Nanchi Kine Lesa Twakonsha Kumutaana Nyi?
“Kyakatazha bingi kuyuka Lesa.”—Philo mwina Alexandria, ntemwamaana wa mu myaka kitota kitanshi.
“[Lesa] kechi uji kwalepa ne atweba bonse ne.”—Saulo mwina Talasusa, ubena kwambila bantemwamaana ba mu myaka kitota kitanshi mu Atene.
NGE mwatanga byambo byaamba bano bantu babiji, byepi bibena kulumbulula byo mulanguluka? Bantu bavula baswa kuba’mba byambo byaambile Saulo mwina Talasusa ye batongola’mba mutumwa Paulo, bitekenesha kabiji bya kine. (Byubilo 17:26, 27) Kabiji Baibolo waamba pa bishinka bikwabo. Yesu walombele lulombelo mo aambile’mba baana banji ba bwanga bakayuka Lesa ne kutambwila bintu byawama.—Yoano 17:3.
Pano bino, bantemwamaana baji nobe Philo bajinga na milanguluko yapusanako. Baambilenga’mba kechi twakonsha kuyuka Lesa ne, mambo aye kechi wayukanyikwa ne. Pano kwepi ko twakonsha kutaana bishinka?
Baibolo waamba patooka’mba kuji bintu bimo byaamba pe Lesa byakonsha kukatazha bantu kumvwa. Kuyuka myaka yaikala Mulenga, byo alanguluka ne kuvula kwa maana anji kechi kwakonsha kuyukanyikwa, kwikulumbulula nangwa kwikufwanyikizha ne. Kafwako muntu wakonsha kukwatakanya bino ne. Nangwa byonkabyo, abino byonse kechi byakonsha kwitulengela kubula kumuyuka Lesa ne. Kulanguluka languluka pa bino bintu kwakonsha kwitukwasha ‘kufwenya kwipi ne Lesa.’ (Yakoba 4:8) Twayai twisambe pa bintu bimo byakatazha kumvwisha. Kabiji tusakumona ne bintu byaamba pe Lesa byo twakonsha kuyuka.
Ñanyi Bintu Bimo Byakatazha Kuyuka?
LESA WA MYAKA NE MYAKA: Baibolo ufunjisha’mba Lesa wajingako “kufumatu kala kene kufika ne myaka ne myaka.” (Salamo 90:2) Mu jishinda jikwabo, Lesa kechi uji na ntendekelo ne mpelo ne. Byo tuji bantu, “kuvula kwa myaka yanji kechi twakonsha kwikuyuka ne.”—Yoba 36:26.
Byo mumwenamo: Lesa wimulaya kwimupa bumi bwa myaka ne myaka inge mwamuyuka. (Yoano 17:3) Pano uno mulaye wakonsha kwikala byepi wa kine, inge kya kuba Lesa kechi waikala myaka ne myaka ne? “Mfumu wa myaka” ye wakonshatu kufikizha uno mulaye.—1 Timoti 1:17.
MILANGULUKO YA LESA: Baibolo ufunjisha’mba “kafwako muntu nangwa umo wakonsha kuyuka maana” a Lesa ne, mambo milanguluko yanji yakila milanguluko yetu. (Isaya 40:28; 55:9) Mu Baibolo muji bwipuzho bubula kukebewa mukumbu bwa kuba’mba: “Ñanyi wayuka milanguluko ya Yehoba kuba’mba amufunjishe?”—1 Kolinda 2:16.
Byo mumwenamo: Lesa umvwa milombelo ya bantu bavula bamulomba nangwatu babena kulombela pa kimye kimo. Kabiji uyuka inge kabwalula kamo kapona panshi. Nanchi milanguluko ya kwa Lesa yakonsha kutabankana na bintu byavula kya kuba wakankalwa kumvwa milombelo yenu nyi? Ine, milanguluko yanji kechi yapelelela ne. Anweba “mwanema kukila bisamba bya bwalula.”—Mateo 10:29, 31.
MASHINDA A LESA: Baibolo ufunjisha’mba bantu kechi “bakonsha kuyuka mingilo yaingila Lesa wa kine kufuma ku ntendekelo kufika ne ku mpelo ne.” (Musapwishi 3:11) Onkao mambo, kechi tukayuka bintu byonsetu pe Lesa ne. Maana aji mu mashinda a Lesa ‘akatazha kwialondalonda.’ (Loma 11:33) Pano bino, Lesa wipana kusolwela mashinda anji bantu bamutokesha ku muchima.—Amosi 3:7.
Myaka yaikala Mulenga, byo alanguluka ne kuvula kwa maana anji kechi kwakonsha kuyukanyikwa, kwikulumbulula nangwa kwikufwanyikizha ne
Byo mumwenamo: Inge mwatwajijila kutanga ne kufunda Baibolo, mukafunjilangako bintu bya katataka byaamba pe Lesa ne mashinda anji. Umvwe saka tuba bino, tukafwenyanga kwipi ne Shetu wa mwiulu myaka ne myaka.
Byo Mwakonsha Kuyuka
Kubula kumvwisha bintu bimo pe Lesa kechi kulumbulula’mba kyapwa kechi twakonsha kumuyuka ne. Mu Baibolo muji byambo byavula bingi bitukwasha kuyuka Lesa bulongo. Akimonai bino bintu:
JIZHINA JA LESA: Baibolo witufunjisha’mba Lesa witumba jizhina. Mwine waamba’mba: “Amiwa yami Yehoba. Jino jo jizhina jami.” Jizhina ja Lesa jitanwa mu Baibolo bimye 7,000, kukila jizhina jikwabo.—Isaya 42:8.
Byo mumwenamo: Yesu walombele mu lulombelo lwanji amba: “Tata wetu wa mwiulu, jizhina jenu jizhile.” (Mateo 6:9) Nanchi ne anweba mwingijisha jizhina ja Lesa pa kulomba nyi? Yehoba winengezha kupulusha muntu yense unemeka jizhina janji.—Loma 10:13.
LESA KO EKALA: Baibolo ufunjisha’mba kuji “meulu” abiji, ko kuba’mba meulu mwikala bilengwa biji na mubiji wa mupashi ne meulu o tumona na meso pano pa ntanda. (Yoano 8:23; 1 Kolinda 15:44) Mu Baibolo muji kyambo kya kuba’mba “mwiulu” kilumbulula mwiulu mwikala bilengwa bya mupashi. Mpunzha “mwikala” Mulenga ke “mwiulu.”—1 Bamfumu 8:43.
Byo mumwenamo: Muyukai Lesa bulongo. Mulenga kechi bulume butanwa konsetu ne mu bintu byonsetu ne. Yehoba muntu wikala mu mpunzha ya kine. Kabiji “kafwako kilengwa nangwa kimo kyafyama kwi aye ne.”—BYUBILO BYA LESA: Baibolo ufunjisha’mba Yehoba uji na byubilo byawama bingi. “Lesa butemwe.” (1 Yoano 4:8) Kechi ubepa ne. (Titusa 1:2) Kechi uji na misalululo ne, aye uji na lusa, kifyele kabiji ubanda kuzhingila. (Kulupuka 34:6; Byubilo 10:34) Bantu bavula bakonsha kukumya’mba Mulenga ukeba kwikala na “bulunda bwa pa muchima” na boba bamunemeka.—Salamo 25:14.
Byo mumwenamo: Mwakonsha kwikala mulunda ne Yehoba. (Yakoba 2:23) Umvwe mwayuka byubilo bya Yehoba, mwakonsha kumvwisha bulongo mashimikila a mu Baibolo.
‘MUKEBAI’
Baibolo walumbulula bulongo biji Yehoba Lesa. Kechi kyakatazha kumuyuka ne. Mulenga ukeba anweba amba mumuyuke. Mambo anji Baibolo aamba’mba: “Inge wamukeba, aye ukesolola kwi obewa.” (1 Byambo bya Moba 28:9) Inge mukeba kuyuka Lesa, tangainga Baibolo ne kulanguluka languluka pa mashimikila aji mu Baibolo. Umvwe mwauba bino, Baibolo walaya’mba Lesa “ukafwenya kwipi ne anweba.”—Yakoba 4:8.
Inge mwatwajijila kutanga ne kufunda Baibolo, mukafunjilangako bintu bya katataka byaamba pe Lesa ne mashinda anji
Mwakonsha kwishikisha’mba, ‘Byo kiji kuba’mba kechi nakonsha kuyuka bintu byonse pe Mulenga ne, nakonsha kwikala byepi mulunda nanji?’ Akilangulukai pa kino: Nanchi mulunda wa kwa dokotala wakonsha kuyuka muchi yense nyi? Ine! Mulunda wa kwa dokotala wakonsha kuyukako mingilo ikwabotu yapusanako. Pano bino, saka baji balunda. Kintu kyanemako ke kya kuba’mba mulunda wa kwa dokotala wayuka biji dokotala ne bintu byo akeba ne byo abula kukeba. Po pamotu, mwakonsha kufunda biji Yehoba mu Baibolo, ko kuba’mba mwafwainwa kuyuka byo aji pa kuba’mba mwikale mulunda nanji.
Twaambakotu bicheche pe Mulenga, mu Baibolo mo muji bishinka byakonsha kwitukwasha kuyuka Lesa. Nanchi mukeba kuyuka bintu byavula pe Yehoba Lesa nyi? Bakamonyi ba kwa Yehoba bafunjisha bantu Baibolo kyatutu. Twimutundaika kumona Bakamonyi baji ko mwikala nangwa yai pa keyala wa www.pr418.com.