MUTWE WA PA NKUPIKO | BAKAMONYI BA KWA YEHOBA BO BAÑANYI?
Mambo ka o Tuyila na Kusapwila?
Kintu kikatampe kitupusanyako ke mwingilo wetu wa kusapwila ku nzubo ku nzubo, mu mapunzha mutanwa bantu bavula ne konse kutanwa bantu. Mambo ka o tubila kino?
Bakamonyi ba kwa Yehoba basapwila kuba’mba batumbijike Lesa ne kubuula bantu jizhina janji. (Bahebelu 13:15) Kabiji tukeba kukookela byaambile Kilishitu Yesu, wakambizhe’mba: “Yainga na kufunjisha bantu ba mu bisaka byonse bya bantu, . . . ne kwibafunjisha kulama bintu byonse byo nemukambizha.”—Mateo 28:19, 20.
Kabiji twatemwa bakwetu. (Mateo 22:39) Onkao mambo, twayuka kuba’mba bantu bavula baji na bupopweshi bwabo, kabiji kechi bantu bonse bomvwa byo twibasapwila ne. Nangwa byonkabyo, twayuka’mba bifunjisha Baibolo bikalengela muntu kwikala na bumi. O ene mambo o tutwajijilatu na “kusapwila mambo awama aamba pe Kilishitu Yesu kwa kubula kuleka,” byonkatu byaubanga bena Kilishitu batanshi.—Byubilo 5:41, 42.
Shayuka wayuka bya bwikalo bwa bantu aye Antonio Cova Maduro wanembele pa “Bakamonyi ba kwa Yehoba byo bebikako ne makatazho o bapitamo ne byo bakooka . . . , pa kubatu’mba mambo awama afike ne ku mapunzha a kwalepa mwaya ntanda.”—El Universal newspaper, Venezuela
Bantu bavula batanga mabuku etu kechi Bakamonyi ba kwa Yehoba ne. Kabiji bantu bavula bo tufunjisha Baibolo baji na bupopweshi bwabo. Pano bino, batemwa bingi inge Bakamonyi ba kwa Yehoba baiya na kwibasapwila.
Kampe muji na mepuzho akwabo pa Bakamonyi ba kwa Yehoba. Tubena kwimutundaika kutaana mikumbu
-
Ipuzhai Kamonyi wa kwa Yehoba.
-
Yai pa keyala wetu wa www.pr418.com.
-
Tanwainga ku kupwila kwetu, yense wakasuluka kutanwako kyatutu.
Mwakonsha Kutemwa
MEPUZHO O BEPUZHA JAVULA
Nanchi Bakamonyi ba kwa Yehoba Balanguluka’mba bo Bonkatu Bakapuluka Nyi?
Baibolo watongola bapuluka.
MEPUZHO O BEPUZHA JAVULA
Nanchi Bakamonyi ba kwa Yehoba Baji na Basapwishi Babakazhi Nyi?
Ñanyi mwingilo uji na babakazhi mu mwingilo wa Bakamonyi ba kwa Yehoba wa kusapwila mwaya ntanda?
MEPUZHO O BEPUZHA JAVULA
Nanchi Bakamonyi ba kwa Yehoba Bakalakanya Bupopweshi bwa Bakwabo Nyi
Yukilaipo byavula pa kubula kukalakanya bupopweshi bwa bakwenu byo kumwesha’mba mwi bena Kilishitu bakine.
