Nakomejile mu Los Angeles, California, ku U.S.A., mu mapunzha apusana pusana mwatanwanga bantu batama kabiji bapepanga bizhima mu mikwakwa. Bansemi bami bajinga na baana ba balume bana ne ba bakazhi babiji, amiwa yami najinga wa bubiji.

Twayanga ne bamama ku chechi ya evanjeliko. Pano bino, byo nakijinga mwanyike naubanga bintu byatama bingi. Pa Mulungu naimbanga mu kwaya. Mukachi ka mulungu, nayanga ku bya kukaya kaya, kupepa bizhima ne kuba bulalelale.

Najinga na lukatazho lwa kuzhingila bukiji. Naingijishanga kintu kyonse kyonji nakyo kwilamwinako. Bintu byo nafundanga ku chechi kechi byankwashanga ne. Naambanga’mba, “Kushinkanya kwa Nkambo, bino yami abena kwingijisha kushinkenyako!” Byo nakijinga pa sukulu mukatampe ku mpelo ya 1960, nakwatankene na kipamo kya bashilikale bafiita bena America, jibumba ja bamulwila ntanda bo bayukile na mambo a kukatazha bantu pa luusa lwabo. Natwelele mu kipamo kyatalanga pa luusa lwa baana basukulu. Bimye byavula, twaletanga biwowo, kino kyalengelanga kushinka sukulu pa kakimye kacheche.

Na mambo a kuba nakanamine bingi, kuleta biwowo kechi kwandengejile kutondwa ne. Onkao mambo, natendekele kuba byubilo bya bumbanzhi. Pa kimye kimo, amiwa ne balunda nami twatambile filimu mo bamwesheshenga byo bayanjishanga bantu bafiita mu United States. Byo nazhingijile na mambo a bino byubilo byatama, twakozhezhe baana ba bazungu monka mu kishimikwa mo twatambijilenga uno filimu. Kabiji twapitañenenga mu mizhi ya bazungu na kukeba bazungu bakwabo kuba’mba twibapume.

Byo nakomeneko, amiwa, kolojami ne bankasami babiji, twaubilenga bintu byatama bingi. Twikatazhanga na bakulumpe ba mu kafulumende. Amiwa ne nkasami umo twajinga mu jibumba ja bantu bakanamine bingi. Bwikalo bwami bwayilengatu na kutaminako.

Mulunda nami wajinga na bansemi Bakamonyi ba kwa Yehoba. Bangichile kuya nabo na kupwila, kabiji nayile. Kufumatu jonkaja juba, namwene’mba Bakamonyi bapusanako bingi. Bonse bajinga na ma Baibolo kabiji beengijishenga pa kupwila. Banyike baambilenga majashi pa  kupwila! Natemenwe bingi kuyuka’mba Lesa uji na jizhina, amba Yehoba ne byo bejingijishenga. (Salamo 83:18) Mu kipwilo mwajinga bantu bapusana pusana bafuma mu byalo bingi, pano bino kechi mwajinga misalululo ne.

Patanshitu, kechi nakebelenga kufunda Baibolo na Bakamonyi ne, pano bino natemenwe bingi kuya nabo na kupwila. Juba jimo bufuku, byo napwijilenga na Bakamonyi, jibumba ja balunda nami jayile ku kishimikwa ko baimbilenga nyimbo. Konkakwa, bapumine mwanyike ne kufwa wafwa mambo wakaine kwibapa kibaki wanji. Juba jalondejilepo, betotelenga pa kyo baubile. Bamwenenga nobe kechi bauba kyatama byo bebatotolwesheshenga mu kochi ne. Bavula bebakashile kwikalanga mu kaleya. Natemenwe bingi kuba’mba kechi najinga nabo bobwa bufuku ne. Nafuukwilepo kupimpula bwikalo bwami ne kutendeka kufunda Baibolo.

Byo namwene misalululo yavula, bintu byo namwene mu Bakamonyi byankumishe bingi. Kimye Kamonyi muzungu kyo ayilenga ku kyalo kingi, washijile muntu ufiita kuba’mba amulamineko baana banji. Kabiji bazungu nabo balamanga nsongwalume ufiita wabujile kwa kwikala. Naswile kuba’mba byambo byaambile Yesu biji pa Yoano 13:35, byafwainwa Bakamonyi ba kwa Yehoba, byaamba’mba: “Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.” Nayukile’mba nataana balongo ne banyenga ba kine.

Byo nafunjilenga Baibolo, namwene kuba’mba nafwainwa kupimpula ndangulukilo yami. Kechi napimpwile milanguluko yami kuba’mba ngubenga bintu mu jishinda jawamatu ne, bino namwene ne kuba’mba kyo kintu kyawama kuba. (Loma 12:2) Mu kuya kwa moba, natendekele kwingijisha bintu byo nafunjilenga. Mu January 1974, nabatizhiwe kwikala Kamonyi wa kwa Yehoba.

Nangwatu byo nabatizhiwe, nebikilengako pa kuba’mba mbulenga kuzhingila bukiji. Kimye kimo, byo najinga mu mwingilo wa kusapwila ku nzubo ku nzubo, napangishe ngivi wangibijile waileshi mu motoka. Byo nafikile pepi ne aye, watayile waileshi ne kunyema. Byo nashimikizheko bakwetu bo najinga nabo byo naangachile waileshi, mukulumpe mu kipwilo ye twajinga nanji wangipwizhe’mba, “Stephen, inge waji wakumukwata inge wakumuba ka?” Buno bwipuzho bwandengejile kutendeka kulangulukapo ne kunkwasha kwikala bulongo na bantu.

Mu October 1974, natendekele mwingilo wa kimye kyonse, nasapwilanga maola 100 pa ñondo pa ñondo pa kufunjisha bantu Baibolo. Mwaka walondejilepo, nepaine kuya na kwingijila pa ofweshi mukatampe wa ntanda yonse wa Bakamonyi ba kwa Yehoba ku Brooklyn, mu New York. Mu 1978, nabwelele ku Los Angeles na kulama bamama bakolelwenga. Byo papichile myaka ibiji, nasongwele Aarhonda. Wantundaikanga bingi byo twalaminenga bamama kufikatu ne byo bafwile. Amiwa ne Aarhonda twatainwe ku Sukulu wa Baibolo wa Gileada wa Watchtower kabiji betutumine ku Panama ko tubena kwingijila bumishonale.

Kufumatu kimye kyo nabatizhiwe, napita mu bintu byakatazha bingi byakonsheshe kundengela kuba bintu byatama bingi. Nyema inge bantu kebakebe kunzhingijisha. Bantu bavula kuvwangakotu ne mukazhami bansanchila bingi pa byo nguba inge bantu banzhingijisha. Ne amiwa mwine nakumya. Kechi netakaika pa byo napimpula byubilo byami ne. Pakuba naswa kuba’mba Baibolo uji na bulume bwa kupimpula muntu.—Bahebelu 4:12.

Baibolo wandengela kwikala bwikalo bwawama ne kumfunjisha kwikala bulongo na bakwetu. Naleka kupuma bantu, pakuba nebakwasha kuyuka Lesa. Nafunjishapo Baibolo muntu ye nabulanga kumvwañana nanji pa sukulu mukatampe po twafundanga! Byo abatizhiwe twaikelenga kibamba kimo. Kufumatu kyokya kimye kufika ne lelo jino twibalunda bingi. Amiwa ne mukazhami, twakwasha bantu kukila pa 80 kwikala Bakamonyi ba kwa Yehoba pa kwibafunjisha Baibolo.

Namusanchila bingi Yehoba pa kunkwasha kwikala bwikalo bwawama kabiji bwa lusekelo na balongo ne banyenga.