Pa mwaka pa mwaka tupulinta ma Baibolo avula ne mabuku alumbulula Baibolo. Tushimika ne kutangijila misampi ne kushimika mwa kupulinchila mabuku mwaya ntanda. Bipwilo byavula bipwila mu Mazubo a Bufumu awama. Bañanyi bapana mali a kwingijisha ku bino byonse?

Mwingilo wetu tumwingila na bupe bwa kwifuukwila. (2 Kolinda 9:7) Mu 1879 magazini wa bubiji ye batelanga’mba: “‘Zion’s Watch Tower’ waambile’mba, twaswa kuba’mba YEHOBA ye mwine ukwasha uno mwingilo, ko kuba’mba kechi tukalomba nangwa kwambila bantu amba betukwasheko ne.” Byo byo kiji ne lelo jino.

Tutuma bupe ku ofweshi wa musampi nangwa kubika mu tubokoshi to babika mu Mazubo a Bufumu. Kechi tupana bya bujikumi, kupitamo na kutambula bya bupe, nangwa kwambila bantu kwitupa mali pa mingilo yo twingila nangwa pa mabuku etu ne. Kechi betupa mali inge twasapwila, kufunjisha mu kipwilo nangwa inge twaingilako mwingilo wa kushimika bishimikwa bya kupopwelamo ne. Atweba tulondela byaambile Yesu amba: “Mwatambwiletu kyatu, ne anweba panaitu kyatu.” (Mateo 10:8) Ba mingilo bonse baji pa maofweshi a misampi ne maofweshi akatampe a ntanda yonse kuvwangakotu ne ba mu Jibumba Jitangijila ja Bakamonyi ba kwa Yehoba, kechi bafola ne.

Mali o tupana beengijisha ne kukwashishamo baji mu bya malwa. Bena Kilishitu batanshi batemenwe bingi kukwasha bakwabo bapitanga mu bya malwa. (Loma 15:26) Ne atweba tukwasha bapita mu bya malwa, twibashimukulwila mazubo ne mazubo a kupopwelamo, twibapa kajo, bya kuvwala ne michi.