DEBOLA watajilenga bashilikale baimene pa Mutumba wa Tabola. Kyamutundaikile bingi byo ebamwene. Byo bwakile lukelo, waambile pa byo bachinchikile ne lwitabilo lwa ntangi wabo aye Balaka. Nangwa kya kuba bajinga 10,000, lwitabilo ne kuchinchika kwabo kwajinga mu kizumba. Nangwa kya kuba bavujile, kechi bajinga na bilwilo bya nkondo ne, pano bino bayilenga na kulwa na bantu bashinta bingi. Nangwa byonkabyo, bayile na mambo a bibatundaikile uno mwanamukazhi.

Fwanyikizhai bya kuvwala bya kwa Debola saka bibena kulelauka na mwela, aye ne Balaka byo batajilenga pa mpunzha yakebuka. Mutumba wa Tabola wasongolokele peulu. Kuya peulu walepele mamita 400, inge muntu waimena peulu yanji wakonsha kumona bulongo Musanza wa Eshidalaelonyi waikejile ku kabeta ka ku bulenge muzhika. Mukola wa Kishonyi wapichile ku musanza waya ku Kalunga ka Mema Kakatampe kwapela Mutumba wa Kamela. Kyamweka mukola waumine jo ja juba lukelo, pano bino kwajinga kintu kyabekaukilenga ku yenka uno musanza. Bashilikale ba kwa Sisela baishilenga na byela byabekaukilenga. Nzhita ya kwa Sisela yaishilenga na makalaki 900 asendele bikwakwa ne byela bikwabo bya nkondo. Sisela wakebelenga kuchiba mitwe ya bena Isalela nobe ubena kunowa kajo ka mbaale.

Debola wayukile’mba Balaka ne bantu banji bapembejilenga aye kuba’mba ebabuulepo bintu bimo. Nanchi ye mwanamukazhitu wajingako nyi? Ñanyi kintu kyalengejile kuba’mba bamupe mwingilo wabaya bibye? Nanchi wayukile kyo aubilenga nyi? Kechi wayukile ne! Yehoba, Lesa wanji wamwambijile kulwa nkondo; kabiji wamubuujile’mba ukengijisha mwanamukazhi kupwisha yoya nkondo. (Mitonyi 4:9) Twakonsha kufunjilako ka ku lwitabilo lwa kwa Debola ne banabalume ba nkondo?

Baibolo watongola Debola amba, “ngauzhi wa mukazhi.” Jino jizhina jalengejile Debola kupusanako na bakwabo bo batongola mu Baibolo, pano bino, kechi ye yenka ne. * Debola bamupele ne mwingilo mukwabo. Wachibilanga ne bantu mambo pa kwibabuula byaamba Yehoba pa lolo lukatazho.—Mitonyi 4:4, 5.

Debola waikalanga mu mpunzha ya mitumba ya Efelaimu pakachi ka muzhi wa Betele ne Lama. Waikalanga munshi ya kichi kya kisonga na kwingijila bantu byonkatu byamukambizhe Yehoba. Mwingilo wanji wakatezhe bingi, pano bino, Debola kechi wachiine ne. Wafwainwe kwingila uno mwingilo. Walengeleko ne nyimbo, mo aambile ne pa bantu babujile bukishinka amba: “Basajile balesa ba katataka; kepo kwaikele nkondo ku bibelo.” (Mitonyi 5:8) Bena Isalela byo basatukijile Yehoba ne kwingijila balesa bangi, Yehoba wibapaine ku balwanyi babo. Mfumu Yabina mwina Kenana wibalamine bingi bibi kwingijisha mukulumpe wa bashilikale Sisela.

Sisela! Jino jizhina jalengejile bena Isalela kwakamwa ne kunyema. Bupopweshi ne bisho bya bena Kenana byatamine bingi, balambulanga baana ne kuba bulalelale mu nzubo ya Lesa. Bwikalo  bwajinga byepi mukulumpe wa bashilikale wa bena Kenana ne nzhita yanji byo balamine ntanda? Lwimbo waimbile Debola wamwesha’mba kyakatazhanga bingi kwenda mu kyalo kabiji bantu banyemenemo mu mizhi. (Mitonyi 5:6, 7) Fwanyikizhai bantu babena kufyama mu bichi ne mu mitumba, kuchina kujima nangwa kwikala mu mizhi yabula masakwa, kuchina kwenda mu mikwakwa kuba’mba basakwibalukuka, kwibasendela baana ne kulaala na bakazhi babo kya kwibakanjikizha. *

Mwajinga bumbanzhi pa myaka 20 kufikatu ne kimye Yehoba kyo amwene’mba bantu bakosa mitwe bakeba kupimpula byubilo byabo, byonkatu byaamba jishimikila jiji mu lwimbo waimbile Debola ne Balaka amba: “Posotu byo naimene amiwa Debola, poso byo naimene nobe inabo mu Isalela.” Kechi twayuka inge Debola muka Lapidota wasemenepo baana nangwa ne, bino ino ñambilo yajingatu ya kifwanyikizho. Yehoba wapele Debola mwingilo wa kuzhikijila kisaka byonka byuba nsemi wa mukazhi. Wamubuujile kusala mwanamulume wa lwitabilo, aye Mutonyi Balaka ne kumwambila kuya na kulwa ne Sisela.—Mitonyi 4:3, 6, 7; 5:7.

Yehoba waingijishe Debola kumukambizha’mba, “Yanga ku Mutumba wa Tabola.” Balaka wasendele banabalume 10,000 kufuma mu mikoka ibiji ya bena Isalela. Debola wibabuujile byalayile Lesa kuba’mba bakashinda Sisela ne makalaki anji 900! Uno mulaye walengejile Balaka kukumya. Mambo bena Isalela kechi bajingapo na bashilikale nangwa bilwilo bya nkondo ne. Nangwa byonkabyo, Balaka waswile kuya ku nkondo, kikulutu inge Debola naye waya ku Mutumba wa Tabola.—Mitonyi 4:6-8; 5:6-8.

Bantu bamo balanguluka’mba Balaka byo akebelenga kuya ne Debola kechi wajinga na lwitabilo ne, abino kechi byo byo kyajinga ne. Mambo aye kechi walombele Lesa kumupa bilwilo bya nkondo ne. Pakuba Balaka byo ajinga na lwitabilo, wakebelenga muntu waimenejilengako Yehoba kuya nanji na kumutundaika aye ne bantu banji. (Bahebelu 11:32, 33) Yehoba waswile. Waswishishe Debola kuya ne Balaka. Nangwa byonkabyo, Yehoba walengejile Debola kwaula’mba kushinda ino nkondo kechi kusakulengela mwanamulume kutumbalala ne. (Mitonyi 4:9) Lesa wafuukula’mba mwanamukazhi ye ukepaya Sisela!

Mu ntanda lelo jino, banabakazhi bebafwa bingi nshiji, kwibepaya ne kwibayanjisha. Kabiji kechi bebanemeka kwesakana na bikeba Lesa ne. Pano bino, Lesa wanemeka banabakazhi ne  banabalume kabiji bonse wibatemwa. (Loma 2:11; Ngalatiya 3:28) Kintu kyaubile Debola kitufunjisha kuba’mba Lesa upa ne banabakazhi mingilo ne bintu bimwesha’mba wibaketekela ne kwibatemwa. Kechi twafwainwa kwikala na misalululo iji mu ino ntanda ne.

Balaka wakonkenye bashilikale banji. Wakonkenye banabalume 10,000 babujile moyo ba kuya na kulwa na nzhita ya kwa Sisela. Balaka byo atwajile nzhita yanji pa Mutumba wa Tabola, kintu kimo kibalengejile kukosa. Tutanga’mba: “Ne Debola naye wayile nanji.” (Mitonyi 4:10) Fwanyikizhai bashilikale byo basangalele pa kumona mwanamukazhi wabujile moyo ke aye nabo pa Mutumba wa Tabola, ne kubika bumi bwanji mu kizumba na mambo a lwitabilo lo ajinga nalo mwi Yehoba Lesa!

Sisela byo amwene’mba bena Isalela babena kwiya na kumulukuka, waimene kuya kobaji. Bamfumu ba bena Kenana bayile na nzhita ya Mfumu Yabina, kyamweka yo ibakijile ngovu. Mituutu ya makalai a kwa Sisela yaumvwanyikilenga byo baishilenga ku musanza. Bena Kenana balangulukilenga’mba kechi kisakwibakatazha konauna nzhita ya bena Isalela ne.—Mitonyi 4:12, 13; 5:19.

Ñanyi kintu kyaubile Balaka ne Debola byo bamwene balwanyi babo na kwiya? Kutwajijilatu kwimana pa Mutumba wa Tabola kwafwainwe kwibakwasha kushinda bashilikale ba bena Kenana, mambo makalaki abo beengijishangatu kulwila pa mushiji waesakana. Balaka wafwainwe kulondela byamukambizhe Yehoba pa kulwa nabo, onkao mambo, wapembejile Debola kumubuula bya kuba. Wamubuujile bya kuba. Waambile’mba: “Imana, mambo jino jo juba Yehoba jo asakupana Sisela mu kuboko kobe. Nanchi Yehoba kechi watangilako kala kulutwe yobe nenyi?” Kabiji tutanga’mba: “Balaka wakunkulukile ku Mutumba wa Tabola ne banabalume 10,000 saka bamulondela.”—Mitonyi 4:14. *

Nzhita ya bena Isalela yatendekele kukunkuluka pa mutumba kuya kwaselebala kwajinga bilwilo bya nkondo byashinta. Nanchi Yehoba kechi watangijileko kulutwe yabo, byonkatu byaambile Debola nenyi? Kyamwekele. Tutanga’mba: “Ntanda yatenkene, ne jiulu janokele.” Bashilikale ba kwa Sisela bebatayile mu kañumbwañumbwa. Ne mvula watendekele kunoka! Kwanokele mvula mukatampe bingi kya kuba mushiji yense watetemene. Makalaki abo a byela anema aikeletu ke atutu. Byatapamine mu mateshi ne kwikala monka.—Mitonyi 4:14, 15; 5:4.

Balaka ne nzhita yanji kechi bebakatezhe ku mvula ne. Bayukile ko yafuminenga. Banyemejile kwajinga nzhita ya bena Kenana. Lesa byo ebengijishenga, bena Isalela kechi bashilepo mushilikale nangwa umo wa kwa Sisela ne. Mukola wa Kishonyi wayujile ne kukumpula mibiji ya bantu bafwa ne kukeitaya mu Kalunga ka Mema Kakatampe.—Mitonyi 4:16; 5:21.

Lelo jino, Yehoba kechi utuma bakalume banji kuya na kulwa nkondo ne. Pano bino, ukeba bantu banji kwivwanga mu nkondo ya ku mupashi. (Mateo 26:52; 2 Kolinda 10:4) Inge saka tukookela Lesa mu ino ntanda, ko kuba’mba tubena kulwa yo yo nkondo. Twafwainwa kukosa, mambo bonse baji ku lubaji lwa Lesa bakebamanyika. Pano bino, Yehoba kechi waaluka ne. Watwajijila kukwasha bantu baji nobe Debola, Balaka ne bashilikale ba bena Isalela ba kala babujile moyo, bajinga na lwitabilo ne kumuketekela.

Mulwanyi umo wakijilemo kushinta wa bena Isalela wanyemene! Sisela washikilwe bingi bantu ba Lesa, wanyemene lubilo panshi. Washile bashilikale banji na kufwa mu mateshi ne kupita pakachi ka bashilikale ba bena Isalela, kuya ku mushiji wauma ne kunyemena kwipi ko alangulukile kuya. Byo akilañenye musanza walepa, ne kwakamwa’mba bashilikale ba bena Isalela bakamutaana, wayile ku matente a kwa Hebela mwina Keni wafumine ku balongo banji ne kuya na kwikala ku kabeta ka ku bulenge mambo baumvwañananga na Mfumu Yabina.—Mitonyi 4:11, 17.

Sisela wafikile ku tente wa kwa Hebela saka akookatu zubulu. Wataaine Hebela ufwapo.  Bino wataainepotu mukazhanji aye Yaela. Sisela walangulukilenga’mba Yaela usakumutambwila mambo mwatawanji waumvwañananga na Mfumu Yabina. Kampe walangulukilenga’mba kafwako kintu mwanamukazhi kyo akonsha kumuba, nangwa’mba kechi wakonsha kwikala na milanguluko yapusana na mwatawanji ne. Kyamweka Sisela kechi wamuyukile Yaela ne! Uno mwanamukazhi wamonanga bintu byatama byaubiwanga mu kyalo kya Kenana; kyamweka walangulukilenga bya kuba. Wafwainwe kusalapo kukwasha awa muntu watama nangwa kukwasha Yehoba pa kumwipayilako mulwanyi wa bantu banji. Pano waubile byepi? Mwanamukazhi wakonsheshe byepi kwipaya kiyangala mwine wa nkondo?

Yaela walangulukilepo bukiji. Wapele Sisela kibamba mwa kukokolokela. Wamubuujile’mba kange amusolole ku muntu yense usakwiya na kumukeba ne. Byo alaajile wamuvwetele, kabiji byo alombele mema a kutoma, aye wamupele mukaka. Ponkapo Sisela walaajile mu tulo twine. Ponkapo Yaela watolele lupopo wa ku tente ne kusenda sando mu kuboko kwanji. Waishile pachepache kwi Sisela, wajinga na mwingilo mukatampe wa kushinkenyako Yehoba. Umvwe wabanjile, inge wajinga mu lukatazho. Nanchi uno mwanamukazhi walangulukilenga pa bantu ba Lesa ne byo bebamanyikilenga ku uno muntu pa myaka yavula nyi? Nangwa abya walangulukilenga pa kwingila mwingilo wamupele Yehoba nyi? Kafwako po baamba ne. Kyo twayukakotu ke kya kuba’mba wamwipayile. Sisela wafwile!—Mitonyi 4:18-21; 5:24-27.

Mu kuya kwa kimye, Balaka waishile na kumukeba mu bimbo mo bapoyanga mabwe. Yaela byo amumwesheshe mubiji wafwa ne lupopo wa ku tente mu kutwi, waswile’mba bungauzhi bwa kwa Debola bwafika. Mwanamukazhi waipaya Sisela kiyangala wa nkondo! Bantu ba milengulwila lelo jino, bapa Yaela mazhina a mukeyu apusana pusana, bino Balaka ne Debola bo bayukile bulongo. Mu lwimbo ye baimbile, mupashi wibatangijile kutakaika Yaela amba “watokwa bingi mu banabakazhi” na mambo a kintu kikatampe kyo aubile. (Mitonyi 4:22; 5:24) Debola wawamine bingi muchima. Kechi waubijile kichima Yaela ne; pakuba aye watemenwe bingi mambo byaambile Yehoba byafikile.

Sisela byo afwile, Mfumu Yabina walekele kukatazha bena Isalela. Lumanamo lwa bena Kenana lwapwile. Baikele mu mutende myaka 40. (Mitonyi 4:24; 5:31) Debola, Balaka ne Yaela bebapesheshe bingi na mambo a kuketekela mwi Yehoba Lesa! Inge twaikala na lwitabilo lwajingapo ne Debola, kuketekela mwi Yehoba ne kutundaika bakwetu kuba bintu byawama, Yehoba uketupesha pa kwibikako kwetu, kabiji uketupa mutende wa myaka ne myaka.