Mwaka walondejilepo, natendekele kukaya mu mafilimu, bimye byavula yami nakilanga bakwetu. Bamba bimweka bakebanga kungyuka, bakopa bya kukopa bakebanga bipikichala byami, kabiji bantu bakebanga kutanwa ne amiwa, inge kuji bya kushinkula yami basendanga, bakebanga kuja ne amiwa kajo ka mute ne mabanga. Bantu baambanga bingi pe amiwa kimye kyonse.

Mu kuya kwa moba, namwene kuba’mba abino byonse kechi byanemene kwesakana na monalangulukilanga ne. Nakayanga mu mafilimu atama bingi, kino kyabikanga bumi bwami mu kizumba. Bankaizhi ba mu Hong Kong kechi bakayangako bene mu mafilimu byonka bankaizhi ba mu mafilimu a ku Hollywood byo baubanga ne, pakuba amiwa nakayangamo amiwa mwine, nakilukanga motoka na kapulututu. Mafilimu avula o natanwangamo atamine bingi kabiji ajinga a nkondo. Amo amweshanga byubilo bya bandemona.

Mu 1995 nasongwelwe ku muntu ulenga mafilimu. Nangwa kya kuba najinga na bintu bya kundengela kwikala na lusekelo, nabiji kutumbalala, bunonshi ne mwanamulume wantemwa, najinga bingi na bulanda ne kupopomenwa. Nafuukwilepo kuleka kukaya ano makayo.

Natendekele kuvuluka lwitabilo lo najinga nalo ku bwanyike. Kimye kyonse pa Kibelushi twayanga na kolojami wa mukazhi na kufwakesha kisemi kya Bakamonyi ba kwa Yehoba. Shetu wa jizhina ja Joe McGrath witufunjishanga Baibolo pamo na baana banji basatu ba bakazhi. Akino kisemi kyaikalanga bingi bulongo, kabiji ba “Joe” banemekele bingi bakazhi ne baana babo. Natemwanga bingi kuya nabo na kupwila kwa bwina Kilishitu. Bimye bimo twayanga ne na kubuñana. Abino byajinga bimye byawama bingi. Naumvwanga bingi bulongo kutanwa pamo na Bakamonyi.

Pano bino, bintu byatama byammwekelanga mu kisemi kyetu. Byubilo bya batata byalengelanga bamama  kwikala bingi na bulanda ne kupopomenwa. Byo najinga na myaka jikumi, bamama balekele kupwila na Bakamonyi ba kwa Yehoba. Bino amiwa natwajijile kupwila kya byonkabya kabiji nabatizhiwe saka nji na myaka 17. Kechi papichile ne kimye kyabaya ne, natendekele kuba bintu byatama kabiji nafumine mu kipwilo.

Byo nasongwelwetu, bakalama babiji mu kipwilo kyo najingamo kya Bakamonyi ba kwa Yehoba bamfwakashijile. Bandumbulwijile byo nakonsha kubwela kwi Yehoba Lesa, kabiji baambijile mishonale umo wa jizhina ja Cindy kuba’mba amfunjishenga. Pa kikye kimye, naelele lwitabilo lwami, onkao mambo, namwambijile namba ammweshe kuba’mba Baibolo kine Mambo a Lesa. Wammwesheshe bungauzhi bumo bwa mu Baibolo bwafika. Mu kuya kwa kimye, twaikele balunda kabiji wañambijile kufunda ne amiwa mafunjisho atanshi a mu Baibolo. Naswile. Kyo kimye kitanshi, kyo naswile kuba’mba Yehoba ke Lesa wa butemwe, ukeba’mba amiwa ngikale na lusekelo.

Byo natendekele jibiji kutanwa ku kupwila kwa bwina Kilishitu, nataaine kuba’mba kupwanañana na Bakamonyi kwawama kukila kupwanañana na bantu balenga mafilimu. Bintu byo napichilemo ku bwanyike, byandengejile kubula kuketekela muntu nangwa umo ne, kabiji nashikilwe byo naubilenga. Umo mu kipwilo wankwashishe byo ammwesheshe byaamba Baibolo mwa kubila na makatazho a mu milanguluko, kabiji nafunjile bya kutaana balunda ba kine.

Mu 1997, amiwa ne bamwatawami twayile ku Hollywood, California, ku U.S.A. Akwa naingijile bingi kukwasha bantu kumwenamo mu maana aji mu Mambo a Lesa. Kufunjisha bantu Baibolo kwandengela kwikala na lusekelo kukila kutumbalala ne kukaya mu mafilimu. Mu mwaka wa 2002, nasambakene ne Cheri ye najinga nanji ku Hong Kong. Bintu byo twapichilemo mu bwikalo bipashishe bingi. Waikelepo Miss Hong Kong amiwa saka nkyangye. Byo bampele jino jizhina, aye ye wamvwikile kino kivwalo. Kabiji wakayanga mu mafilimu, kabiji mu kuya kwa kimye watendekele kulenga mafilimu, waingilanga na bantu bayile nkuwa. Ne aye wavilukijile ku Hollywood.

Kyankolele bingi ku muchima byo naumvwine’mba mwanamulume wakebelenga kusongola Cheri wafwa na kikola kya muchima. Kafwako muntu nangwa umo mu bupopweshi mo ayanga bwa Babbuda wamutekeneshe ne. Byonkatu byo najinga, naye watumbalele bingi kya kuba bantu bamukumbwanga, pano bino kechi wajinga na lusekelo ne, kabiji kechi waketekejilepo muntu nangwa umo ne. Natendekele kumubuula bintu byo nafunjile mu Baibolo, pano bino bintu byo afunjile mu bupopweshi bwa Babbuda byamulengejile kubula kuta muchima ku byo namubuulanga.

Juba jimo mu mwaka wa 2003, Cheri wantumijile foni kufuma ku Vancouver, ku Canada ko alengelenga filimu. Wambuujile’mba byo aendeshenga motoka ne kukumbwa mungye mo apichilenga, watendekele kulomba na jiwi ja peulu amba: “Mbuule, Lesa wa kine ye ñanyi? Yobe ñanyi jizhina?” Pa kyonkakya kimye, wapichile pa Nzubo ya Bufumu ne kumona jizhina ja Yehoba. Watendekele kulanguluka’mba, Lesa wankumbula, kabiji ponkapotu wakebelenga kumonañana na Bakamonyi ba kwa Yehoba. Byo papichile moba acheche, watendekele kutanwa ku kipwilo kya mu mulaka wa Kichinese mu Vancouver.

 Cheri wambuujile’mba, “Abano bantu bantemwa bingi. Nebabuujile byo naumvwinenga.” Natemenwe bingi kumvwa kino, mambo Cheri byo akayanga mu mafilimu kechi wajingapo na mulunda ne. Cheri watwajijile kutanwa ku kupwila. Bino mu 2005, wanembele kipepala kya kuba’mba akaye na kulenga mafilimu abiji ku China, akino kyo kyamulengejile kubwela ku Hong Kong. Mu 2006, Cheri wipaine kwi Yehoba ne kubatizhiwa pa kubuñana kwajingako mu Hong Kong. Nangwa kya kuba wakebelenga kwingijila Yehoba na muchima yense, kulenga mafilimu kwamulengejile kukankalwa kwingila bulongo kabiji kechi wajinga na lusekelo ne.

Mu 2009, bwikalo bwa kwa Cheri bwaalukile. Wafuukwilepo kuleka kukaya mu mafilimu pa kuba’mba engijilenga Yehoba na muchima yense. Waikele na balunda bakatataka mu kipwilo kya bwina Kilishitu. Waikele musapwishi wa kimye kyonse wa mambo awama a Bufumu kabiji waumvwanga bingi bulongo kukwasha bantu kwikala bwikalo bwawama.—Mateo 24:14.

Cheri wafuukwilepo kufunda mulaka wa Nepalese pa kuba’mba atundaike kajibumba ka Bakamonyi kamba mulaka wa Nepalese mu Hong Kong. Nakonsha kwamba’mba, bantu bavula bamba mulaka wa Nepalese mu Hong Kong bebalengulula kabiji kechi bebanemeka ne, mambo kechi bayukishe kwamba Kizungu nangwa Kichinese ne, kabiji bisho byabo nabyo byapusana bingi. Cheri wambuujile’mba waumvwanga bingi bulongo kukwasha bano bantu kumvwisha byamba Baibolo. Juba jimo byo asapwijilenga ku nzubo ku nzubo, wataaine mwanamukazhi wamba mulaka wa Nepalese wayukileko pacheche pe Yesu, pano bino kafwako kyo ayukile pe Lesa wa kine Yehoba ne. Cheri waingijishe Baibolo kumumwesha’mba Yesu walombele kwi Shanji wa mwiulu. Uno mwanamukazhi byo ayukile’mba wakonsha kulomba kwi Lesa wa kine Yehoba, waswile mambo awama. Kechi papichile ne kimye kyabaya ne, bamwatawanji ne mwananji wa mukazhi batendekele kufunda Baibolo.—Salamo 83:18; Luka 22:41, 42.

Byo namwene Cheri byo atemenwe mwingilo wa kusapwila, neshikishe namba, ‘Ñanyi kintu kisakunkanya kwingilako mwingilo ye abena kwingila?’ Pa kyokya kimye, ne amiwa naikelenga mu Hong Kong. Nafuukwilepo kupeezhako bwikalo bwami kuba’mba ñingileko mu mwingilo wa kufunjisha bantu bukine bwa mu Baibolo. Nataana kuba’mba kuteleka bibena kwamba bantu ne kwibakwasha kumvwisha Mambo a Lesa, kwandengela kwikala na lusekelo lwa kine.

Nafunjishenga Baibolo mwanamukazhi mwina Vietnam waikalangatu na bulanda ne kujila kimye kyonse. Aluno uji bingi na lusekelo kabiji ubena kwiyowa kupwanañana na kipwilo.

Cheri ne amiwa twataaine kintu kyanema kukila kutumbalala. Nangwa kya kuba kyawamanga kwikala mu mafilimu ne kwitulengela kutumbalala, kufunjisha bantu kuyuka Yehoba Lesa kwituletela lusekelo ne kumuletela lukumo. Kine, twimwena byambo bya kine byaambile Yesu amba: “Mu kupana mufuma lusekelo lukatampe kukila mu kutambula.”—Byubilo 20:35.