Bantu bamo balanguluka’mba kulomba ke kutayatu kimye, mambo kafwako umvwa milombelo. Bantu bakwabo balomba, pano bino kechi bebakumbula ne. Muntu umo ukana’mba Lesa ufwako, wafwanyikizhe biji Lesa ne kulomba’mba: “Nongotwelaikotu pacheche.” Bino waambile’mba, Lesa “wazhindaminetu nzoo.”

Bino Baibolo witubuula’mba Lesa koaji kabiji umvwa milombelo. Baibolo waambile bino byambo ku bantu kala kene amba: “[Lesa] ukemubila bibusa byo akomvwa kujila kwenu kwa kukeba bukwasho; byo akomvwatu kujila kwenu ukemukumbula.” (Isaya 30:19) Kyepelo kikwabo kya mu Baibolo kyaam­ba’mba: “Lulombelo lwa muntu waoloka lumusangajika.”—Byambo bya Maana 15:8.

Kabiji Baibolo waamba ne pa bantu bo bakumbwile milombelo yabo. Kyepelo kimo kyaamba’mba Yesu walombelenga “milombelo ya misashijilo . . . ku yewa wafwainwe kumupokolola” kabiji “Lesa wamumvwine.” (Bahebelu 5:7) Bantu bakwabo bebambapo mu Danyela 9:21 ne 2 Byambo bya Moba 7:1.

Mambo ka bantu bamo o bambila’mba milombelo yabo kechi beikumbula ne? Pa kuba’mba milombelo yetu beikumbule, twafwainwa kulombatu kwi Yehoba * Lesa wa mu Baibolo, kechi ku balesa bakwabo nangwa ku bashakulu ne. Kabiji Lesa ukeba atweba “kumulomba mwayila kyaswa muchima wanji” pa bintu byo aswisha. Lesa witubuula’mba inge twalomba mu jishinda jafwainwa aye “witumvwa.” (1 Yoano 5:14) Pa kuba’mba Lesa omvwe milombelo yetu, twafwainwa kuyuka Lesa wa mu Baibolo ne kufunda kuba kyaswa muchima wanji.

Bantu bavula bayuka’mba lulombelo kechi lwa ku chechitu ne, bino amba Lesa umvwa milombelo ne kwiikumbula. Isaac wikala mu Kenya waamba’mba: “Nalombele namba ankwashe kumvwisha Baibolo. Kechi papichile ne kimye kyabaya ne, muntu umo waishile na kunkwasha.” Hilda wikala mu Philippines, wakebelenga kuleka kupepa fwanka. Byo akankelwe kuleka, mwatawanji wamwambijile’mba, “Nanchi kechi wakonsha kulomba kwi Lesa kukukwasha nenyi?” Walondejile byo amubuujile, kabiji waambile’mba: “Nakuminye bingi Lesa byo ankwashishe. Kilaka kya kupepa fwanka kyatendekele kupwa. Nalekele kupepa.”

Nanchi Lesa wakonsha kutemwa kwimukwasha mu bintu byo mukeba byaesakana na kyaswa muchima wanji nyi?