Byambo byaambile Samuel, Teresa ne Magdalene bimwesha ku­ba’mba bantu balomba pa bintu byapusana pusana, bimo byanema kukila bikwabo. Milombelo ya bantu bamo ifuma panshi ya muchima; pakuba bakwabo balombatu kilombelombe. Nangwa kya kuba bamo balom­ba’mba bapase mpeso ku sukulu nangwa balomba’mba bakile bakwabo mu bya kukayakaya, Lesa akwashe kisemi kyabo nangwa bintutu bikwabo, bantu bavula bakeba kulomba. Bakeba bya kukebakeba bataana ku­ba’mba nangwatu boba babula kuya ku chechi nabo balomba kimye kyonse.

Nanchi mulomba nyi? Inge mulomba, ñanyi bintu byo mulombapo? Inge mulomba nangwa ne, mwakonsha kwishikisha’mba: ‘Nanchi lulombelo lukwasha nyi? Nanchi paji umvwa nyi?’ Nembi umo waambile pa lulombelo amba, “lujitu nobe muchi . . . byonkatu byo kikala inge muntu ubena kwamba na kintu kyo atemwa.” Bashayuka bamo ba michi bambatu kintutu kimo amba lulombelo ke “mutundu mukwabo wa muchi.” Nanchi bantu bamo balombatu amba kikulu balomba nangwa kulombatu amba bataane kyo babena kukeba nyi?

Bino Baibolo waamba’mba lulombelo lwanema bingi kukila muchi. Waamba’mba kuji umvwa milombelo inge twalomba mu jishinda jawama ne pa bintu byafwainwa. Nanchi kino kya kine nyi? Twayai tumone bishinka.