MUTWE WA PA NKUPIKO | NANCHI INGE MUNTU WAFWA—UKEKALA NA BUMI JIBIJI NYI?
Ki ka Kimweka Inge Muntu Wafwa?
“Nalangulukanga’mba kuji mapunzha asatu kuya muntu inge wafwa: nabiji mwiulu, mu helo nangwa mpunzha kwa kumanamina. Nayukile’mba kechi nguba byawama kya kuba naya mwiulu ne, kabiji kechi nguba byatama kya kuba naya ku helo ne. Kechi nayukile bulongo biji mpunzha kwa kumanamina ne. Kechi nebimwenepo mu Baibolo ne. Bantu bo baambangatu.”—Lionel.
“Bamfunjishe’mba bantu bonse baya mwiulu inge bafwa, pano bino kechi nashiinwe ne. Nalangulukanga’mba inge muntu wafwa kyapwa kechi ukamwekapo jibiji ne.”—Fernando.
Nanchi mwakilangulukapo’mba: ‘Ki ka kimweka inge muntu wafwa nyi? Nanchi balongo ne balunda netu bafwa babena kuyanda ku mpunzha kumo nyi? Abya tukebamonapo jibiji nyi? Twakonsha kushiinwa byepi?’ Monai bifunjisha Binembelo. Patanshi, twayai tumone byaamba Baibolo pa lufu. Kepo tusakwisamba pa luketekelo luji mu Mambo a Lesa, Baibolo.
Ki ka kyubiwa inge muntu wafwa?
MUKUMBU WA MU BAIBOLO: “Bantu bomi bayuka’mba bakafwa, pakuba bantu bafwa kafwako kintu nangwa kimo kyo bayuka ne, kabiji kechi bakishala na mfweto ne, mambo bintu byonse byo baubile, bantu bebilubako. Bintu byonse byo mukeba kuba mu bwikalo bwenu, byubai na bulume bwenu bonse, mambo mu Kilende mo mubena kuya kechi muji kwingila mingilo, kulanguluka, kuyuka kintu nangwa kwikala na maana ne.” *—Musapwishi 9:5, 10.
Kilende ke mpunzha ko batwala bantu inge bafwa; ke mpunzha ya kifwanyikizho ko babula kuba bintu. Yoba muntu wa kishinka wamwenenga byepi Kilende? Mu jubatu jimo, waelele bintu byanji byonse ne baana banji kumo, kabiji waikele na bipute mubiji yense. Wasashijile Lesa amba: “Nanchi inge mwamfya mu Kilende, [“mu helo,” Baibolo wa Bakatolika wa Douay] ne kumfya.” (Yoba 1:13-19; 2:7; 14:13) Yoba kechi waswile’mba Kilende ke helo kuji mujilo, mpunzha ko akakilamo kumanama ne. Pakuba aye wayukile’mba ke mpunzha ko akabula kuyuka kintu.
Kuji jishinda jikwabo jo twafwainwa kufunjilamo bikala muntu inge wafwa. Twakonsha kutanga mashimikila aji mu Binembelo aamba pa bantu batanu na basatu bo basangwile.—Monai kakitenguluzha kaamba’mba “ Lusanguko Lutanu na Lusatu lo Baambapo mu Baibolo.”
Kafwako nangwa umo pa bantu batanu na basatu bo basangwile waambile’mba wayile mwiulu nangwa wamanaminenga mu mujilo ne. Umvwe aba bantu basangukile bayile mwiulu byo bafwile, nanchi inge kechi bashimikizheko bakwabo nenyi? Nanchi inge kechi bebinembele mu Baibolo kuba’mba bonse bebiyuke nenyi? Mu Binembelo, kafwako nangwa pamo po baambapo ne. Aba bantu batanu na basatu bo basangwile, kechi baambilepo pa kino ne. Mambo ka? Mambo kechi bayukile kyamwekelenga ne, bajingatu nobe baji mu tulo tukatampe. Kimye kimo, Baibolo wingijisha kulaala tulo kulumbulwilamo lufu. Davida ne Setepena bantu ba kishinka ‘baponejile mu tulo twa lufu.’—Byubilo 7:60; 13:36.
Nanchi bantu bafwa bakasanguka nyi? Nanchi bakabuuka mu tulo nyi?
^ par. 7 Mu Baibolo wa Binembelo bya Ntanda Ipya, kyambo kya kuba’mba “Kilende” bekingijisha kulumbulula kyambo kya Kihebelu kya “Shelo,” ne kyambo kya Kingiliki kya “Hadesi.” Ma Baibolo amo engijisha kyambo kya “helo,” bino byo bekilumbulula’mba ke mpunzha ya kumanyikilako bantu bafwa mu mujilo kechi kwa mu Binembelo ne.
Mwakonsha Kutemwa
KYAMBA KYA USOPA
Nanchi Yesu Kine Wasangwile Bantu Nyi?
Bantu Yesu bo abushishenga betulengela kuketekela mu milaye ya kulutwe?
