Balunda besamba pa kuba’mba bakoseshe bulunda bwabo. Lesa naye ukeba’mba twisambenga nanji kuba’mba tukoseshe bulunda. Waamba’mba: “Anweba mukangita ne kwiya kwi amiwa ne kulomba kwi amiwa, kabiji amiwa nkemumvwa.” (Yelemiya 29:12) Umvwe ke mwisambe ne Lesa, ‘mukafwenya kwipi ne [aye], ne aye ukafwenya kwipi ne anweba.’ (Yakoba 4:8) Baibolo witubuula’mba: “Yehoba uji kwipi na bonse bamwita.” (Salamo 145:18) Inge twatwajijila kulomba kwi aye, bulunda bwetu ne Lesa bukakosa.

Yesu waambile’mba: “Ñanyi mwi anweba uba umvwe mwananji wamulomba shinkwa, wamupa jibwe? Nangwa umvwe wamulomba jisabi, wamupa muloolo? Onkao mambo, nangwa kya kuba . . . mwayuka kupana byawama ku baana benu, ko kuba’mba Shenu wa mwiulu ukakilapo kupana byawama ku boba bamulomba!” (Mateo 7:9-11) Lesa ubena kwimwambila’mba lombainga kwi aye mambo “wimuta muchima” kabiji ukeba kwimukwasha. (1 Petelo 5:7) Kabiji wimwambila kumubuula makatazho enu onse. Baibolo waamba’mba: “Kange mubambishenga michima yenu na mambo a kintu nangwa kimo ne, bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba.”—Filipai 4:6.

Bashayuka ba bantu bamba’mba, bantu bavula baji na muchima wa kukeba kulomba. Nangwatu bantu bakana’mba Lesa ufwako ne bazhinauka umvwe Lesa koaji nangwa ne, nabo balomba. * Akino kibena kumwesha’mba bantu bebalengele na muchima wa kukeba kuyuka Lesa. Yesu waambile’mba: “Bo ba lusekelo aba baji na muchima wa kukeba kuyuka Lesa.” (Mateo 5:3) Jishindatu jimo jo twakonsha kumuyukilamo Lesa ke kwisambanga nanji kimye kyonse.

Ñanyi bintu byo tukamwenamo inge saka tulomba kwi Lesa?