
