Nasemekejilwe mu Acul, muzhi waikela kwa bunke ku makuji a ku Guatemala. Kisemi kyami kyafuma ku bena Ixil, bantu ba ku Maya. Naambanga Kisipanishi ne mulaka wa konkakwa. Kimye kyo nasemekelwe, mu kyalo kya Guatemala mwajinga nkondo yasendele myaka 36. Pa kikye kimye, bena Ixil bavula bafwile.

Byo najinga na myaka ina, kolojami wa myaka itanu na ibiji wakaishenga bomu yatubikile ayo ine. Mu ano mapuso amiwa nasabikile meso; pakuba kolojami wafwile. Kufumatu kyokya kimye, naikelengatu mu Muzhi wa Guatemala mo balamina bantu bafwa meso, akwa ko ko nafunjijile kutanga mabuku a bampofu. Mukulumpe witulamanga wankanyanga kwisamba na bakwetu kabiji bakwetu baana ba sukulu kechi bakebanga kukaya ne amiwa ne. Naumvwanga bingi mukose kabiji natonganga bañondo babiji mu mwaka bo nayanga na kumona bamama bangubilanga lusa ne kifyele. Kyatamakotu, bafwile saka nji na myaka jikumi. Byo nayukile’mba nafwisha muntu wantemenwe, kino kyandetelanga bingi bulanda.

Byo nafikizhe myaka 11, nabwelele kwetu ne kutendeka kwikala na kolojami ne kisemi kyanji. Bampanga bintu bya ku mubiji, pano bino kafwako nangwa umo wantekeneshanga ne. Bimye bimo, najijilanga Lesa namba: “Nanchi mambo ka bamama o bafwijile? Mambo ka o nafwila meso?” Bantu bambuulanga’mba bintu byonse byo mbena kupitamo, Lesa ye walengela. Napwishishe mu muchima wami namba Lesa kechi utako muchima ku byo mbena kupitamo ne. Ene mambo o nabujile kwiipaya, kechi najinga na bintu bya kwiipayilako ne.

Kufwa meso kwandengejile kubula kwizhikijila. Byo nakijingatu kalombwana, bantu bavula bandalaanga bingi pa bimye byavula. Kechi naambanga byo bangubanga ne, nalangulukilenga’mba kafwako wakonsha kunkwasha ne. Bantu kechi besambanga ne amiwa javula ne, ne amiwatu kechi nesambanga na muntu ne. Naikalangatu bunke na bulanda, kabiji kechi naketekejilepo muntu nangwa umo ne.

Byo nakijinga mwanyike, Bakamonyi ba kwa Yehoba babiji (ba mulume ne mukazhi) bansolomokele kimye kyo kwajinga bya  kukayakaya pa sukulu. Mufunjishi umo pa sukulu po nafundanga, wangubijile lusa, wibambiji­le’mba bamfwakeshe. Bambuujile pa milaye ya mu Baibolo amba bantu bafwa bakasanguka ne ku­ba’mba juba jimo bampofu bakalaba. (Isaya 35:5; Yoano 5:28, 29) Natemenwe bingi bintu byo bamfunjishanga, pano bino kyankatazhanga kwisamba nabo, mambo kechi napijilwe kwamba ne. Nangwa kya kuba kechi nakasulukijile bantu ne, abo batwajijiletu kwiya na kumfunjisha Baibolo. Bano ba mulume ne mukazhi baendanga makilomita 10 kupita mu mitumba pa ku­ba’mba bafike mu muzhi mo naikalanga.

Kolojami wambuujile’mba bavwala bingi bulongo, bino kechi baji na bintu byavula bya ku mubiji ne. Nangwa byonkabyo, bantanga bingi muchima kimye kyonse ne kundetelapo bya bupe bicheche. Nayukile’mba bena Kilishitu ba kine bo bonkatu baji na muchima wa uno mutundu.

Nafundanga Baibolo kwingijisha mabuku a bampofu. Nangwa kya kuba naumvwanga byo nafundanga, pano bino kyankatazhanga kuswa bintu bimo. Kyankatezhe bingi kuswa’mba Lesa wanta muchima byo nji muntu ne kuba’mba kuji bantu bakonsha kunta muchima byonkatu biji Lesa. Nafunjile ene mambo Yehoba o aswishisha bubi pa kakimye kacheche, bino kyankatazhanga bingi kuswa’mba ye Shetu witutemwa. *

Mu kuya kwa moba, bintu byo nafunjile mu Binembelo byandengejile kupimpula byo nalangulukanga. Nafunjile’mba Lesa ubila lusa bantu babena kumanama. Lesa waambile pa bapopweshi banji bo bamanyikilenga’mba: “Kine namona kumanama kwa bantu bami . . . nayukishatu bulongo makatazho o babena kupitamo.” (Kulupuka 3:7) Byo nafunjile pa lusa luji ne Yehoba, nafuukwilepo kwipana kwi aye. Mu mwaka wa 1998, nabatizhiwe kwikala Kamonyi wa kwa Yehoba.

Byo papichile mwaka umo kufuma po nabatizhiwe, nayile ku sukulu wa bampofu kwipi na muzhi wa Escuintla. Mukulumpe mu kipwilo mo najinga wayukile makatazho o napitangamo pa ku­ba’mba ntanwe ku kupwila kimye kyo najinga kwetu. Kipwilo kyajinga pepi kyaikejile bushiya bwa mutumba kwafumanga Bakamonyi ba mulume ne mukazhi baiyanga kumfunjisha, kabiji kyankatazhanga bingi kuyako. Pa kuba’mba ntanwengako, mukulumpe mu kipwilo waambijilepo kisemi kya Bakamonyi mu muzhi wa Escuintla kunsenda ku nzubo kwabo ne kunkwasha kuyanga na kupwila. Ne lunotu batwajijila na kunkwasha nobe ne wa mu kisemi kyabo.

Nakonsha kwamba bintu byavula bingi bingubila balongo ne banyenga mu kipwilo bimwesha’mba kine bantemwa. Kwambatu kine, abino bintu byonse byo bangubila bindengela kuswa’mba byo nji Kamonyi wa kwa Yehoba, nji pa bena Kilishitu ba kine.—Yoano 13:34, 35.

Naleka kulanguluka’mba kechi nanema ne, kabiji nji na luketekelo. Pano nayuka kyo naikela na bumi. Byo nji musapwishi wa kimye kyonse mu mwingilo wa kufunjisha Baibolo wa Bakamonyi ba kwa Yehoba, ntatu muchima pa kufunjisha bukine kechi pa bulema bwami ne. Kikwabo ne mukulumpe mu kipwilo kabiji ñamba majashi a mvula bantu mu kipwilo mo nji. Kabiji naambileko ne majashi pa kushonkena kwa kijiiji kutanwa bantu bavula.

Mu mwaka wa 2010 natainwe ku Sukulu wa Lufunjisho lwa Mwingilo (ye babena kutongola luno amba Sukulu wa Basapwishi ba Bufumu) waikejile mu muzhi wa El Salvador. Uno sukulu wankwashishe kuyuka bya kwingila bulongo mingilo yami mu kipwilo. Kupita mu uno sukulu kwandengejile kumona’mba Yehoba Lesa wannemeka ne kuntemwa, aye ukwasha muntu yense kufikilamo kwingila mwingilo wanji.

Yesu waambile’mba: “Mu kupana mufuma lusekelo lukatampe kukila mu kutambula.” (Byubilo 20:35) Nakonsha kwamba’mba nji bingi na lusekelo, nangwa kya kuba kala nalangulukanga’mba kechi nakonsha kwikala nalo ne, pano luno nayuka’mba nakonsha kukwasha bakwetu.