Mpelo beingijishanga kupelelapo bunga bwa kulengela shinkwa. Ino mpelo yo yo baingijishanga banabakazhi nangwa bazha mu mazubo onse. Kuvuma kwa mpelo kwaumvwanyikangatu kimye kyonse ku bantu ba kala.—Kulupuka 11:5; Yelemiya 25:10.

Bya kulengalenga bya mu Ijipita wa kala byamwesha byo baubanga. Babikanga kajo ka museke peulu ya jibwe japapakana jo batelanga’mba mpelo. Muntu wapelanga wafukamanga kunyuma ya jibwe ja kupelelapo ne kukwata mpelo mu maboko anji ne kutendeka kupela kajo. Buku umo waamba’mba, ino mpelo yanemene makilogalamu 2 kufika ku 4. Inge ino mpelo baasa muntu, yakonsha kwipayañana.—Mitonyi 9:50-54.

Kupela kajo kwanemene bingi mambo mo bakwashishanga bisemi byabo, o ene mambo mizhilo ya mu Baibolo o yakainyanga muntu kusenda mpelo inge muntu wakankalwa kupana kyo alayile. Mpitulukilo ya mu Mizhilo 24:6 yaamba’mba, “Kafwako muntu nangwa umo wafwainwa kwangata mpelo nangwa jibwe jo bapelelapo kwikala kintu kya kukwachilamo na mambo a nkongole ne, mambo kino kintu kyo abena kukeba kukwachilamo, kyo kimukwasha.”

Baibolo waamba’mba Yesu uji “mu kyaji kya Bashanji.” (Yoano 1:18, tubyambo twa munshi) Kino kyambo kilumbulula bulunda ne butemwe buji ne Yesu na Lesa. Abino byambo bimwesha kisho kyajinga na Bayudea inge babena kuja.

Mu moba a kwa Yesu, Bayudea baikalanga saka basendalala pa bipona byo babika ku tebulu. Bonse baji ku tebulu batazhanga mitwe yabo ku tebulu saka baikala kya kusendalala kabiji maulu abo beatazhanga kungi aku saka bakinka makokola pa kamateleshi. Kwikala bino kwibakwashanga kwingijisha maboko abo a kilujo kukwachilako kintu. Buku umo walumbulu­la’mba, bonse bajinga ku tebulu byo basendalelanga ku kipiko saka balamankana na bakwabo, “mitwe yabo yaikelanga pepi na kyaji kya muntu ye alamankana nanji, onkao mambo kyamwekanga nobe walaala mu kyaji kya mukwabo.”

Kulaala mu kyaji kya mutwe wa kisemi nangwa kya mwenyi wimwita ku kajo kyajinga kintu kyanemene bingi. Onkao mambo, pa Kijiilo kya Lupitailo kyapeleleko kya kwa Yesu, mutumwa Yoano “mwana wa bwanga umo Yesu ye atemenwe bingi,” ye wasendalele mu kyaji kya kwa Yesu. Yoano “wasendalejile pa kyaji kya kwa Yesu” ne kumwipuzha bwipuzho.—Yoano 13:23-25; 21:20.