MUTWE WA PA NKUPIKO | BAKAMONYI BA KWA YEHOBA BO BAÑANYI?
Ñanyi Bintu Bakamonyi ba kwa Yehoba byo Baitabilamo?
Bakamonyi ba kwa Yehoba bayuka’mba “Binembelo byonse byanembelwe na lutangijilo lwa mupashi wa Lesa kabiji bikwasha bantu pa kwibafunjisha.” (2 Timoti 3:16) Twingijisha Baibolo kwitukwasha kufunda pe Mulenga wetu ne bya kwikala bwikalo bwawama.
Baibolo waamba’mba: “Bantu bayuke’mba anweba, yenka wa jizhina ja Yehoba, yenu bunketu Mwine Wakila pano pa ntanda ponse.” (Salamo 83:18) Onkao mambo, tupopwelatu Yehoba Lesa kabiji byo tuji Bakamonyi banji twibikako kubuula bantu kuyuka jizhina janji.—Isaya 43:10-12.
Byo tuji bena Kilishitu, twayuka’mba Yesu ye “Mwana Lesa,” * waishile pano pa ntanda ne kwikala Mesiasa. (Yoano 1:34, 41; 4:25, 26) Byo afwile, Yesu bamusangwile ne kuya mwiulu. (1 Kolinda 15:3, 4) Kabiji waikele Mfumu wa Bufumu bwa Lesa. (Lumwekesho 11:15) Abuno Bufumu ke kafulumende wa kine ukaleta Paladisa pano pa ntanda. (Danyela 2:44) Baibolo waamba’mba: “Bakimote bakaswana ntanda, kabiji bakasangalelanga mu kuvula kwa mutende.”—Salamo 37:11, 29.
“Inge babena kutanga mu Baibolo, baswa kuba’mba Lesa ubena kwisamba nabo. Umvwe kebapite mu makatazho, batanga Mambo a Lesa ne kukebamo jishinda ja kuyuka mwa kubila na lukatazho. . . . Abo bamona’mba Mambo a Lesa o omi.”—Mukulumpe wa mu bupopweshi bwa Bakatolika aye Benjamin Cherayath, Münsterländische pepala wa byambo wa Volkszeitung, ku Germany
Bakamonyi ba kwa Yehoba bayuka kuba’mba mafunde aji mu Baibolo akonsha kukwasha bantu ne lelo jino. (Isaya 48:17, 18) Onkao mambo, tulondela bulongo ano mafunde. Na mambo a kuba Baibolo witubuula kuchinuzhuka bintu byakonsha konauna milanguluko ne mibiji yetu, kechi tupeepa fwanka nangwa kwingijisha bizhima ne. (2 Kolinda 7:1) Kabiji tuchinuzhuka byubilo byo bakanya mu Baibolo nabiji kupendwapendwa, bulalelale ne kwiba.—1 Kolinda 6:9-11.
^ par. 5 Kabiji Baibolo waamba pe Yesu amba ye “Mwana Lesa yenkawa umotu” mambo ye mubeji kabiji ye yenkatu Yehoba yeelengejile mwine.—Yoano 3:18; Kolose 1:13-15.
Mwakonsha Kutemwa
MEPUZHO O BEPUZHA JAVULA
Nanchi Bakamonyi ba kwa Yehoba Baitabila’mba bo Bonkatu Baji mu Bupopweshi bwa Kine Nyi?
Nanchi Yesu waambile’mba kuji mashinda avula akalengela bantu k upuluka nyi?
BINTU BYAAMBA BAIBOLO
Nanchi Lesa Uji na Jizhina Nyi?
Lesa utelwa’mba wa Bulume Bonse, Mulenga, ne Nkambo. Bino jizhina ja Lesa bejingijisha mu Baibolo kukila pa bimye 7,000.
