Nakomejile mu muzhi wa Alicante ku musela wa jikuji ja ku Spain. Kisemi kyami kechi kyantele muchima ne, onkao mambo, kimye kyabaya natanwangatu mu mikwakwa. Kwipi na nzubo yami, kwajinga kashitolo mo balungishishanga matayala. Nesampile bulunda na José María waingijilangamo. Wantele bingi muchima kukila kisemi kyami. Mu bimye bya makatazho, wajingatu nobe kolojami, wajinga mulunda wa kine nangwa kya kuba wankijileko na myaka 20.

José María watendekele kufunda Baibolo na Bakamonyi ba kwa Yehoba. Nemwenejile kuba’mba watemwa Binembelo kabiji kimye kyonse wambuulangako bukine bwa mu Baibolo. Natangako bingi maana inge ubena kwamba, pano bino kechi natemenwe bintu byo aambanga ne. Byo najinga mwanyike, nateletu muchima ku bintu bikwabo. Pano bino, bintu byaalukile.

Kechi natemwa kwambapo pa oa mapuso a pa mukwakwa ne. Kyo nsakwamba ke kya kuba’mba, amiwa mwine yami natamishe. Mu jubatu jimo, bwikalo bwami bonse bwaalukile. Najinga nsongwalume wajinga na ngovu, pano ne kilema wikalatu mu kipatela. Kyankatezhe bingi kuswa kuba’mba nalemana. Natwajijile kwishikisha’mba, ‘Naikela ka na bumi?’

José María waishile na kumpempula, kabiji ponkapotu wabuujile Bakamonyi ba kwa Yehoba mu kipwilo mo ajinga kwiya na kumpempula ku kipatela. Byo bampempulanga pa juba pa juba, kyamfikile bingi pa muchima. Byo nafuminetu mu kibamba mo balamina bantu bakolwa bingi, natendekele kufunda Baibolo. Nataaine bishinka byaamba pa ene mambo bantu o bayanjila ne kufwa, ne ene mambo Lesa o aswishisha bino bintu byatama kubiwanga. Kabiji nafunjile pa milaye ya Lesa ya kulutwe, kimye pano pa ntanda ponse kyo pakekala bantu balumbuluka, kabiji kafwako muntu nangwa umo ukamba’mba: “Nakolwa ne.” (Isaya 33:24) Akino kyo kimye kitanshi kyo natendekele kwikala na luketekelo.

Byo nafumine mu kipatela, natwajijile kufunda Baibolo. Na mambo a kwikala na kakinga ka bilema kawama, natanwanga ne ku kupwila kumo kwa Bakamonyi ba kwa Yehoba ne kusapwila. Pa 5 November, 1988 nabatizhiwe mu kizhiba kya kulenga saka nji na myaka 20. Yehoba Lesa wankwasha kuyuka mwa kubila na lukatazho lwami. Ñanyi  bintu byo nafwainwa kuba kumwesha’mba namusanchila?

Kechi nakebele kuswisha bulema bwami kundengela kukankalwa kwingijila Yehoba na muchima yense ne. Nakebelenga kuyilako palutwe. (1 Timoti 4:15) Patanshitu, kino kechi kyampelejile ne, mambo kisemi kyami kyakainenga bintu bya katataka byo naitabijilemo. Pano bino, bakwetu bena Kilishitu bo bajinga balongo ne banyenga yami. Bankwashanga kutanwa ku kupwila kimye kyonse ne kwingilako mwingilo wa kusapwila.

Nangwa byonkabyo, mu kuya kwa moba, nakebelenga wa kunkwasha kimye kyonse. Byo papichile kimye, nataaine mpunzha yawama ko balamina bilema mu muzhi wa Valencia pajinga makilomita 160 ku kabeta ka ku buyeke bwa Alicante. Ino mpunzha yo yaikele ke muzhi wami kikupu.

Nangwa kya kuba kechi neendela ne, natwajijila kwingijila Yehoba. Kwingijisha mali o bapa bilema ne malitu akwabo, napotele kompyuta ne kumbikilaye kwipi na mwanya wami. Napotele ne kafoni ka mulupi. Kimye kyonse lukelo, muntu undama wambula kompyuta wami ne foni. Pa kwingijisha kompyuta, nkinka kalevu ku kakiñambañamba kakuchonkawilako pa kompyuta. Nji ne na kakiñambañamba kaji nobe kakichi ko mbika ku kanwa. Kano kakiñambañamba kankwasha kuchinta pa manambala a pa kompyuta ne pa kutuma foni.

Abino biñambañamba byankwasha byepi? Kintu kitanshi, binkwasha kuya pa keyala wa jw.org ne BUTALA BWA MABUKU. Abino biñambañamba binkwasha bingi. Pa juba pa juba mfunda ne kukebakeba mu mabuku alumbulula Baibolo kuba’mba ntwajijile kufunda pe Lesa ne byubilo byanji byawama. Inge naumvwa mukose nangwa nalefulwa, ntaana bintu bya kunkwasha pa keyala wetu.

Kabiji kompyuta wami unkwasha kuteleka ne kukumbulapo kimye kya kupwila. Nkumbulapo, ndomba, kwamba majashi ne kutanga Kyamba kya Usopa inge bampa. Nangwa kya kuba kechi ngya ku kupwila saka bammona ne, nayuka’mba ne musapwishi mu kipwilo.

Kwikala na foni ne kompyuta kunkwasha kwingilako mwingilo wa kusapwila kimye kyonse. Ibyo, kechi nakonsha kuya ku nzubo ku nzubo byonka byuba bakwetu Bakamonyi ba kwa Yehoba ne. Kino kechi kindengela kubula kusapwila ne. Nsapwila bantu kwingijisha bino biñambañamba. Ñumvwa bingi bulongo kwisamba pa foni, kya kuba bakulumpe mu kipwilo bampa ne mwingilo wa kunengezha mukwekele wa busapwishi bwa pa foni. Uno mukwekele wakwasha bantu baji mu kipwilo babula kwenda kufuma pa mazubo.

 Bwikalo bwami kechi bwaimenatu pa biñambañamba ne. Pa juba pa juba balunda nami beya na kumpempula. Bandetela balongo ne balunda nabo bakeba kufunda Baibolo. Javula bañambila kutendeka mwisambo. Pa bimye bikwabo, bisemi biya ne kubila pamo ne amiwa kupopwela kwabo kwa kisemi. Ñumvwa bingi bulongo inge banyike baikala ku mwanya wami ne kumbuula kibakwasha kutemwa Yehoba.

Ntemwa bingi kutambwila benyi. Mu kibamba kyami mwiya bantu bavula bafuma kwalepa ne pepi. Kuno kunta muchima kulengela betulama kukumya bingi. Pa juba pa juba namusanchila Yehoba pa kwikala na balongo ne banyenga bawama muchima.

Umvwe muntu wañimuna’mba mwabuuka byepi, nkumbula’mba “Nkichinchika!” Nayuka’mba kechi yami yenka ubena kupita mu ano makatazho ne. Bintu byonse byo twakonsha kupitamo nangwa bintutu bikwabo, bena Kilishitu bonse babena ‘kulwa bulwi bwawama bwa lwitabilo.’ (1 Timoti 6:12) Ñanyi kintu kyankwasha kuchinchika pa myaka yavula bibye? Pa juba pa juba ndomba ne kusanchila Yehoba pa kunkwasha kuchinchika. Kabiji nebikako bingi kwingijila Lesa ne kutatu muchima pa bintu biji kulutwe.

Javula ndanguluka bingi pa ntanda ipya ne byo nkanyemanga ne kukilauka. Bimye bimo, ñamba na mulunda nami José María uji na kikola kya kalepu byo tukekyombesha pa kunyema kapela. Namwipuzha’mba, “Ñanyi ukafika bukiji? Aye ukumbula’mba, “Kufika bukiji kechi kwanema ne. Kyanema kwikala mu Paladisa.”

Kyankatazha bingi kuswa kuba’mba nalemana. Nayuka’mba byo najinga mwanyike, naubile kintu kyabula maana kabiji kyandengela kuyanda. Pano bino, namusanchila bingi Yehoba kuba’mba kechi wandekelela ne. Wampa bintu byavula bingi, nabiji balongo ne banyenga bavula mu kipwilo, wanswisha kwikala mumi, wampa muchima wa kukwasha bakwetu ne kwikala na luketekelo lwawama lwa bintu biji kulutwe. Inge nauba namba ñambe pa bintu byangubila Lesa, nakonsha kwamba’mba kine Yehoba wampa bintu byavula bingi byo nabujilenga kuketekela.