MUTWE WA PA NKUPIKO
Bakamonyi ba kwa Yehoba bo Bañanyi?
“Namuyukile Mike pa myaka yavula. Aye Kamonyi wa kwa Yehoba. Bino nakankalwanga kuyuka biji bupopweshi bwanji. Yehoba ye ñanyi? Nanchi mambo ka Bakamonyi ba kwa Yehoba o babujila kusekelela moba a kukokoloka? Nanchi Mike wajinga mu bupopweshi bwabula kuyukanyikwa nyi?”—Becky, California, U.S.A.
“Bo ngikala nabo kinkalankulo byo batendekele kufunda Baibolo na Bakamonyi ba kwa Yehoba, neipuzhanga’mba: ‘Nanchi jizhina ja kuba’mba Bakamonyi ba kwa Yehoba jilumbulula ka? Ajino ke jizhina ja bupopweshi jabula kuyukanyikwa!’”—Zenon, Ontario, Canada.
“Amiwa ne mukazhami twalangulukilenga’mba Bakamonyi baiya na kwitupamo mambo, mambo kechi twaya ku chechi ne. Twaambilenga’mba inge bupopweshi bukatampe kechi bwayuka bintu byo twakebelenga ne, ko kuba’mba ne bupopweshi bwa Bakamonyi ba kwa Yehoba bwabula ne kuyukanyikwa nabo kechi bwakonsha kuyuka ne.”—Kent, Washington, U.S.A.
“Kwambatu kine, amiwa kechi nayukile byo baji ne bintu byo baitabilamo ne.”—Cecilie, Esbjerg, Denmark.
Kampe mwibamonapo kala na kusapwila ku nzubo ku nzubo nangwa ku mvula bantu saka babena kupana mabuku alumbulula Baibolo ne kufunjisha bantu Baibolo kyatutu. Kampe mwakitambwilapo uno magazini kwi abo. Nangwa byonkabyo, mukizhinauka biji Bakamonyi ba kwa Yehoba. Kampe milanguluko yenu ijitu pamo na ya bantu bo twaambapo peulu.
Umvwe byo byo mulanguluka ne kwiipuzha, kwepi ko mwakonsha kutaana mikumbu? Mwakonsha kuyuka byepi bintu byaitabilamo Bakamonyi ba kwa Yehoba, byo bengila mwingilo wabo ne ko bafumya mali a kushimikila mazubo a kupopwelamo, ne ene mambo o basapwila ku mazubo enu ne ku mapunzha kutanwa bantu bavula?
Cecilie ye twaambapo peulupo, waamba’mba: “Natangile bintu byavula bingi pa Intaneti byaamba pa Bakamonyi ba kwa Yehoba. Naumvwine bintu byavula byamba bantu pe abo ne majashi atama. Akino kyandengejile kushikwa bingi Bakamonyi ba kwa Yehoba.” Nangwa byonkabyo, mu kuya kwa moba wisambile na bene Bakamonyi ba kwa Yehoba kabiji bamukumbwile mepuzho onse o ajinga nao.
Nanchi mukeba kuyuka bishinka pa Bakamonyi ba kwa Yehoba nyi? Tubena kwimutundaika kwipuzha bene Bakamonyi ba kwa Yehoba banemba uno magazini. (Byambo bya Maana 14:15) Twaketekela kuba’mba bibaaba byalondelapo bisakwimukwasha kuyuka byo tuji ne bintu byo twaitabilamo ne kuyuka mwingilo ye twingila.
