Nanchi Kine Twakonsha Kumutokesha Lesa ku Muchima Nyi?
Nanchi mwakitangapo kala bantu bo baambapo mu Baibolo ne kwamba’mba, ‘Kechi nakonsha kwikala byonka byo bajinga ne!’ Mwakonsha kulanguluka’mba, ‘Amiwa nji na kaneneno kabiji kechi naoloka ne, kabiji kechi nguba bintu byawama kimye kyonsetu ne.’
Yoba wajinga “muntu wabula kaneneno kabiji waoloka.”—Yoba 1:1, tubyambo twa munshi
Mushakulu Yoba bamulumbulula’mba wajinga “muntu wabula kaneneno kabiji waoloka.” (Yoba 1:1, tubyambo twa munshi) Lota bamutongwelenga’mba “muntu waoloka.” (2 Petelo 2:8) Kabiji Davida naye bamwambapo amba waubanga “byaoloka” kwi Lesa. (1 Bamfumu 14:8) Pano twayai twisambe byajinga bantu bo baambapo mu Baibolo. Tusakumona’mba (1) balenganga mambo, (2) twakonsha kufunjilako ku bintu byo baubilenga, ne kuba’mba (3) bantu babula koloka kine bakonsha kutokesha Lesa ku muchima.
BALENGANGA MAMBO
“[Lesa] wapokolwele Lota waoloka, wajinga na bulanda bukatampe na mambo a byubilo bya kwizozola bya bantu ba mizhilulwila.”—2 Petelo 2:7
Yoba wapichile mu makatazho avula bingi o afwainwe kubula kupitamo. Watendekele kulanguluka’mba Lesa kechi wamutele muchima ne, nangwa kya kuba wajinga wa kishinka kwi aye. (Yoba 9:20-22) Yoba wimwene mwine amba waoloka ku bantu bakwabo, kyajingatu nobe ubena kwamba’mba amiwa naoloka kukila Lesa.—Yoba 32:1, 2; 35:1, 2.
Lota wakankazhamine kulondela kintu kyo afwainwe kuba pa byo bamubuujile. Kyamukolanga bingi ku muchima kumona bantu baikalanga mu Sodoma ne Gomola na kuba bintu byatama, kabiji “mweo wanji waoloka wamukatazhanga bingi” na mambo a byubilo byabo. (2 Petelo 2:8) Lesa waambile’mba wafuukulapo konauna yoya mizhi yatama, kabiji wabuujile Lota ne kisemi kyanji kintu kyo bafwainwe kuba pa kuba’mba bapuluke. Mwakonsha kulanguluka’mba Lota ye kyakatezhenga ku muchima, ye wafwainwe kwikala mutanshi kunyemamo. Pa kikye kimye kyakatezhe, Lota wakankazhamine bingi. Bamalaika bamukwachile aye ne kisemi kyanji ku maboko ne kwibalupwila pangye ya muzhi kuba’mba bapuluke.—Ntendekelo 19:15, 16.
Davida ‘walondejilenga [Lesa] na muchima wanji yense, saka oba byaoloka kwi [Lesa].’—1 Bamfumu 14:8
Kimye kimo Davida wakankelwe kwikanya, kabiji kino kyamulengejile kuba bukende na muka bene. Davida byo akebelenga kufya mambo anji, waipayile mulume wa uno mwanamukazhi. (2 Samwela, kitango 11) Baibolo waamba’mba “kintu kyaubile Davida kyamufichishe bingi Yehoba ku muchima.”—2 Samwela 11:27.
Yoba, Lota ne Davida balengele mambo amo abayile bingi. Pano bino, byonkatu byo tusakufunda, bamwingijile Lesa na muchima yense ne kumukookela. Umvwe balenga mambo, balombanga lulekelo lwa mambo ne kuja nyenye. Lesa wibobilanga bibusa, o ene mambo ne Baibolo o ebatongwela’mba bajinga banabalume ba kishinka.
TWAKONSHA KUFUNJILAKO KA KU BANO BANTU?
Byo tuji bantu babula koloka, tulenga mambo. (Loma 3:23) Inge twalenga mambo, twafwainwa kulomba lulekelo lwa mambo ne kubula kubwezhapo.
Nanchi Yoba, Lota ne Davida baubile byepi pa kuba’mba babule kubwezhapo kulenga mambo? Kwambatu kine, Yoba wajinga muntu wa kishinka. Lesa byo esambile nanji, Yoba wafumishe milanguluko yatama mwi aye ne kubula kubwezhapo bintu byo aambile. (Yoba 42:6) Jishinda jamwenejilengamo Lota bintu byatama byaubanga bantu ba mu muzhi wa Sodoma ne Gomola kwayijilemo na mizhilo ya Lesa. Lota kechi waingijijilepo bukiji pa byo bamubuujile kuba ne. Nangwa byonkabyo, wanyemenemo mu ino mizhi yatama ne kupuluka luzhachisho lwa Lesa. Aye wakookejile ne kubula kulanguluka pa bintu byo ashile kunyuma. Nangwa kya kuba Davida walengele mambo akatampe pa kulala mizhilo ya Lesa, wamwesheshe kyajinga mu muchima wanji byo alapijile ne kulomba kwi Lesa kumubilako lusa.—Salamo 51.
Abano banabalume Lesa wibayukile’mba kechi baoloka ne. Lesa “wayuka bulongo byo twalengwa, uvuluka’mba twi lukungu.” (Salamo 103:14) Umvwe Lesa wayuka’mba kechi kyapela atweba kubula kulenga mambo ne, pano ubena kukeba atweba kubanga ñanyi kintu?
Lesa “wayuka bulongo byo twalengwa, uvuluka’mba twi lukungu.”—Salamo 103:14
BANTU BABULA KOLOKA BAKONSHA KUTOKESHA BYEPI LESA KU MUCHIMA?
Bintu Davida byo abuujile mwananji aye Solomone, bitufunjisha kintu kyanema bingi kyakonsha kwitukwasha kutokesha Lesa ku muchima. Wamwambijile’mba: “Obewa mwanami Solomone, umuyuke Lesa wami amiwa shobe ne kumwingijila na muchima yense.” (1 Byambo bya Moba 28:9) Kumwingijila na muchima yense kulumbulula ka? Kulumbulula kutemwa Lesa, kuba kyaswa muchima wanji ne kulondela mikambizho yanji. Kechi kulumbulula’mba kumwingijilatu bulongo kana twaoloka ne, bino ke kukebesha kwingijila Lesa na muchima yense ne kuswa bukwasho inge twalenga mambo. Kutemwa Lesa ne kukebesha kumukookela ko kwalengejile Yoba kumutongola’mba “muntu wabula kaneneno,” Lota naye bamutela’mba “muntu waoloka,” kabiji Davida naye amba ‘waubilenga byaoloka’ kwi Lesa. Nangwa kya kuba balenganga mambo, batokeshenga Lesa ku muchima.
Kwingijila Lesa na muchima yense, kwitulengela kukeba kumwingijila ne kumukookela
Umvwe twatendeka kulanguluka pa bintu byatama byo tubena kubula kukeba, nangwa twaamba bintu byabula kufwainwa, nangwa twauba bintu byatama byo twilangulusha kulutwe na lwendo, twayai tufunjileko ku bantu bo twisambapo. Lesa wayuka’mba kechi twakonsha kwikala bantu baoloka pa kino kimye ne. Nangwa byonkabyo, ukeba atweba kumutemwa ne kumukookela. Inge saka tumwingijila na muchima yense, ne atweba twakonsha kuba bintu bitokesha Lesa ku muchima.
