Paul, shetu uji na baana babiji waamba’mba, “Mali byo apwile bulume mu kyalo kyetu, mutengo wa kajo wabayile bingi kabiji kajo kakatezhe kwikataana. Twatantaminanga kajo, pano bino kapwanga saka tukijitu mu munongo. Bantu banyaine bingi na nzala, bamo bapungijilengatu mu mikwakwa. Mutengo wa kupota bintu wabayile bingi. Kyapeleleko, mali a mu kyalo kyetu alekele kwingila. Mali ami onse a ku banki, ne mali a bukwasho o natambulanga ne a penshonyi onse aonaikile.”

Paul wayukile’mba pa kuba’mba kisemi kyanji kikale na bumi, wafwainwe kwikala na “maana alumbuluka.” (Byambo bya Maana 3:21) Walumbulula’mba: “Nayukile mwingilo wa malaichi, pano bino kechi nasalanga nkito ya kwingila ne, kabiji natambulanga kintu kyonse bantu kyo bampanga. Bamo bampanga kajo nangwa bipe bya mu nzubo. Inge bampa milola ina, naingijishangapo ibiji, ikwabo ibiji napotesha. Napotele twana twa nzolo 40. Bano banzolo byo bakomene, nebapoteshe ne kupotamo bakwabo 300. Mu kuya kwa moba, napimpwile banzolo 50 na masaka abiji a bunga bwa mataba. Mu onka ano masaka, najiishishemo kisemi kyami ne balongo bami pa kimye kyabaya.”

Kabiji Paul wayukile’mba kintu kyawama kyafwainwa kuba muntu, ke kuketekela mwi Lesa. Lesa witukwasha inge twalondela bintu byo etukambizha. Pa kwikala na bintu byo tukeba mu bwikalo, Yesu waambile’mba: “Kilekai kukizhamo kwakamwa; mambo . . . Shenu wayuka’mba mwibikeba bino bintu.”—Luka 12:29-31.

Mulwanyi mukatampe wa Lesa, aye Satana walengela bantu bavula kuta muchima ku bintu bya ku mubiji. Bantu bekala na bijikila pa bintu byo bakeba, bikamweka ne bikabula kumweka, kabiji bakeba ne bintu byabula kunema. Bavula betwezha mu nkongole kabiji bafunjila bintu mu kitoba kuba’mba “ukongola wikala muzha ku yewa wamukongwesha.”—Byambo bya Maana 22:7.

Bantu bamo kechi bayuka bya kufuukula bintu ne. Paul waamba’mba: “Bavula bo twikala nabo  kinkalankulo bashile bisemi byabo ne balunda nabo kuya na kukeba ‘bwikalo bwawama’ mu byalo bingi. Bamo bayile kwa kubula bipepala bya kwendelapo, kabiji bakankalwa kutaana nkito. Kino kibalengela kunyema bakapokola ne kulaala mu mikwakwa. Kechi balombele kwi Lesa kuba’mba ebakwashe ne. Pakuba amiwa ne kisemi kyami twafuukwilepo kulomba kwi Lesa kwitukwasha kupwishisha pamo makatazho a mali.”

Paul watwajijila kwamba’mba: “Yesu waambile’mba: ‘Kange mubambishenga michima na mambo a juba ja kesha ne, mambo juba ja kesha jikekala na bijikila byajo. Juba jonse jiji na makatazho ajo.’ Onkao mambo, pa juba pa juba nalombanga Lesa ‘kwitupa kajo ketu ka lelo’ kuba’mba twikale na bumi. Kabiji witukwashishe, byonkatu byaambile Yesu. Kechi kimye kyonse kyo twajanga byo twakebanga ne. Juba jimo, najinga mu munongo wa kupota kajo, kwa kubula kuyuka kajo ko bapoteshenga. Byo nafikile kulutwe, nataaine babena kupotesha mukaka wachimba. Uno mukaka kechi namutemenwe ne. Pano bino, kajinga kajo, onkao mambo twalaajijile uno yenka mukaka. Mbena kusanchila Lesa kuba’mba akya kimye kyonse, kisemi kyami kechi kyalaajilepo na nzala ne.” *

“Luno bintu bitupelelako mambo tuji na mali. Mu bintu byonse byo twapitamo, bitufunjisha kuba’mba kuketekela mwi Lesa ko kukwasha muntu kuyuka mwa kubila na bijikila. Kimye kyonse Yehoba * uketukwashanga inge ketube kyaswa muchima wanji. Twimwena bukine bwa byambo biji pa Salamo 34:8 bya kuba’mba: “Mutompai Yehoba mumone byo awama; ye mwine wa lusekelo awa muntu ufyama mwi aye.” Akino kitukwasha kubula kwakamwa inge twapita jikwabo mu makatazho a mali.

“Pano luno twayuka kuba’mba kajo ko kakonsha kulengela muntu kwikala na bumi, kechi nkito nangwa mali ne. Tubena kupembelela kimye Lesa kyo akafikizha milaye yanji ya kuba’mba: ‘Kajo kakavula bingi pano pa ntanda.’ Pa kino kimye, ‘byo tuji na kajo ne bivwalo, tusekela mu bino bintu.’ Tutundaikwa na byambo bya mu Baibolo bya kuba’mba: ‘Mwikale babula kutemwa mali, sekelainga mu bintu byonka byo muji nabyo. Mambo aye waamba’mba: “Kechi nkakusha ne, kabiji kechi nkakulekelela ne.” Kuba’mba tukose ne kwamba’mba: “Yehoba ye nkwasho wami; kechi nakonsha kuchina ne.”’” *

Twafwainwa kwikala na lwitabilo pa kuba’mba ‘twendenga na Lesa’ byonka byaubile Paul ne kisemi kyanji. (Ntendekelo 6:9) Nangwa tuji na makatazho a mali lelo nangwa tukekala nao kulutwe, lwitabilo lwajingapo ne Paul ne maana alumbuluka bitufunjishapo bintu byanema bingi.

Pano ibyepi inge makatazho a mu kisemi abena kwitulengela kwikala na bijikila?